Wepélisiananu 47 - Kazambale lé Sebe Sauunu 1979

Jakɔbnu nyana Gozɛn tɛrɛ la

¹ Jozɛfu go é ti dale we zuo fe lɛ Faraɔn lɛ, yé é léé: An ti valé an bwenu si Kanaan tɛrɛ la; wolé ’blanu koo, wolé dirinu koo, wolé fɛnu faa koo, wo da wo nya yé wo bɔ Gozɛn tɛrɛ la.

² Yé é ’é bwenu soru si, yé é go wo nagɔɔn lɛ Faraɔn lɛ.

³ Faraɔn lé wo lɛ léé: Ka panyanama a kaa? Wo lé Faraɔn lɛ léé: I wuozannu a ’blatabinzannu nya bélé ’wo tinu zo.

⁴ Yé wo lé Faraɔn lɛ é ziin léé: Lɔrɔ blɛn dɔ Kanaan tɛrɛ la yé i wuomunu lé ’blanu lé fɛblele ’ka ana é dɛrɛ lo, bɛwemalé ko da nyana lɛ tɛrɛ ’ko la, amalé ’i zi nɔ i wuomunu lɛ léé, ’wo nyana Gozɛn tɛrɛ la.

⁵ Faraɔn lé Jozɛfu lɛ léé: I ti valé i bwenu da i va.

⁶ Éjipiti tɛrɛ a i bɛ nya. Fɛ lé ana ke é zima é mini a pɔnénu ta, ’i ti valé i bwenu nyana ana ma. ’Wo nyana Gozɛn tɛrɛ la ma. Dé i gikinizannu ye wo va, ’i wo pla anlé trubɛnu nwiin.

⁷ Jozɛfu da é ti Jakɔb nya yé é a nagɔɔn Faraɔn lɛ. Yé Jakɔb Faraɔn drɔɔ vo.

⁸ Faraɔn lé Jakɔb lɛ léé: Ilé tɛrɛlalɛɛ faa a nɔɔ?

⁹ Jakɔb lé Faraɔn lɛ léé: An giélɛɛ faa a lɛɛ yɔ suiɛdo wɔlɛ vu. Anlé tɛrɛlalɛɛnu ’ka di lo yé wa lɛɛ lɛrɛlɛrɛnu nya. Wo ’ka bɔ lɛ an tranu gié tɛrɛlalɛɛ nya ékema lo.

¹⁰ Jakɔb Faraɔn drɔɔ vo é ziin, yé é si Faraɔn va.

¹¹ Jozɛfu tɛrɛ nɔ é ti valé é bwenu lɛ Éjipiti tɛrɛ la, fɛ lé ana ke é zima é mini fɛna faa ta Ramzɛs lé fɛna zia, yee lé, Faraɔn a fe fɛan zo, a zo.

¹² Jozɛfu fɛblele nɔ é ti valé é bwenu lɛ. É a nɔ é ti lé munu faa lɛ, nénu ’léé a fɛan zo, a yɛrama.

Jozɛfu fɛ faa ye Faraɔn zé nya

¹³ Lɔrɔ dɔle kɛlɛ plɛplɛ é baba, amalé fɛblele ’ka tɛrɛ do kpen ta é ziin lo. Éjipiti tɛrɛ la munu valé Kanaan tɛrɛ la munu kɛlɛ ’yiayiané lɔrɔ lé we ma.

¹⁴ Gɔɔli lé ke Éjipiti tɛrɛ la valé Kanaan tɛrɛ la, Jozɛfu a faa zén ékeva ’sa lɔle a lee we ma, yé é goan Faraɔn lé kɔn gi.

¹⁵ Éjipiti tɛrɛ la valé Kanaan tɛrɛ la gɔɔli faa nyaa aan wo, Éjipiti munu da Jozɛfu va yé wo léé: ’I koé fɛblele nɔ. Mɛmalé ko gaan i yuɛ vaa? Naa, gɔɔli nyaa ko lee.

¹⁶ Jozɛfu léé: Dé gɔɔli nyaa, ’ka kalé trubɛnu nɔ yé maa fɛblele nɔ ka lɛ ’bɛ ma.

¹⁷ Wo da wolé trubɛnu nya Jozɛfu lɛ, yé Jozɛfu fɛblele nɔ wo lɛ wisoonu koo, ’blanu koo, dirinu koo, sokofalenu koo, wo va. ’Bɛ zo lé é fɛblele nɔ wo lɛ ’bɛ lɛɛ gi wolé trubɛnu va.

