Wepélisiananu 44 - Kazambale lé Sebe Sauunu 1979

Jozɛfu é bwenu gi dan

¹ Jozɛfu we fe ’é leezan lɛ léé: ’I fɛ pa munu ’konu lé pulunu gi wolé kɔné sibɛ yɛrama. Yé ’i wo faa do do lé gɔɔli pa wolé pulunu gi.

² Yé anlé ’yiminikana lé ke gɔɔlifu kana nya bɛ, bé pa wo zuané lé pulu gi, ’é valé alé ’sa ma gɔɔli nya. We lé Jozɛfu a fe, a leezan a kɛlɛ.

³ Bladi, tu kini bléyi va, wo zi nɔ munu ’konu lɛ yé wo go ’wolé sokofalenu nya.

⁴ Wo si fla yé wo ’ka tan bɔ lɛ baa lo. Yé Jozɛfu lé ’é leezan lɛ léé: ’I nwa, ’i go munu ’konu zuo. Dé bé dɔ wo ma bé fe wo lɛ léé: Mɛmalé ka wezin lɛgi pa wenyané nyaa?

⁵ Kana lé anzan éé ’yi minian a gi, ’té ébo ma we yé a gi, é ’ka ka lee loo? We ’ko ma, ka kɛlɛ naané.

⁶ Jozɛfu leezan a dɔ wo ma yé é we ’konu fe wo lɛ.

⁷ Yé wo lé a lɛ léé: Mɛwemale anzan we ’ko zo fe ko maa? Bale ’é dɔ ’é wuomunu zi, té wo ’bɛ zoɛ we kɛlɛ lo ma.

⁸ Gɔɔli lé ko a ye é vinin kolé pulunu gi, ko ’ka si lɛ a nya Kanaan tɛrɛ la yé ko da a nya i lɛ é ziin loo? Dé gɔɔli léoo, dé kyan léoo, ko kɛla kaa yé ko a sia kyeen nya izan lé kɔn gii?

⁹ Dé i kana ’ko ye i wuomian nwiin, ’bɛzan ’é ga ma, yé kobozen ’ko kɛlɛ kozan lé luunu nya ma.

¹⁰ Yé é léé: ’É kɛlɛ ka dére ta ma. Dé wo kana ye mianzan nwiin, ’bɛzan ’é kɛla anlé luu nya, ’té we ’ka ka mi pɔnénu nwiin lo.

¹¹ Tɔɔn, wo ’wolé pulunu zun tɛrɛ va do do, yé wa gi fuo do do.

¹² Jozɛfu leezan wo nwiinnu gini. É a pélisia wo vininzan ta yé é a ’wuo pla wo voélazan ta. Yé é kana ye Bɛnjamɛn lé pulu gi.

¹³ Wo ’wolé sɔnu fia yé wo kɔné pa ’wolé sokofalenu punu, yé wo nɔla wo pa gi fla zia.

¹⁴ Juda valé é zuanénu bɔ Jozɛfu lé kɔn ’léé, ’té é ana ’bɛna tan, yé ’wobo dia tɛrɛ va a ’lɛ.

¹⁵ Jozɛfu lé wo lɛ léé: Mɛ we lé ka a kɛlɛ bɛɛ? Ka ’ka a gi dɔɔa léé, an zo mi éé fɛna yé loo?

¹⁶ Juda lé a lɛ léé: Mɛ we lé ko fé anzan lɛɛ? Ko we fé kaa? Ko kolé we kɛla tegele kaa? Kazambale i wuomunu lé weplenu ye. Anzan lé luunu lé ke ko nya ’ko; ko koo, mi lé wo kana ye a nwiin koo, ko lé.

¹⁷ Yé Jozɛfu lé wo lɛ léé: Bale ’é ’bɛ yi ga an lee ma. Mi lé wo kana ye a nwiin, é dan kɛlɛ lɛ anlé luu nya, yé ’kaanu, ’ka go ka ti va drɔɔ ma.

¹⁸ Yé Juda bié Jozɛfu sɔnɔ yé é léé: Anzan, ilé zanté. ’I tɔné dɔ i wuozan lɛ ma, ’é we do fe ’ézan lɛ ma; té a bli é fli ’é wuozan ma monomono lo ma. Bii a bélé Faraɔn zo.

¹⁹ É vinin, anzan we laa ’é wuomunu lee léé, ka ti anaa? ka zuané aa?

²⁰ Yé ko léé, ko ti ana. É a kwakwa, yé ko zuané kiéné do ana, alé kwa ta né nya. Né ’ko bwe do a, yé é ga. Wo fiénu bu a do. É vo é do, yé a we a é ti lee.

²¹ Bii lé é vinin i wuomunu lɛ léé, ’ka da a nya ’é va, yé ’é a ye ’ébo yuɛ nya.

²² Ko lé anzan lɛ léé, né ’ka bɔa sile lɛ é ti va lo. Dé é si a va, a ti ’é gaan.

²³ Bii lé i wuomunu lɛ léé, dé ka zuané ’ka da lɛ ka va lo, ka ’ka dan ’é yara néné ye lɛ é dɛrɛ lo.

²⁴ Ko go aan wo i wuozan, an ti va, yé ko anzan dérenu fe a lɛ.

²⁵ Ko ti léé, ’ka go é ziin, ’ka fɛblele kiéné lɔ ko lɛ.

²⁶ Yé ko léé, ko ’ka bɔa gole lɛ lo. Naa, dé ko zuané ’ka ko va lo, ko ’ka mi ’ko yara néné yé lo. Dé é a lé ko zuané a ko va, ko dan go lɛ.

²⁷ I wuozan ko ti lé ko lɛ léé, ka gi dɔɔ léé, an na négɔné fié yaa an lɛ.

²⁸ A do si anlé kɔn léé yé maa ’ka a ye lɛ é ziin lo fɔɔ kyɔ, amalé é dɔ an gi léé, winu a wi kini ékema.

²⁹ Dé ka mi ’ko si é ziin an lee yé wenyané bɔ a ma, ka dan an gyɛ lɛ an be lé gibɔrɔ nya, yé an dan go lɛ nyané blele nya an tranu zuo, gamunu nyanana.

³⁰ Sin, dé ko go é ziin i wuozan an ti va, ’té né lé a we ke a lee kaii bɛ, dé é ’ka ko va lo,

³¹ dé an ti a ye léé, né ’ka ko va lo, é dan ga lɛ. Yé i wuomunu lé we ma lé i wuozan, ko ti, é dan go lɛ nyané blele nya ’é tranu zuo, gamunu nyanana.

³² I wuozan ébo dɔ ’é ti lɛ né pa gi yé maa lé an ti lɛ léé, dé maa ’ka da lɛ a nya i lɛ é ziin lo, ’té a we a an nwiin lɛɛfaama an ti va.

³³ Amalé, ilé zanté. ’An vo né pa gi anzan lé luu nya ma. Yé nézan valé é bwenu ’é go ma.

³⁴ Dé né ’ka an va lo, an kɛla kaa yé an go é ziin an ti vaa? Yiba! Té maa an ti lé nyanéblele ye lo ma.