Wepélisiananu 6 - Kazambale lé Sebe Sauunu 1979

Mi sɛrɛle

¹ Mi kɛlɛle di pélisia aan wo tɛrɛ la, wo nélomu yaa,

² yé Bale benu munu lunu ye, léé, wa nɔnɔmi, yé wo wo si ’wo nanu nya, é sɔ wo lɛ fɛan zo, a zo.

³ Yé Gakelebale léma: An léli ’ka dan vo lɛ mi gi yifaama lo. Munu a wimi nya é pla, yé wolé tɛrɛlalɛɛ é dan kɛlɛ lɛ sin yɔ suiɛdo.

⁴ ’Bɛ bléyi va, ’té gɔné glaliglalinu a tɛrɛ la. Yé ’bɛ zuo é ziin, dé Bale benu go munu lunu zuo, yé ’bɛnu né yaa wo lɛ, wolé nénu kɛlɛ nyanazannu nya, yé wo ɛ tɔ ye é li.

⁵ Gakelebale a ye léé, munu a weple kɛlɛna é baba tɛrɛ la, yé wolé gi bɔrɔle faa a gona wenaané saa va yi faa do do ma.

⁶ Gakelebale bli kyɛ dɔ yé a bli nɔla mi kɛlɛle ma tɛrɛ la.

⁷ Yé Gakelebale léé: Mɛmalé maa mi kɛlɛ tɛrɛ laa? Mi lé maa kɛlɛ bɛ, maa dan a si lɛ tɛrɛ la tata; yee koo, winu koo, tawoplɛlawinu koo, lagi mianénu koo, maa dan wo faa si lɛ tɛrɛ la tata.

⁸ Naa, Noé kɛlɛ mi zin nya Gakelebale yuɛ gi.

Noé ’yitagoro kɛlɛ

⁹ Noé lé nénu lé ke ’ko: Noé a mi zin nya, é a mi tegele nya ézé bléyi va. Noé tawoo Kazambale va.

¹⁰ Noé né yaa négɔné nya yaa. Sɛm koo, Sam koo, Jafɛt koo, woo lé.

¹¹ Tɛrɛ sɛrɛ Gakelebale yuɛ gi, yé glawe kɛlɛle sɔɔla tɛrɛ faa la.

¹² Gakelebale tɛrɛ nagini yé é a ye léé, é sɛrɛ; mi faa ébo lé tawobɛ sɛrɛ tɛrɛ la.

¹³ Yé Gakelebale lé Noé lɛ léé: Mi faa lé we nyaa; maa ɛ fe; naa, wo glawe kɛlɛle sɔɔla tɛrɛ faa la, amalé maa dan wo guru zana lɛ a gi, tɛrɛ boen koo é ziin.

¹⁴ ’Izé ’yitagoro kɛlɛ goféyili nya. ’I ’yitagoro gi bɔi kɔnnénu nya, yé ’i wele gié a gi valé a lala.

¹⁵ Bé kɛlɛ ’ko zo: ’yitagoro sangi ’é kɛlɛ mɛtrɛ yɔ sɔrafié wɔlɛ vu. A ’wuola ’é kɛlɛ mɛtrɛ yɔ do wɔlɛ soru. A wuo nwale ’é kɛlɛ mɛtrɛ vu ta soru.

¹⁶ ’I fɛnɛti do pa a ma, yé ’bɛ wuo nwale loru ’é kɛlɛ mɛtrɛ buu. ’I duoli do kɛlɛ a san do la. ’I kɔn yaa dɔ é ke nwiin a gi.

¹⁷ Maa dan lɛɛ blɛn zun lɛ tɛrɛ la, fɛ faa lé éé flin‐é la wuo, wo sɛrɛle we gi. Fɛnu faa lé ke tɛrɛ la, wo dan ga lɛ.

¹⁸ Naa, maa gi pa do i va. I dan wɔra lɛ ’yitagoro gi. Bii valé i benu koo, i na koo, i be nanu koo, ka faa lé.

¹⁹ Fɛ faa lé ke é yuɛma, ’i wo si fié fié gɔnɔ do do gi; ’i wo wɔra ’yitagoro gi yé wo vo é yuɛma i va. A gɔné ’é kɛlɛ do, yé a da ’é kɛlɛ do.

²⁰ Mianénu dɔgɔnɔ koo, flawinu dɔgɔnɔ koo, tawoplɛlawinu faa lé ke tɛrɛ la koo, wo gɔnɔ do do gi wo fié fié é dan da lɛ i va, i yuɛpale wo ta yé wo vo é yuɛma we gi.

²¹ Yé bii, fɛnu faa lé wa blé, bé si yé é vo é tadɔle i va, bii koo, wo koo, kalé fɛblele nya.

²² Yee lé Noé a kɛlɛ; we faa lé Bale a fe a lɛ, é a kɛlɛ.