Zakari 10 - Kazambale lé Sebe Sauunu 1979

Bale léé, ’é dan munu so lɛ we lee

¹ ’Ka lɛɛ laa Gakelebale lee, ’ka lɛɛ vininzan laa a lee. Gakelebale é dan lɛɛ yuɛ wuo vɔ lɛ nuu, yé é dan lɛɛ blɛn pa lɛ ka lɛ zia; é dan fɛ dɔ lɛ ka faa do do lé féi.

² Naa, térafimnu dére a é pla, ’monédɔmunu éé tɛlɛ tɛlama we fé vié nya; nyɛ ginu a vié nya, yé woo mi tɔrɔ paan boawenu nya. Amalé munu a wona bwi gi bélé trubɛ palu zo. Wo pazan ’ka lo, amalé wa wenaané bɔmazannu nya.

³ An bli fli wo pazannu ma, yé an we lɛdɔ woo boligɔnénu gi. Naa, Gakelebale da élé trubɛ palu Judanu va; é dan wo kɛlɛ lɛ bélé alé wisoo tɔbɔle zo gulidan bléyi va.

⁴ Yee ɛ gi lé kɔnsungɔle é dan bɔra lɛ, gulidansa é dan si lɛ yee ɛ va; yee ɛ va lé minwiinzannu faa é dan si lɛ.

⁵ Wo dan kɛlɛ lɛ bélé nyanazannu lé woo voli zɔn‐o zia gulidanbléyi va, wo zo; Gakelebale é dan kɛlɛ lɛ wo va, amalé wo dan guli dan lɛ; yé munu lé wo dan vɔ lɛ wisoonu ta, yara é dan wo gyɛ lɛ.

⁶ Maa dan Judanu dɔ lɛ gligli, Maa dan Jozɛfunu si lɛ we gi; An nyanai zén wo ta, amalé an dan da lɛ wo nya wo pa gi, Yé wo dan kɛlɛ lɛ bélé an ’ka tan sɔn vinin vɔ lɛ wo ma lo. Naa, maa a Gakelebale wolé Bale nya, yé an dan wolé bazoro dére nyi si lɛ.

⁷ Éfraim é dan kɛlɛ lɛ bélé gulidan nyanazan zo; Wo gi é dan nana lɛ bélé nwɛ lé wa mini, Wo benu é dan a ye lɛ yé wo gi é dan nana lɛ kaii; Wo gi é dan nana lɛ Gakelebale gi.

⁸ Maa wo tabo, amalé maa dan ’furu fɛn lɛ wo lɛ yé maa wo zén ékeva, Yé wo dan fan lɛ bélé é vinin zo.

⁹ Maa dan wo sɔɔla lɛ munu méléna, Yé dé wa baa, an sele é dan dɔ lɛ wo gi; Wo valé wolé nénu é dan vo lɛ é yuɛma, yé wo dan da lɛ wo pa gi é ziin.

¹⁰ Maa dan wo si lɛ Éjipiti tɛrɛ la yé maa da wo nya; Maa dan wo si lɛ Asiri tɛrɛ la yé maa wo zén ékeva; Yé maa dan da lɛ wo nya wo pa gi Galaad valé Liban tɛrɛ la, Yé fɛna ’ka dan sɔ lɛ wo ma lo.

¹¹ Bale é dan nyané ble wɛyi kini lɛ, yé é dan fɛ duun lɛ wɛyi nwalenu lɛ Yé yuu gurunu faa é dan béli lɛ; Asirinu lé boblɛn é dan nyaa lɛ, Yé Éjipiti lé plaminwiinyili é dan san lɛ.

¹² Maa dan wo dɔ lɛ gligli Gakelebale lé plɛplɛ nya, Yé wo dan tawo lɛ a tɔ gi. A zo lé Gakelebale a fe.