¹⁸ Dé ’bɛ lɛɛ ’ko gié, wo da Jozɛfu va lɛɛ bɛ gi, yé wo léé: Ko ’ka we yɔɔma kozan ma lo, kolé gɔɔli nyaa; yé ko da trubɛnu nya anzan lɛ é kyɛn; kolé tɛrɛnu valé koboen ɛ vo kozan bɛan sin.

¹⁹ Mɛmalé ko valé kolé tɛrɛnu é gaan i yuɛ vaa? ’I kobozen valé kolé tɛrɛnu lɔ fɛ ma, yé ko koo, kolé tɛrɛnu koo, ’ko vo anzan zé nya. ’I ’sa nɔ ko lɛ, yé ko a vɔ, yé ko vo é yuɛma, ’té ko ’ka gaan lo ma; té kolé tɛrɛnu gi é vo é pla lo ma.

²⁰ Lɔrɔ wo tunu, bɛwemalé Éjipiti munu ’wolé féi dan do do, yé Jozɛfu Éjipiti tɛrɛ faa lɔ Faraɔn zé nya, yé ana tɛrɛ faa kɛlɛ Faraɔn zé nya.

²¹ É flamunu nɔla luu nya, é sia Éjipiti tɛrɛ glɛ ’ko la fɔɔ yé é bɔ a glɛ koɛ ta.

²² Naa, é ’ka balebanzannu lé tɛrɛ lɔ lɛ lo. Faraɔn lé bélidɔwe do lé ke léé, balebanmunu ’wolé fɛ lɔgɔɔli yé Faraɔn va, bɛwemalé wo ’ka ’wolé tɛrɛnu dan lɛ lo.

²³ Jozɛfu lé munu lɛ léé: Maa ka valé kalé tɛrɛnu lɔ kyɔ Faraɔn zé nya. Kalé ’sawɔlɛ lé ke ’ko: ’ka goan ’ka a vɔ.

²⁴ Dé ’sagyɛbléyi pa, dé a bɔlɔ a soru, ka dan a do nɔ lɛ Farɔn lɛ ma, yé a ziɛn ’é vo kazé nya ma, a vɔfɛ valé blefɛ nya, ka koo, kalé nénu koo, ka mamunu koo, kalé fɛblele nya.

²⁵ Wo léé: I ko béli! ’Ko kɛlɛ mi zinnu nya kozan yuɛ gi ma, yé ko dan kɛlɛ lɛ Faraɔn lé luunu nya.

²⁶ Jozɛfu we ’ko kɛlɛ bélidɔwe nya yé é vo a zo yifaama fɔɔ kyɔ; dé Éjipiti tɛrɛnu fɛnu dɔ, dé wa ye bɔlɔ soru, yé a do ’é vo Faraɔn zé nya, yé a ziɛn ’é vo munu zé nya. Tɛrɛ faa a Faraɔn zé nya; balebanmunu lé tɛrɛ do ɛ ’ka azé nya lo.

²⁷ Izraɛl munu nyana Éjipiti tɛrɛ bɛ do la, yee lé ke Gozɛn tɛrɛ nya. Wo fɛnu ye di, yé wo fan, yé wo kɛlɛ di.

²⁸ Jakɔb lɛɛ kɛlɛ Éjipiti tɛrɛ la vu ta sɔrafié yé alé tɛrɛlalɛɛ faa kɛlɛ yɔ sɔrafié wɔlɛ sɔrafié.

²⁹ Izraɛl gale bɔ aan wo é pu, é ’é be Jozɛfu laa yé é lé a lɛ léé: Dé maa i yuɛi bɔ, ilé zanté, ’i bɛ wɔra an boro wuo, yé i wezin kɛlɛ an lɛ yé i kɛlɛ yarapawelazan nya anlé we ma. Té i an pa Éjipiti tɛrɛ la lo.

³⁰ Dé an yi gyɛ an tranu va, ’i an si Éjipiti tɛrɛ la yé ’i an pa an tranu pana. Jozɛfu léé: Maa dan i dére tawe kɛlɛ lɛ.

³¹ Jakɔb léé: ’I bɛ nwa Bale lɛ a ma. Yé é bɛ nwa Bale lɛ. Yé Izraɛl bua élé yialafɛ ta é ’wuo vɔna zia.