Wepélisiananu 7 - Kazambale lé Sebe Sauunu 1979

Lɛɛ blɛɛn lé we

¹ Gakelebale lé Noé lɛ léé: ’I wɔra ’yitagoro gi, bii valé ilé munu nya; naa, maa i ye mi tégélé nya bléyi ’ko vamunu méléna.

² Wi zinzin faa lé ke bɛ, ’i wi vu ta ziɛn si wo dɔgɔnɔ do do gi, a gɔné sɔrafié, a da sɔrafié; winu lé wo ’ka wi zinzinnu nya lo, ’i wi fié si wo dɔgɔnɔ do do gi, a gɔné do, a da do;

³ ’i miané si wo dɔgɔnɔ faa do do gi vu ta ziɛn, a gɔné sɔrafié, a da sɔrafié; ’i wo pa i va, léé, té wo kulu é ga tɛrɛ la lo.

⁴ Naa, é vo yi sɔrafié, yé maa dan lɛɛ da lɛ tɛrɛ la yi yɔ fié, bladi nyanadi, yé fɛ faa lé maa a kɛlɛ, maa dan wo si lɛ tɛrɛ la tata.

⁵ We faa lé Gakelebale a fe Noé lɛ, é a kɛlɛ.

⁶ Lɛɛ blɛn zun tɛrɛ la bléyian va, ’té Noé lɛɛ a wuru yaa.

⁷ Noé koo, a benu koo, a na koo, a benu nanu koo, wo faa wɔra ’yitagoro gi, wo sole ’yi lee we gi.

⁸ Wi zinzin koo, winu lé wo ’ka wi zinzin nya lo koo, mianénu koo, fɛnu faa lé éé kɔɔan tɛrɛ la koo,

⁹ wo wɔra ’yitagoro gi Noé va, gɔnɔ do do gi fié fié, a gɔné do, a da do, fɛan zo lé Bale a fe Noé lɛ, a zo.

¹⁰ ’Bɛ zuo yi sɔrafié, lɛɛ blɛnblɛn da tɛrɛ la.

¹¹ Noé lɛɛ wuru yaazan, a moné fiézan, a moné yi vu ta sɔrafiézan nya, ’bɛ yi nya guru blɛn gi ’yiwuonu faa lɛ so, yé lanu gɔɔn lɛ so.

¹² Lɛɛ vo dana tɛrɛ la yi yɔ fié, bladi nyanadi.

¹³ Noé koo, Noé benu, Sɛm valé Sam valé Jafɛt koo, Noé na valé Noé benu nanu yaa koo, wo faa wɔra ’yitagoro gi yi do nya;

¹⁴ wo valé bwiiwinu faa dɔgɔnɔ koo, flawinu faa dɔgɔnɔ koo, tawoplɛlawinu faa dɔgɔnɔ koo, mianénu faa dɔgɔnɔ koo, miané kiénénu faa koo, fɛ faa lé wo bɛa ke koo, wo faa nya.

¹⁵ Fɛ faa lé éé flin‐é, wo fié fié wɔra ’yitagoro gi Noé va.

¹⁶ Fɛ faa wɔra é gɔné do, é da do, fɛan zo lé Kazambale a fe Noé lɛ, a zo. ’Bɛ zuo yé Gakelebale ’yitagoro lɛ tan wo ta.

¹⁷ ’Yi blɛn vo tɛrɛ la yi yɔ fié. ’Yinu fan, yé wo ’yitagoro nwa, yé é nwa tɛrɛ ta loru.

¹⁸ ’Yinu kɛlɛ blɛn, yé é fan kiɛre tɛrɛ la, yé ’yitagoro dɔ ’yinu ta loru.

¹⁹ ’Yinu kɛlɛ é ziin blɛɛn, yé gɔ grɔgrɔnu faa lé ke la faa wuo, ’yi wo ta pla.

²⁰ Gɔnu lé ’yi wo ta pla, ’yinu nwa wo ta loru mɛtrɛ sɔrafié é buu.

²¹ Fɛnu faané lé éé kɔɔan tɛrɛ la, wo ga. Mianénu koo, flawinu valé bwigiwinu faa koo, winu faa lé woo tawoo ’wo plɛ la tɛrɛ la koo, munu faa koo, wo faa ga.

²² Fɛnu faa lé woo flin‐é, ’té wo ke tɛrɛ gale ta, wo ga.

²³ Fɛ faa lé ke é yuɛma tɛrɛ la, wo faa ga tata, munu koo, winu koo, tawoplɛlawinu koo, mianénu koo, wo nya. Wo faa si tɛrɛ la tatata. Noé valé fɛnu faa lé wo ke a va ’yitagoro gi, wo saa ɛ vo.

²⁴ ’Yinu fan tɛrɛ la yi yɔ sɔrafié wɔlɛ vu.