Zakari 13 - Kazambale lé Sebe Sauunu 1979

¹ ’Bɛ yi la, ’yi’wuo do é dan fɔn lɛ David lé munu valé Jérusalɛm munu zé nya, wenyané valé mi tiridɔwenu lé we ma.

² Lai sunyanu lé Gakelebale léma: ’Bɛ yi la maa dan miyilinu tɔ yi ga lɛ tɛrɛ ’ko la, léé, té wo sele é dɔ mi gi é dɛrɛ lo. Balelayezannu koo, bli tiridɔlenu koo, maa dan wo si lɛ tɛrɛ ’ko ta.

³ Dé mi do a a va léé, ’é balelawe fe é ziin, a yaati valé a yaabu é dan a fe lɛ a lɛ léé: I vié wo Gakelebale tɔ gi, amalé é ’ka lé i vo é yuɛma lo. Dé é balelawe fe, a yaati valé a yaabu é dan a gyɛ lɛ.

⁴ ’Bɛ yi la, dé balelayemunu a balelawe fena, yara é dan wo gyɛ lɛ ’wolé yuɛziwe fele ma, yé wo ’ka dan wikyɛɛsɔ zén lɛ ’wo ta é dɛrɛ vié wole we ma lo.

⁵ Wo faa do do é dan a fe lɛ léé: Maa ’ka balelayezan nya lo, naa, maa a féipazan nya, naa, wo an lɔ an kiéné la bléyi va.

⁶ Yé dé wa laa a lee léé: Mɛ ɛ i tuo i bɛ maa? É dan a zi pa lɛ léé: An béé lé kɔn gi lé an tuo.

Bale léé, ’wo ’élé ’blatabinzan gyɛ

⁷ Gwɔun‐oo, gwɔun, ’i soi anlé ’blatabinzan ma! Lai sunyanu lé Gakelebale léma: ’I soi an bɔluzan ma. ’I ’blatabinzan gyɛ yé alé ’blanu ’é fwila. Yé maa dan bɔ lɛ ’bla tɔɔtɔɔnu va.

⁸ Gakelebale léma: Ana tɛrɛ faa la, maa dan mi lɛ fié kulu ga lɛ yé wo dan zamaga wo lɛ, yé a lɛ do é dan vo lɛ.

⁹ Maa dan a lɛ do ’ko vɔ lɛ kyɛ va, yé maa dan wo kɛlɛ lɛ tegele fɛan zo lé woo gɔɔlifu kɛla tegele, a zo, yé maa dan wo gi dan lɛ bélé kyan selele zo. Wo dan an tɔ laa lɛ, yé maa dan we lɛ wo lɛ. Maa dan a fe lɛ léé: Anlé munu lé, yé wo dan a fe lɛ léé: Gakelebale a kolé Bale nya.