Wepélisiananu 45 - Kazambale lé Sebe Sauunu 1979

Jozɛfu ébo gɔɔn é bwenu lɛ

¹ Jozɛfu ’ka bɔa ébo kunle lɛ ’é zimunu yuɛ va é dɛrɛ lo. Yé é siaa léé: ’Ka munu faa bɔra béera. Mi do kpen ’ka vo lɛ Jozɛfu va lo aan wo, é ’ébo nagɔɔn ’é bwenu lɛ.

² Yé é siaa wuvɔ dére plɛplɛ nya yé Éjipiti munu a ’ma, yé Faraɔn lé kɔngimunu a ’ma.

³ Jozɛfu lé é bwenu lɛ léé: Maa a Jozɛfu nya. An ti a é yuɛma é ziin? Naa, é pa a bwenu ma gibɔrɔ blɛn nya yé kwakwa vɔ wo ta, awemalé wo ’ka bɔa we do fele lɛ a lɛ lo.

⁴ Jozɛfu lé é bwenu lɛ léé: ’Ka bié an sɔnɔ. Yé wo bié. Yé é léé: Maa a ka zuané Jozɛfu nya. Maa lé ka an dan munu lee yé wo da an nya Éjipiti tɛrɛ la.

⁵ Kazambale an pa zia ka ’lɛ, ka bélile we gi. Amalé sin, té we ’ko é ’na ka ma lo. Té ka bli fli kabo ma an danle yé wo da an nya ’ko we ma lo.

⁶ Lɔrɔ dɔ tɛrɛ la a lɛɛ fié lo. É vo é ziin lɛɛ soru yé ’savɔle valé ’sagyɛle ’ka dan kɛlɛ lɛ lo.

⁷ Kazambale an pa zia ka ’lɛ, ka vole é yuɛma tɛrɛ la we gi, ka sile we blɛn gi yé ka béli we ma.

⁸ Ka‐an ka an pa zia ’ko lo; naa, Kazambale ɛ kɛlɛ. É an kɛlɛ Faraɔn ti nya; é an kɛlɛ alé kɔngimunu faa zan nya, yé é an kɛlɛ é ziin Éjipiti tɛrɛ faa tere ta gbɔrɔnama nya.

⁹ ’Ka go an ti va fiéfié é ziin, yé ’ka fe a lɛ léma: I be Jozɛfu léma: Bale ’é kɛlɛ Éjipiti munu faa zan nya; ’i da ’é va ma; té i mɔn lo.

¹⁰ I dan nyana lɛ Gozɛn tɛrɛ la; i dan kɛlɛ lɛ ’é sɔnɔ, bii koo, i benu koo, i benu ’é benu koo, ilé ’blanu koo, ilé dirinu koo, fɛnu faa lé ke i lee koo, wo nya.

¹¹ Ana mi, é dan fɛblele nɔ lɛ i lɛ; lɔrɔdɔlɛɛ vo é ziin soru, yé ’bɛ zo lé bii koo, ilé kɔngimunu koo, fɛnu faa lé ke i lee koo, ka ’ka dan zamaga wo lɛ lo.

¹² Ka ye ka yuɛ nya, yé an zuané Bɛnjamɛn a ye ’é yuɛ nya léé, maabozen ɛ ke we fena ka lɛ.

¹³ Fua faa lé maa a ble Éjipiti tɛrɛ la koo, wenu faa lé ka ye ka yuɛ nya koo, ’ka wo zuo fe an ti lɛ. Yé ’ka da an ti nya é kele.

¹⁴ Yé Jozɛfu é zuané Bɛnjamɛn tuu gyɛ yé é wuvɔ a bɔrɔ ma, yé Bɛnjamɛn ’é wuvɔ a bɔrɔ ma.

¹⁵ Yé é ’é bwenu faa tuu gyɛ wuvɔle nya. ’Bɛ zuo a bwenu vo glewona a va.

¹⁶ Jozɛfu bwenu dale glewole sɔɔla Faraɔn lé kɔn gi, yé é sɔ Faraɔn valé é wuomunu lɛ.

¹⁷ Faraɔn lé Jozɛfu lɛ léé: Bé fe i bwenu lɛ léma: ’wa kɛlɛ ’ko zo ma; ’wo kɔné vɔ wolé winu punu, yé ’wo go Kanaan tɛrɛ la.

¹⁸ ’Wo wo ti valé wo gɔnɔlamunu sia, yé ’wo da an va ma. Fɛ lé ke é zima é mini fɛ pɔnénu faa ta Éjipiti tɛrɛ la, maa dan a nɔ lɛ wo lɛ, yé wo dan Éjipiti tɛrɛ la fɛnyɔnɔzan ble lɛ.

¹⁹ Bé fe wo lɛ léma: ’wa kɛlɛ ’ko zo ma: ’wo Éjipiti tɛrɛ la goronu si wolé nénu valé wo nanu zé nya ma. ’Wo go ’wo ti si yé wo da ze.

²⁰ Té wo bli kyɛ é dɔ fɛnu lé wo vo wo zuo, wolé we ma lo. Fɛ lé é ke é zima é mini fɛ pɔnénu faa ta Éjipiti tɛrɛ la, é dan kɛlɛ lɛ wozé nya.

²¹ Izraɛl benu a kɛlɛ a zo. Jozɛfu goronu nɔ wo lɛ Faraɔn dére ta, yé é zia fɛblele nɔ wo lɛ é ziin.

²² Yé é sɔ gi vɔɔ sɔnu nɔ wo lɛ do do, yé é gɔɔli fu sikla wuru do yɔ soru nɔ Bɛnjamɛn lɛ yé é sɔ givɔɔ sɔnu nɔ a lɛ soru.

²³ Sokofale vu lé Éjipiti tɛrɛ la fɛ zinzinnu ke wo punu koo, sokofaleda vu lé ’sa valé buru valé fɛblele ke wo punu a ti lé zia fɛblele nya koo, Jozɛfu wo pa é ti lɛ zia.

²⁴ ’Bɛ zuo yé é ’é bwenu yai vɔ yé wo go. Yé é lé wo lɛ léé: Té ka we sia zia lo.

²⁵ Wo si é ziin Éjipiti tɛrɛ la, yé wo bɔ Kanaan tɛrɛ la wo ti Jakɔb va.

²⁶ Wo lé a lɛ léé: Jozɛfu a é yuɛma tan. Yee ɛ ke é plale Éjipiti tɛrɛ faa nwiin. É dɔ a gi léé, we lé wa fena é ’ka webozen nya lo, bɛwemalé a gi ’ka nana lɛ lo.

²⁷ Dére faa lé Jozɛfu a fe wo lɛ, wa zuo fe a lɛ. Goronu lé Jozɛfu wo pa zia a siale we gi, é wo ye. Yé wo ti Jakɔb léli fuu dɔ é ta é ziin,

²⁸ yé Izraɛl léé: É nyaa sin. An be Jozɛfu a tan é yuɛma. ’Maa go yé ’maa a ye faa yé an ga.