Wepélisiananu 43 - Kazambale lé Sebe Sauunu 1979

Jozɛfu bwenu go ’sa lɔ lɛ é ziin

¹ Yé lɔrɔ dɔle kɛlɛ tɛrɛ la plɛplɛ.

² ’Sa lé wo si a nya Éjipiti tɛrɛ la, wo nyaa aan wo ’bɛ blele nya, Jakɔb lé é benu lɛ léé: ’Ka go fɛblele sɛné lɔ ko lɛ é ziin.

³ Juda lé a lɛ léé: Mi ’ko we fe ko lɛ é yara tɔntɔn nya léé, dé ko zuané ’ka ko va lo, ko ’ka dan ’é yara néné ye lɛ lo.

⁴ Dé é sɔ i lɛ léé, i ko zuané nwunvɔ ko va, ko dan go lɛ, yé ko dan fɛblele lɔ lɛ i lɛ.

⁵ Mi ’ko lé ko lɛ léé, dé ko zuané ’ka ko va lo, ko ’ka dan ’é yara néné ye lɛ lo, bɛwemalé dé é ’ka sɔ lɛ i lɛ léé, bé pa ko va lo, ko ’ka goo monomono lo.

⁶ Yé Izraɛl léé: Mɛmalé ka wenaané kɛlɛ an lɛ yé ka fe mi ’ko lɛ léé, ’wo zuané do ana é ziin?

⁷ Wo léé: Mi ’ko é ko valé ko gɔnɔlamunu lé we laa ko lee. Yé é lé ko lɛ léé: Ka ti a é yuɛma é ziin? Ka zuané do aa? Yé wenu lé é a laa ko lee, ko wo gi fe a lɛ. Dé é dan a fe lɛ léé, ’ko da ko zuané nya, ’naan, ko ’bɛ gi dɔɔ kaa?

⁸ Juda lé é ti Izraɛl lɛ léé: ’I zi nɔ né lɛ, ’é go an va yé ko nwa yé ko go ma, yé ko koo, bii koo, kolé nénu koo, yé kaa vo é yuɛma ma, yé kaa ’ka gaan lo.

⁹ Maa anbo dɔ i lɛ, bé ma laa é ziin an lee. Dé an ’ka da lɛ a nya i lɛ é ziin lo, dé maa ’ka a dɔ lɛ i ’lɛ lo, bé we dɔ an nwiin lɛɛfaama ma.

¹⁰ Dé ko ’ka kɔɔn mɔn lɛ lo, ’té ko nɔla ko pa gi é ziin gɔnɔ fié.

¹¹ Wo ti Izraɛl lé wo lɛ léé: An ’ka bɔa we ’ko lɛ lo. ’Ka kɛlɛ ’ko zo: ka tɛrɛ ’ko la fɛ zinnu si; ’ka a zén kalé pulunu gi yé ’ka go wo nya gɔné ’ko lɛ a blan nya: baumélia kiéné koo, zɔrɔnyɔnɔ kiéné koo, zianbla ginzannu koo, mirélia koo, bɛɛ koo, amandé koo, woo lé.

¹² Gɔɔli lé ka si é kyɛn, ’ka ’bɛ gɔɔli zoɛ’léé fié si yé ka go a nya ka lee, yé gɔɔli lé wa pa ’sa ta loru kalé pulu gi, ’ka go ’bɛ nya é ziin. Dé wo saan é woo?

¹³ ’Ka ka zuané si yé ’ka nwa; ’ka go gɔné ’ko va.

¹⁴ Plɛplɛfaazan Bale ’é ka kɛlɛ mi zinnu nya mi ’ko yuɛ gi ma; ’é daan ka bwe koɛzan valé Bɛnjamɛn ma, yé ’wo da é ziin ka va ma. Yé maa, dé anlé nénu vuru an ma, ’té an vuru é wo wo gi.

¹⁵ Wo blanfɛ si; gɔɔli’léé kyɛn lé ke wo lee, wo ’bɛ gɔɔli zoɛ’léé fié si, ’é valé Bɛnjamɛn nya. Wo nwa, yé wo go Éjipiti tɛrɛ la, yé wo dɔ Jozɛfu ’lɛ.

¹⁶ Jozɛfu Bɛnjamɛn ye wo va tɔɔn, é lé ’é leezan lɛ léé: ’I munu ’ko wɔra kɔn gi; ’i wi gyɛ yé bé dɔne; munu ’konu é dan fɛ ble lɛ an va é yiéyi.

