Wepélisiananu 42 - Kazambale lé Sebe Sauunu 1979

Jozɛfu bwenu go Éjipiti tɛrɛ la

¹ Jakɔb a ’ma léé, ’sa ana Éjipiti tɛrɛ la. Yé é lé é benu lɛ léé: Mɛmalé ka vo ka ke nagininaa?

² Yé é léé: Maa ’ma léé, ’sa ana Éjipiti tɛrɛ la. ’Ka go ana, kaazé lɔ, kaa vole é yuɛma we ma, yé kaa ’ka gaan lo.

³ Jozɛfu bwe vu go Éjipiti tɛrɛ la, ’sa lɔle we gi.

⁴ Jakɔb ’ka Jozɛfu zuané Bɛnjamɛn pa lɛ wo va lo, dé wenyané do é da bɔ a ma.

⁵ Lɔrɔ dɔ Kanaan tɛrