Wepélisiananu 9 - Kazambale lé Sebe Sauunu 1979

Kazambale é gi pa do Noé va

¹ Bale Noé valé a benu drɔɔ vo, yé é lé wo lɛ léé: ’Ka né yaa, ’ka kɛlɛ kiɛre, ’ka fan tɛrɛ la.

² Tɛrɛlawinu faa koo, lagi mianénu faa koo, fɛnu faa lé woo kɔɔan tɛrɛ la koo, wɛyi va pɔnu faa koo, wo dan kana lɛ ka lee, yé kalé we ma lé gligli é dan zén lɛ wo gi. An wo faa tere pa ka lee.

³ Fɛ faa lé éé giéan é yuɛma, wo dan kɛlɛ lɛ kalé fɛblele nya. Maa a faa nɔ ka lɛ bélé lu drɔɔ zo.

⁴ Naa, we do ana; té ka wi ble ’é vo é yuɛmafɛ nya lo, ’bɛ gi léé, a nyɛ.

⁵ Maa dan ka faa nyɛ lɛgi pa lɛ; maa dan a lɛgi pa lɛ winu ma; maa dan a lɛgi pa lɛ munu ma; dé mi do mi gyɛ, maa dan a lɛgi pa lɛ ’bɛzan ma.

⁶ Dé mi do mi nyɛ zana, munu é dan ’bɛzan nyɛ zana lɛ é ziin; Kazambale mi kɛlɛ é dɔbɛ gi, azama.

⁷ Yé ’kaa, ’ka né yaa yé ’ka kɛlɛ kiɛre, yé ’ka nwɛɛn tɛrɛ la, yé ’ka fan a ta.

⁸ Yé Kazambale we fe é ziin Noé valé é benu lɛ yé é léé:

⁹ Ka ye, maa gi pa do ka va, ka valé ka kulunu va.

¹⁰ Fɛ yuɛmalenu faa lé wo ke ka va, dé mianénu léoo, dé flawinu léoo, dé bwigiwinu léoo, ka faa lé ka si ’yitagoro gi, tɛrɛlawinu boen‐oo, maa gi pa do ka faa va.

¹¹ Maa gi pa do ka va, léé, lɛɛ blɛn ’ka dan mi faa gyɛ lɛ é dɛrɛ lo, yé lɛɛ blɛn ’ka dan tɛrɛ sɛrɛ lɛ é ziin lo.

¹² Yé Kazambale léé: Ka koo, wi yuɛmalenu lé wo ke ka va, wo valé wolé nénu nya koo, an gipale do ka va lɛɛfaama tɔmase lé ke ’ko:

¹³ maa anlé bɔmlɛ pla lati wuo, yé é dan kɛlɛ lɛ maa valé tɛrɛ gi pale do tɔmase nya.

¹⁴ Dé an lati zén ékeva tɛrɛ nwiin loru, ’té bɔmlɛ é dan bɔra lɛ lati wuo.

¹⁵ Yé a sele é dan dɔ lɛ an gi léé, maa gi pa do ka valé fɛ yuɛmale gɔnɔ faa nya; yé lɛɛ blɛnblɛn ’ka dan da lɛ é dɛrɛ yé é fɛ faa sɛrɛ lo.

¹⁶ Bɔmlɛ é dan bɔra lɛ lati wuo, yé maa dan a nagini lɛ yé a sele é dan dɔ lɛ an gi léé, maa, Kazambale, an gi pa do fɛ yuɛmale gɔnɔ faa va, yé gipale ’ko a lɛɛfaama we nya, a glɛ ’ka lo.

¹⁷ Yé Kazambale lé Noé lɛ léé: Maa valé tɛrɛ la fɛnu faa gi pale do tɔmase lé ke bɛ.

¹⁸ Noé benu lé wo bɔra ’yitagoro gi, wa Sɛm valé Sam valé Jafɛt nya. Sam a Kanaan ti nya.

¹⁹ Noé benu yaa lé ke bɛ; tɛrɛ la munu faa a wo ɛ kulunu nya.

²⁰ Noé kun féi pale ma, yé é dɔrɔféi pa.

²¹ Yé é dɔrɔ mini yé dɔrɔ a gyɛ yé é sɔ si ’é ta ’élé sɔkɔn wuo.

²² Kanaan ti Sam ’é ti porole ye, yé é a fe é bwenu lɛ béera.

²³ Yé Sɛm valé Jafɛt sɔ blɛn si, yé wa dɔ ’wo lala yé wo vo tawona ’wo zuo zia, yé wo sɔ zén wo ti porole ta. Wo yara vo aan wo é nɔlale yé wo ’ka ’wo ti porole ye lɛ lo.

²⁴ Dɔrɔ si aan wo Noé ta, we lé a be voélazan a kɛlɛ a lɛ, é a ’ma.

²⁵ Yé é léé: An bale pa Kanaan ma. ’É kɛlɛ é bwenu lé luunu lé luu nya ma.

²⁶ Yé é lé é ziin léé: ’Wo Gakelebale, Sɛm lé Bale, drɔɔ vo. Yé Kanaan ’é kɛlɛ wolé luu nya ma.

²⁷ Jafɛt lé fɛna ’é kɛlɛ blɛn ma. ’É nyana Sɛm lé sɔkɔn wuo ma. Yé Kanaan ’é kɛlɛ wolé luu nya ma.

²⁸ Lɛɛ blɛn dale zuo Noé vo é yuɛma lɛɛ wuru do yɔ sɔrafié wɔlɛ vu.

²⁹ Noé yi faa kɛlɛ lɛɛ wuru ziɛn yɔ sɔrafié wɔlɛ vu, yé é ga.