Zakari 1 - Kazambale lé Sebe Sauunu 1979

Bale élé munu laa léé, ’wo da ’é va

¹ Darius plale mi nwiin lɛɛ fiézan lé moné sɔraazan nya, Gakelebale we fe balelayezan Ido be Bérékia be Zakari lɛ, yé é léma:

² Gakelebale bli fli ka tranu ma é baba.

³ Amalé bé fe wo lɛ léma: Lai sunyanu lé Gakelebale léma: ’Ka da maa, lai sunyanu lé Gakelebale va é ziin, yé maa dan da lɛ é ziin ka va. A zo lé Gakelebale a fe.

⁴ Té ka kɛlɛ bélé ka tranu zo lo. Balelayezan vininnu we fe wo lɛ léé: Lai sunyanu lé Gakelebale léma: ’Ka si kalé zi naanénu ta, ’ka daan ka kɛlɛwe naanénu ma. Naa, wo ’ka ’wo tɔné dɔ lɛ ’bɛnu lɛ lo, yé wo ’ka a ’male nyi si lɛ an lɛ lo. A zo lé Gakelebale a fe.

⁵ Ka tranu a kyɛɛn? Balelayezannu ɛnɔ vo é yuɛma lɛɛfaamaa?

⁶ Duowo, an dérenu lé maa wo pa an wuozannu balelayezannu ’léé ka tranu zé nya, wo lɛ ’ka é sɔɔle loo? Yé wo nɔla yé wo léé: We lé é dɔ lai sunyanu lé Gakelebale gi léé, é a kɛla ko lɛ kolé tawobɛ valé ko kɛlɛwenu yɛrama, é a kɛlɛ.

Balelayezan wisoonu valé wi bélinu ye yuɛzi gi

⁷ Darius plale mi nwiin lɛɛ fiézan lé moné vu ta dozan lé wa laama Sébat, ’bɛ lé yi yɔ do wɔlɛ ziɛnzan nya, Gakelebale we fe balelayezan Ido be Bérékia be Zakari lɛ yé é léma:

⁸ Maa nagini é béli, ’té mi do a wisoo kanakana ta, ’té é a é dɔle miiteyilinu méléna furɔ va; ’té wisoo kanakananu koo, a gbamblɛnu koo, a funu koo, ’té wa zuo.

⁹ Yé maa léé: Anzan, wisoo ’konu a de nyaa? Yé lanje lé ko we fé a nya, é lé an lɛ léma: Wisoo ’konu a fɛan nya, maa dan a gɔɔn lɛ i lɛ.

¹⁰ Mi lé ke é dɔle miiteyilinu méléna, é léma: Wa munu lé Gakelebale wo nwunvɔ giéna tɛrɛ faa la, wo nya.

¹¹ Yé Gakelebale lé lanje lé ke é dɔle miiteyilinu méléna, wo we fe a lɛ yé wo léma: Ko gié tɛrɛ faa la, yé tɛrɛ faa a drɔɔ, we do ’ka ana lo.

¹² Yé Gakelebale lé lanje we fe yé é léma: Lai sunyanu lé Gakelebale, Jérusalɛm valé Juda lé flanu lé i bli vo flina wo ma a lɛɛ yɔ yaa wɔlɛ vu lo, i nyanai é dan zén lɛ wo ta mɛ yi laa?

¹³ Gakelebale a zi pa lanje lé ko we fé a nya, a lɛ, dére zinnu valé tɔrɔpaadére nya.

¹⁴ Lanje lé ko we fe an nya, é léma: ’I siaa, bé fe léé, lai sunyanu lé Gakelebale léma: Maa a Jérusalɛm valé Siɔn ta maawona blɛn boenwo,

¹⁵ yé an bli flile nwa blɛn boblɛn bɛnnu ma; an bli a flina sɛ anlé munu ma, yé wozé kɛlɛ naané ’bɛ mini anzé ta.

¹⁶ Bɛwemalé Gakelebale léma: Maa dan da lɛ Jérusalɛm va nyanai zénle nya; maa dan anlé kɔn dɔ lɛ ’bɛna é ziin, yé wo dan kɔnbale pla lɛ Jérusalɛm.

¹⁷ ’I siaa é ziin léma: Lai sunyanu lé Gakelebale léma: Anlé flanu é dan fan lɛ fɛ zinnu nya é ziin; Gakelebale é dan Siɔn tɔrɔ paa lɛ é ziin, yé é dan Jérusalɛm si lɛ a va.

¹⁸ An yuɛ vɔ loru, yé maa nagini, yé maa béli ziɛn ye ana.

¹⁹ Yé maa lé lanje lé ko we fé a nya, a lɛ léé: ’Bɛ bélinu ’ko gi lé nɔɔ? yé é lé an lɛ léé: Bélinu lé wo Juda valé Izraɛl valé Jérusalɛm kini ékema, woo lé.

²⁰ Yé Gakelebale a kɛlɛ léé, an folibozannu ziɛn ye.

²¹ Yé maa léé: Wo dan mɛ kɛlɛ lɛɛ? Yé é léé: Bélinu lé, wo Juda kini ékema fɔɔ, yé mi do kpen ’ka é ’wuo nwa lɛ lo, woo lé; yé folibozan ’konu da kana zénle wo gi we ma, yé bɛnnu lé wo bélinu si Juda munu nwɛɛnle we ma, wo dan yee bélinu sɛrɛ lɛ.