Zakari 4 - Kazambale lé Sebe Sauunu 1979

Zakari kyan fintran ye yuɛzi gi — Bale blivolɛdére fe Zorobabɛl lɛ

¹ Lanje lé ko ke wefena a nya, é da é ziin, yé é an vuo bélé woo yiblazan vuoan fɛan zo, a zo.

² É lé an lɛ léé: I mɛ fɛ yéé? Yé maa a zi pa a lɛ léé: Maa nagini, yé maa kyan fintran do ye; a blan a sɔrafié, yé bɔ do a é dunle a nwiin, ’té tio sɔrafié a a ma yé ’bɛnu vɔ fintrannu ma;

³ yé ɔliviyili fié a a sɔnɔ, a do a a bɛyila yé a do a a bɛbola.

⁴ Lanje lé ko ke wefena a nya, maa lé a lɛ léma: Anzan, we ’konu gi lé nɔɔ?

⁵ Lanje lé ko ke wefena a nya, é a zi pa an lɛ léé: I ’ka we ’konu gi maan loo? Yé maa léé: Iin, anzan.

⁶ Yé é lé an lɛ léé: Dére lé Gakelebale a fe Zorobabɛl lɛ, yee lé ke ’ko: Gakelebale léma: Mi lé plɛplɛ valé mi lé glawe ’ka we kɛla lo; naa, an Léli ɛ we kɛla.

⁷ Bii gɔ blɛn, i a mɛ fɛ nya Zorobabɛl ’lɛɛ? É dan i na bɔ lɛ ékema. É dan kɔnsun gɔlɛ vɔ lɛ, ’té munu éé siaan léé: Gɔlɛ ’ko ’é vo anaoo na! É a é zimaoo é zima!

⁸ Gakelebale lé an lɛ léma:

⁹ Zorobabɛl kɔn ’ko gane vɔ yé é dan a béli vɔ lɛ, yé i dan a gi dɔɔ lɛ léé, lai sunyanu lé Gakelebale ɛ an pa zia ka va.

¹⁰ Munu lé woo nyé yélié we pélisiale dɛrɛ kiéné ma, dé wo kɔndɔma nivoo ye Zorobabɛl lee, wo gi é dan nana lɛ. Fɛ sɔrafié ’ko, wa Gakelebale yuɛ sɔrafié lé woo dɔwoo tɛrɛ faa la, wo nya.

¹¹ Maa we fe é ziin lanje lɛ yé maa léé: Ɔliviyili fié lé wo ke é dɔle fintran bɛyila valé a bɛbola bɛ, wozé gi lé nɔɔ?

¹² An we fe é ziin yé maa lé a lɛ léma: Ɔliviyili bɛ fié lé wo ke kyan tio fié lé nyɔnɔ éé yoroan wo gi bɛ, wo sɔnɔ bɛ, wozé gi lé nɔɔ?

¹³ Yé é lé an lɛ léma: I ’ka wozé gi dɔɔa loo? Maa léé: Iin, anzan.

¹⁴ Yé é léé: Mi fié lé woo dɔa Tɛrɛfaazan ’lɛ, ’té wo nyɔnɔ zén wo nwiin bɛ, wo lé.