Zakari 3 - Kazambale lé Sebe Sauunu 1979

É Balebanmunu ’lɛzan ye yuɛzi gi

¹ Gakelebale a kɛlɛ léé, maa Balebanmunu ’lɛzan Jozué ye, ’té é a é dɔle Gakelebale lé lanje ’lɛ, ’té Satan a é dɔle a bɛyila, we dɔle a nwiin we ma.

² Yé Gakelebale lé Satan lɛ léé: Satan, Gakelebale ’é i tadɔ ma. Gakelebale lé é Jérusalɛm si a va, ’é i tadɔ ma. Kyɛ péliné lé wa gana kyɛ va, yeean é ke bɛ loo?

³ Sɔ tiridɔle a é zénle Jozué ta, ’té é a é dɔle lanje ’lɛ.

⁴ Yé lanje we fe munu lé wo ke a ’lɛ, wo lɛ léé: ’Ka sɔ tiridɔle si a ta. ’Bɛ zuo é lé Jozué lɛ léé: Bé ye, maa ilé weplenu si i ma, yé maa fɛtikɛlɛsɔ zén i ta.

⁵ Yé maa léé: ’Wo nɔɔn zima vuru a ’wuo ma ma. Yé wo nɔɔn zima vuru a ’wuo ma, yé wo sɔ zén a ta. ’Té Gakelebale lé lanje ana.

⁶ Gakelebale lé lanje we fe Jozué lɛ léma:

⁷ Lai sunyanu lé Gakelebale léma: Dé i tawo anlé zinu ta, dé i an dérenu lɛdɔma, i dan kɛlɛ lɛ anlé munu lé weblezan nya, yé i dan kɛlɛ lɛ anlé gɔrɔ tabinzan nya, yé maa dan vole éboma nɔ lɛ i lɛ, munu lé wo ke é dɔle an ’lɛ ’ko, wo va.

⁸ Amalé Balebanmunu ’lɛzan Jozué, ’i tɔné dɔ an lɛ, bii valé i bɔlunu lé wo ke é nyanale i ’lɛ bɛ, ’té wo ke tɛlɛ tɛlama tɔmasenu nya bɛ, wo nya. Bé ye, an leezan lé wa laama mipunla, maa dan a pa lɛ zia.

⁹ Bé ye, gɔlɛ lé maa pla Jozué ’lɛ, yuɛ sɔrafié a gɔlɛ do ’ko ma; lai sunyanu lé Gakelebale léma: Guru lé é a lé wa vɔ a ma, maa dan guru ’ko vɔ lɛ a ma anboan; maa dan tɛrɛ ’ko lé wenyané si lɛ é ma yi do kpen.

¹⁰ Lai sunyanu lé Gakelebale léma: ’Bɛ yi la, ka faa do do ka dan ka bɔlunu laa lɛ, ’té ka a é nyanale kalé dɔrɔyili valé bɔrɔyilinu wuo.