Wepélisiananu 49 - Kazambale lé Sebe Sauunu 1979

Jakɔb é benu drɔɔ vo balelawefele nya

¹ Jakɔb é benu laa yé é léé: ’Ka zén ékeva, yé we lé é dan bɔ lɛ ka ma é voéla, maa dan a fe lɛ ka lɛ.

² Jakɔb benu, ’ka zén ékeva yé ka tɔné dɔ; ’Ka tɔné dɔ ka ti Izraɛl lɛ.

³ Rubɛn, bii ɛ ke anlé né vininzan nya; Bii a anlé plɛplɛ nya, anlé pɛniɛ la né vininzan lé i nya. I tɔ mini, yé ilé plɛplɛ mini;

⁴ Naa, bii a yuɛgiblanzan nya bélé wɛyi zo; i ’ka dan kɛlɛ lɛ mi vininzan nya lo. Naa, i vɔ i ti lé yialafɛ ta, Iin, i vɔ anlé yialafɛ ta, yé bé tiri dɔ, azama.

⁵ Siméɔn valé Lévi a bwe valé zuané nya. Wolé gwɔunnu a migyɛfɛ naanénu nya.

⁶ We lé é dɔ wo ’wuo gi, té anbo vɔ ’bɛ gi lo. Dé wo zén ékeva, té an léli é kɛlɛ wo nya do lo. Naa, wo munu gyɛ ’wolé bliflile zi; Wo gi san ’wobo ma yé wo dirigɔnénu ganezi miinnu bɔi.

⁷ Wolé bliflile a é nyané amalé ’wo bale pa wo ma ma; Wo wɛwɛ a, yé wo bli ta a plɛplɛ, Amalé maa dan wo kini lɛ ékema Jakɔb va, Yé maa dan wo sɔɔla lɛ Izraɛl méléna.

⁸ Bii, Juda, i bwenu é dan i tɔ zin fe lɛ; I bɛ é dan dɔra lɛ i nyanézannu nwun zi; I ti benu é dan dia lɛ ’wo bli la i lɛ;

⁹ Juda a bélé golizra boroné lé É si ’élé wi gyɛna, a zo; an beoo an be! Éé gane plin‐an, yé éé yian bélé golizra zo, Bélé golizrada zo; de ɛ dan a nwa lɛɛ?

¹⁰ Plaminwiin soowolivwii ’ka dan si lɛ Juda lee pelo, Plaminwiin yili ’ka da si lɛ a gane worona lo Fɔɔ yé Siilo é da, ’bɛ gi léé, mi drɔɔ, Yé munu a lɛdɔma.

¹¹ É dan élé sokofale polu dɔ lɛ dɔrɔyili ma; É dan élé sokofaleda lé né polu dɔ lɛ dɔrɔyili zimanu ma; É dan élé varɔ zuru lɛ dɔrɔ va, É dan élé sɔ zuru lɛ dɔrɔporoyi sɔɔn va.

¹² Dɔrɔ é dan a yuɛ tana lɛ; Yé a suiɛ é dan kɛlɛ lɛ fu dirinyɔyi nya.

¹³ Zabulɔn é dan nyana lɛ wɛyi sɔnɔ, Fɛana lé ’yitagoronu éé dɔa, é dan nyana lɛ ana, Yé a glɛ é dan soi lɛ yé é bɔ Sidɔn ma.

¹⁴ Isakaa a bélé sokofale plɛplɛ zo; Éé yiaan winu lé kɔn gi.

¹⁵ É a ye léé, flinle a é zima Yé ana tɛrɛ a é zima, Amalé éé tuaan kɔné dɔle é nwiin we ma, Yé é vagɔɔli banwole nyi sié.

¹⁶ Dan é dan élé munu lé we ble lɛ Bélé Izraɛl bɛn do zo.

¹⁷ Dan é dan kɛlɛ bélé méné zo zi ta; É dan kɛlɛ lɛ bélé ménénwunnu zo zi kiéné ta, ’Té éé suiɛ dɔa wisoo gane tɛn ma Atazan diale é zuozia we gi.

¹⁸ Oo, Gakelebale, an bli a a lɛ léé, i dan an béli lɛ.

¹⁹ Munu lé gulidanfɛnu ke wo lee, wo dan guli dan lɛ Gad va; Naa, é dan wo kele lɛ, yé é wo zuo bin.

²⁰ Azɛɛ é dan fɛblele zima kɛlɛ lɛ Yé é dan minwiinmunu lé fɛ néné kɛlɛ lɛ.

²¹ Néfitali a bélé vɔlɛ zo éboma; Éé dére néné fé.

²² Yili lé a poro éé baan di, Jozɛfu a a bɛ zo; Yili lé a poro éé baan di, ’té é a ’yi sɔnɔ, é a bélé a bɛ zo; A bɛnu éé nwaan gɔrɔnu ta loru.

²³ Wa blifliwe kɛlɛ; wo sawɔlɛ vuli a va; Sadunmunu a zuo bin, a za nya ’wo gi.

²⁴ Naa, alé sa vo plɛplɛ, Naa, Jakɔb lé Bale plɛplɛ, Mitabinzan Bale, Izraɛl lé Gɔlɛ, A bɛ ɛ Jozɛfu bɛ dɔ plɛplɛ.

²⁵ I ti lé Bale é dan bɔ lɛ i va, Plɛplɛfaazan Bale lé zin zi, é dan i drɔɔ vo lɛ; É dan i drɔɔ vo lɛ lagi loru drɔɔ vole nya; É dan i drɔɔ vo lɛ ’yi wuo drɔɔ vole nya; É dan i drɔɔ vo lɛ nyɔ valé bɔn drɔɔ vole nya;

²⁶ Anlé i drɔɔ vole mini an yaamunu lé an drɔɔ vole ta, Fɔɔ yé é bɔ gɔnu lé wo ’ka zanaan monomono lo, wo nwiin. Drɔɔ vole ’konu faa ’é vo Jozɛfu nwiin; Mi lé é kɛlɛ mi blɛn nya é bwenu méléna, yee ɛ nwiin lé é vo.

²⁷ Bɛnjamɛn a bélé glau lé, éé mi wi kinié ékema, a zo. Wi lé é a gyɛ, éé a blé bladi, Wi lé é a ye, éé a gulian nyanadi.

²⁸ Izraɛl bɛn vu ta fié lé ke bɛ; ’bɛ zo lé wo ti wo drɔɔ vo. A yara a lé wo drɔɔ é vo fɛan zo do do, a zo lé é wo drɔɔ vo.

Jakɔb gale

²⁹ ’Bɛ zuo é lé wo lɛ léé: An dan go lɛ anlé munu va. ’Ka an pa an tinu va gɔmaguru lé ke Et mi Éfrɔn lé féi, a gi.

³⁰ Yee lé é ke Makipéla tɛrɛ la, Mamré yara zia, Kanaan tɛrɛ la. Tɛrɛ lé Abraam a lɔ Et mi Éfrɔn lee ézé mipana nya, yee lé.

³¹ Ana lé wo Abraam valé é na Sara pa; ana lé wo Izak valé é na Rébéka pa; ana lé an Léa pa.

³² Féi valé gɔmaguru lé ke ana, Abraam wo lɔ Et benu lee.

³³ Jakɔb nyaa aan wo é benu bélidɔle nya, é ’é gane wɔra ’é va ’élé yialafɛ ta, yé a lɛbo yé é go élé munu va.