Zakari 12 - Kazambale lé Sebe Sauunu 1979

Jérusalɛm é dan so lɛ we lee é voéla

¹ Dére lé Gakelebale a fe Izraɛl ma, yee lé ke ’ko. Gakelebale lé é lanu fwila yé é tɛrɛ gane vɔ, yé é léli pa blami gi bɛ, é léma:

² Maa dan Jérusalɛm kɛlɛ lɛ a zi migɔnɔnu lɛ bélé nwɛ lé é wo gyɛ, a zo, yé Juda zé é dan kɛlɛ lɛ tɔntɔn é ziin, Jérusalɛm mabɛn bléyi va.

³ ’Bɛ yi la maa dan Jérusalɛm kɛlɛ lɛ migɔnɔnu faa lɛ bélé gɔlɛ bɛnzan zo; munu faa lé wo dan a wuo vɔ lɛ, é dan wo gyɛ lɛ, yé tɛrɛ la bɛnnu faa é dan zén lɛ ékeva yé wo péli vɔ a ma.

⁴ Gakelebale léma: ’Bɛ yi la, maa dan wisoonu faa gi blin lɛ ’wo ma, yé maa dan wo tazannu yuɛi nɔɔ lɛ. Naa, dé maa a migɔnɔnu lé wisoonu faa yuɛ ’wiina, maa dan an yuɛ pa lɛ Juda munu ta.

⁵ Juda mi blɛnnu é dan fe lɛ ’wo bli gi léé: Jérusalɛm munu lé ke kolé plɛplɛ nya, lai sunyanu lé Gakelebale wolé Bale tɔ gi.

⁶ ’Bɛ yi la maa dan Juda mi blɛnnu kɛlɛ lɛ bélé kyɛ lé wa sɔn yili gale méléna, a zo, bélé sonakyɛ zo ’sanwunnu méléna. Wo dan ’wo zi munu faa ble lɛ, ’wo bɛyila valé ’wo bɛbola, yé Jérusalɛm é dan vo lɛ é pa gi.

⁷ Gakelebale é dan Juda munu si lɛ we gi é vinin, léé, David lé munu koo, Jérusalɛm munu koo, té wo tɔbɔle mini Juda munu zé ta lo.

⁸ ’Bɛ yi la Gakelebale é dan Jérusalɛm munu takuun lɛ, yé wo va mi tɔɔtɔɔ é dan kɛlɛ lɛ bélé David zo ’bɛ yi la, yé David lé munu é dan kɛlɛ lɛ Bale zo, bélé Gakelebale lé lanje lé éé tawoo wo ’lɛ, a zo.

⁹ ’Bɛ yi la bɛnnu faa lé wo dan da lɛ Jérusalɛm ma guli nya, maa dan kwa kuli lɛ léé, maa wo gyɛ.

¹⁰ Yé maa dan bli zin valé zantévɔ?-?bli vɔ lɛ David lé munu valé Jérusalɛm munu gi, yé maa lé wo an fɔn, wo dan ’wo yara nɔla lɛ an vazia. Yé wo dan an wuvɔ lɛ bélé néwɔlɛ do kpen wuvɔle zo, yé wo dan an wuvɔ lɛ kaii bélé né vininzan wuvɔle zo.

¹¹ ’Bɛ yi la, wo dan gyɛ bo lɛ kaii Jérusalɛm, bélé gyɛ lé wa bo Adadrimɔn, Mégidɔn gɔ worona, a zo.

¹² Tɛrɛ ’ko la munu faa é dan gyɛ bo lɛ ’wolé kɔn ’léé do do; David lé munu wo dan ’wozé bo lɛ é yɛrama, yé lomu woé bo é yɛrama; Natan lé munu wo dan ’wozé bo lɛ é yɛrama, yé lomu woé bo é yɛrama.

¹³ Lévinu wo dan ’wozé bo lɛ é yɛrama, yé lomu woé bo é yɛrama; Siméi lé munu wo dan ’wozé bo lɛ é yɛrama, yé lomu woé bo é yɛrama;

¹⁴ migɔnɔ pɔnénu faa, wo dan ’wozé bo lɛ é yɛrama, yé wolé lomu woé bo é yɛrama.