Zakari 14 - Kazambale lé Sebe Sauunu 1979

Jérusalɛm valé bɛngɔnɔnu

¹ Ka ye, Gakelebale lé yi blɛn bɔ, yé wo dan ka pa gi fɛnu guli lɛ kalé fla méléna.

² Maa dan bɛngɔnɔnu faa zén lɛ ékeva, yé wo guli dan Jérusalɛm va. Wo dan fla ’ko si lɛ, wo dan kɔnnu gi puo lɛ, yé wo dan zɔwɛ gyɛ lɛ ana lomu ta. Flamunu lɛ do é dan go lɛ luu gi, naa, wo ’ka dan a pɔnénu gyɛ lɛ lo.

³ Gakelebale é dan da lɛ yé é dan guli dan lɛ bɛn ’konu va, fɛan zo lé é guli dan guli blɛn danyi nya, a zo.

⁴ ’Bɛ yi nya a ganenu é dan dɔra lɛ ɔlivigɔ lé ke Jérusalɛm yara yirinwanazia, a nwiin, ɔlivigɔ fén é dan gyɛ lɛ é méléna, é sia yirinwanazia yé é bɔ yirivɔnazia yé a worona é dan kɛlɛ lɛ blɛn. Gɔ ’ko fee do é dan bié lɛ yirinwana bɛbolazia, yé a fee do é dan bié lɛ yirinwana bɛyilazia.

⁵ Ka dan vɔ lɛ flii, anlé gɔ ’konu worona, naa, gɔworona ’ko é dan go lɛ fɔɔ yé é bɔ Azɛl; fɛan zo lé ka fwi tɛrɛ manyɔɔnle lee Juda nwiinzan blɛn Ozias bléyi va, ka dan fwi lɛ a zo. Yé Gakelebale anlé Bale é dan da lɛ élé mi sauunnu faa nya é va.

⁶ ’Bɛ yi la, fɛna fu ’ka dan kɛlɛ lɛ é dɛrɛ lo; dunu valé glasé é dan vɔ lɛ.

⁷ A zoyi bɛ ’ka lo, Gakelebale a dɔɔ. Yi ’ko é ’ka dan kɛlɛ lɛ yiéyi nya lo, yé é ’ka dan kɛlɛ lɛ béli nya lo, naa, nyanadi, fɛna fu é dan bɔra lɛ.

⁸ ’Bɛ yi la, ’yi zin é dan si lɛ Jérusalɛm, yé a lɛ do é dan yoro lɛ yirinwana wɛyi vazia, yé a lɛ do é dan yoro lɛ yirivɔna wɛyi vazia. É dan kɛlɛ lɛ a zo lɛɛdabléyi valé yiribibléyi va.

⁹ Gakelebale é dan kɛlɛ lɛ tɛrɛ faa nwiinzan blɛn nya. ’Bɛ yi la Gakelebale do kpen é dan kɛlɛ lɛ Gakelebale nya, yé yee do kpen tɔ é dan vo lɛ.

¹⁰ Ana tɛrɛ faa é dan kɛlɛ lɛ fɛna pɛblɛɛ nya, é sia Géba yé é bɔ Rimɔn, Jérusalɛm yirinwana bɛyilazia. Jérusalɛm é dan vɔ lɛ a ma, yé é vo é pa gi. É sia flagɔrɔ ’léé lé wa laama Bɛnjamɛn, a ma, fɔɔ yé é bɔ flagɔrɔ ’léé vininzan ma, fɔɔ yé é bɔ a ’léé lé ke a sun la bɛ, a ma; é sia Ananéɛl lé dɔtafɛ ma fɔɔ yé é bɔ minwiinzan blɛn lé dɔrɔ borona ma, wo faa é dan vo lɛ wo pa gi.

¹¹ Munu é dan nyana lɛ ana, bale pale a ma bɛ ’ka lo; wo dan nyana lɛ Jérusalɛm duaa.

¹² Munu faa lé wo dan guli dan lɛ Jérusalɛm va, bawurumagyɛ lé Gakelebale é dan a vɔ lɛ wo ma, yee lé ke ’ko: Wo wi é dan vɔn lɛ, ’té wa tan é yuɛma, wo yuɛnu é dan vɔn lɛ é koro gi; wo nɛnɛ é dan vɔn lɛ wo ’léé.

¹³ ’Bɛ yi la, Gakelebale é dan dikinimigiwe blɛn kɛlɛ lɛ wo va; a do é dan kun lɛ é bɔluzan bɛ ma, yé wo dan guli dan lɛ ’wo ke va.

¹⁴ Juda é dan pa lɛ Jérusalɛm va, yé wo guli dan. Wo dan ’wo zi bɛntɛrɛnu lé fuafɛnu zun dɔ lɛ, kyan koo, gɔɔlifu koo, sɔ kiɛre kiɛre koo, woo lé.

¹⁵ Wisoonu koo, mulɛnu koo, nyɔgɔménu koo, sokofalenu koo, wi faa lé wo ke wo nyanana bɛ, wo koo, bawurumagyɛ é dan wo gyɛ lɛ é ziin. Bawurumagyɛ ’ko a bélé a koɛ zo.

¹⁶ Bɛnnu faa lé wo nwa Jérusalɛm ma, wo pɔnénu lé wo vo, wo dan go lɛ lɛɛ faa do do ma yé wo dia ’wo bli la minwiinzan blɛn lai sunyanu lé Gakelebale ’lɛ, yé fɛti lé wa kɛla faa wuo yé wo ’bɛ fɛti kɛlɛ.

¹⁷ Dé kɔn‐an gi munu a fe léé, ’wo ’ka go Jérusalɛm minwiinzan blɛn, lai sunyanu lé Gakelebale bɔ lɛ lo, lɛɛ ’ka dan da lɛ wolé fɛna lo.

¹⁸ Dé Éjipiti munu a fe léé, wo ’ka dan lo, dé wo ’ka da lɛ lo, lɛɛ ’ka dan da lɛ wolé fɛna lo. Bɛnnu lé wo ’ka go lɛ faa wuo fɛti kɛlɛ lɛ lo, bawurumagyɛ lé Gakelebale wo gyɛ a nya, é dan woo Éjipitinu gyɛ lɛ a nya.

¹⁹ É dan kɛlɛ lɛ welɛdɔle Éjipiti munu gi nya; bɛngɔnɔnu lé wo ’ka go lɛ faa wuo fɛti kɛlɛ lɛ lo, é dan kɛlɛ lɛ welɛdɔle wo gi nya.

²⁰ ’Bɛ yi la, wo dan sɛbɛ gyɛ lɛ wisoonu bɔrɔ ma pannénu ta léé, Gakelebale sauun zé lé. Yé lɛedaa lé wo ke Gakelebale lé kɔn gi, wolé we é dan kɛlɛ lɛ bélé kyan kananu zo, balebanna sɔnɔ.

²¹ Jérusalɛm valé Juda tɛrɛ faa la, lɛedaa faa é dan kɛlɛ lɛ lai sunyanu lé Gakelebale zé nya. Munu faa lé wo da Bale ban lɛ, wa sié yé wo winu dɔne wo gi. Yé yaawomunu ’ka dan kɛlɛ lɛ lai sunyanu lé Gakelebale lé kɔn gi é dɛrɛ lo. A zo lé é dan kɛlɛ lɛ ’bɛ yi la.