Wepélisiananu 50 - Kazambale lé Sebe Sauunu 1979

Jakɔb gyɛbole

¹ Jozɛfu dia é ti yara, yé é wuvɔ a ta, yé é pwɛpwɛ vɔ a ma.

² Dɔtrɔnu lé wo alé nyanama paan bɛ, é lé wo lɛ léé: ’Ka an ti gale plaa, yé dɔtrɔnu Izraɛl gale plaa.

³ Wo vo a gale plaana fɔɔ yi yɔ fié. Yé Éjipiti munu a wuvɔ yi yɔ yaa wɔlɛ vu.

⁴ Gyɛboyinu gié aan wo, Jozɛfu Faraɔn muun pa élé kɔngimunu ta, yé é lé wo lɛ léé: Dé maa ka yuɛi bɔ, kalé zanté, ’ka go anlé muun nya Faraɔn va. ’Ka fe a lɛ léé,

⁵ an ti léé, an bale ’nyɔɔn ’é lɛ yé é léé, ’é a dana ga lɛ. Mipana lé ’é a lɔ Kanaan tɛrɛ la, ’maa ’é pa ana mi. Maa a a va léé, ’maa go ana, an ti pale we gi, yé an da é ziin. Yé wo go alé muun nya Faraɔn va.

⁶ Faraɔn lé a lɛ léé: ’I go, yé i ti pa bélé é léé, ’i bale ’nyɔɔn ’é lɛ fɛan zo, a zo.

⁷ Jozɛfu go é ti pa lɛ. Faraɔn wuomunu koo, alé kɔngimi segelenu koo, Éjipiti tɛrɛ la mi segelenu faa koo,

⁸ Jozɛfu lé kɔngimunu faa koo, a bwenu koo, a ti lé kɔngimunu koo, wo go a va. Nénu koo, ’blanu koo, dirinu koo, wo saa ɛ vo wo pa gi Gozɛn tɛrɛ la.

⁹ Goronu valé wisootazannu a Jozɛfu va é ziin, yé munu lé wo go a va, wa di.

¹⁰ Wo bɔ aan wo Atad lé ’sa sunwona, ’bɛ a Juudɛn yuu zi, wo wuvɔ plɛplɛ yé wo dére bɔ baa, yé Jozɛfu ’é ti gyɛ bo yi sɔrafié ’bɛna, a ti tɔ kɛlɛle blɛn we ma.

¹¹ Gyɛ lé wa bo Atad lé ’sa sunwona, Kanaan tɛrɛlamunu ana ye, yé wo léé: Yiba! gyɛ blɛn do bɔ Éjipiti munu va. Amalé ’sa sunwona ’ko lé ke Juudɛn yuu zi, wa tɔ pa Abɛl‐Misraim.

¹² Wo ti Jakɔb wo bélidɔ dérean nya, wa kɛlɛle lɛ sɔɔ yee ɛ zo.

¹³ Wo go a nya Kanaan tɛrɛ la, yé wa pa gɔmaguru lé é ke Makipéla féi, a gi. Yee lé Abraam a lɔ Et mi Éfrɔn lee ézé mipana nya, Mamré yara zia.

¹⁴ Jozɛfu nyaa aan wo é ti pale nya, ’bɛ zuo é go Éjipiti tɛrɛ la é ziin, yee valé é bwenu koo, munu faa lé wo go a va a ti pale we gi koo, wo nya.

¹⁵ Jozɛfu bwenu a ye aan wo léé, ’wo ti ga, wo léé: Dé ko za a Jozɛfu gi, yé wenyanénu faa lé ko kɛlɛ a lɛ, dé é dan wo lɛgi pa lɛ ko maa?

¹⁶ Yé wo lé Jozɛfu lɛ léé: I ti we fe é gale ’lɛ, yé é léma:

¹⁷ ’Ka fe Jozɛfu lɛ léma: Wenyané valé we lɛrɛlɛrɛnu lé i bwenu a kɛlɛ i lɛ, ilé zanté, ’i wo ma we vo ma. Wo wenyané kɛlɛ i lɛ weboen nya, naa, ilé zanté, ’i ti lé Bale wuomunu ma we vo ma. Jozɛfu dére ’ko ’ma aan wo, é wuvɔ.

¹⁸ A bwenu bozen da dia lɛ ’wo bli la a ’lɛ, yé wo léé: Ko a i wuomunu nya.

¹⁹ Jozɛfu lé wo lɛ léé: Kana ’é si ka gi ma. Maa ɛ Bale pagi siéé?

²⁰ Ka ’wuo gi bɔrɔ léé, ka wenyané kɛlɛ an lɛ. Kazambale a nɔla wezin nya, we lé a lɛ sɔɔ kyɔ ’ko, a kɛlɛle we gi, yé migɔnɔ kiɛre vo é yuɛma.

²¹ Té ka kana lo ma; maa dan ka pa lɛ, ka valé kalé nénu nya. Yé é wo tɔrɔ paa, we drɔɔ fele nya wo lɛ.

Jozɛfu gale

²² Jozɛfu nyana Éjipiti tɛrɛ la, yee valé é ti lé munu nya. É vo é yuɛma lɛɛ yɔ soru wɔlɛ vu.

²³ Jozɛfu Éfraim benu ye fɔɔ é bɔ a néné gɔnɔ yaazan ma. Yé Manasé be Makii benu tin Jozɛfu gane la.

²⁴ Jozɛfu lé é bwenu lɛ léé: An dan ga lɛ. Naa, Bale é dan bɔra lɛ ka va, yé é dan ka si lɛ tɛrɛ ’ko la, yé tɛrɛ lé Bale ’ébo ’nyɔɔn Abraam koo, Izak koo, Jakɔb koo, wo lɛ léé, ’é dan a nɔ lɛ wo lɛ bɛ, é dan go lɛ ka nya ’bɛna.

²⁵ Jozɛfu lé Izraɛl benu lɛ léé: Kazambale é dan bɔra lɛ ka va. ’Ka bale ’nyɔɔn an lɛ léé, ka dan an wɔlɛnu sia lɛ fɛkona yé ka go wo nya ka lee. Yé wo bale ’nyɔɔn.

²⁶ Jozɛfu lɛɛ kɛlɛ lɛɛ yɔ soru wɔlɛ vu, yé é ga. Wa gale plaa, yé wa gale pa kɛsu gi Éjipiti tɛrɛ la.