¹⁷ We lé Jozɛfu a fe, mi ’ko a kɛlɛ. É go munu ’konu nya Jozɛfu lé kɔn gi.

¹⁸ Dé wo go wo nya Jozɛfu lé kɔn gi, kana zén wo gi, yé wo léé: Gɔɔli lé wa pa kolé pulunu gi é kyɛn, alé we ma lé wo da ko nya kɔn gi, weblele ko va yé wo kle pa ko ta we ma lé; ko kɛlɛle luunu nya yé wo kolé sokofalenu si ko lee we ma lé.

¹⁹ Wo bié Jozɛfu lé kɔn ’léé munu nwiinzan sɔnɔ, yé wo we fe a lɛ kɔn ’léé,

²⁰ yé wo léé: Anzan, ilé zanté. Ko da é vinin fɛblele lɔ lɛ gɔnɔ do.

²¹ Ko bɔ zia, yé ko yii fɛana, ko kolé pulunu lɛ so, ’té ko faa lé gɔɔlinu a ’sa ta kolé pulu gi do do, wa pɛzéwo fɛan zo, a’léé yɛrama. Ko da a nya ko lee é ziin.

²² Ko da gɔɔli bɛnu nya ko lee é ziin, fɛblele lɔle we gi. Mianzan kolé gɔɔlinu pa kolé pulunu gi, ko ’ka azan dɔɔa lo.

²³ Jozɛfu leezan lé wo lɛ léé: ’Ka vo drɔɔ ma. Té ka kana we do lee lo. Kazambale lé ke ka ti lé Bale nya, yee ɛ fɛwezan nɔ ka lɛ kalé pulunu gi. An kalé gɔɔli ye. Yé é da Siméɔn nya wo lɛ.

²⁴ Gɔné ’ko é wo wɔra Jozɛfu lé kɔn gi. É ’yi nɔ wo lɛ yé wo ’wo gane ma zuru a nya. Yé é fɛblele nɔ wolé sokofalenu lɛ é ziin.

²⁵ Wa fe wo lɛ kɔɔn léé, wo dan fɛ ble lɛ Jozɛfu va, bɛwemalé wo blannu ma’lɛrɛ yé wo Jozɛfu dale é yiéyi lɛbɛn.

²⁶ Jozɛfu bɔ an wo kɔn’léé, blannu lé wo da a nya, wa nɔ a lɛ. Yé wo dia ’wo bli la tɛrɛ va a ’lɛ.

²⁷ Yé é lé wo lɛ léé: Ka a drɔɔ? Ka ti kwakwa lé, ka alé we fe an lɛ é kyɛn, é ana é ziin drɔɔ? É a tan é yuɛmaa?

²⁸ Yé wo léé: I wuozan, ko ti, a drɔɔ; é a tan é yuɛma. Yé wo ’wuo tua a lɛ, yé wo dia ’wo bli la a ’lɛ.

²⁹ Jozɛfu é yara nwa yé é ’é zuané, ’é bu lé né Bɛnjamɛn nagini. Yé é léé: Ka zuané lé, ka alé we fe maa lɛ, yee lé ke bɛɛ? Yé é a taa fe é ziin léé: An be, Bale i drɔɔ vo ma.

³⁰ A zuané lɔrɔ a a gyɛna a bli gi kaii, yé é a a va léé, ’é wuvɔ. Yé é go kɔnné do gi fiéfié, yé é wuvɔ ’bɛna.

³¹ A zuo é ’é yara foli, yé é bɔra, yé é ébo kun plɛplɛ yé é vo é tadɔle yé é léé: ’Ka da fɛ nya.

³² Wo Jozɛfu zé fɛ nɔ é yɛrama; wo a bwenu zé nɔ é yɛrama, yé Éjipiti munu lé woo fɛ blé a va, wo ’bɛnu zé nɔ é ziin é yɛrama. Éjipiti munu ’ka fɛ blé Ébrunu va lo. ’Bɛ a we lɛrɛlɛrɛ nya wo yuɛ gi.

³³ Jozɛfu bwenu nyana é ’lɛ, ’é vinin ma vinin ma, a se a a vininzan lɛ fɛan zo, a zo; yee lé wa yaa é voéla, é nyana wo nyaana nya. Yé wo vo wo ke naginina gi vurule nya.

³⁴ Fɛblele lé ke Jozɛfu ’lɛ, é a pa zia wozé nya. Yé Bɛnjamɛn zé mini wozé ta gɔnɔ soru. Yé wo dɔrɔ mini, yé wo gi nana a va.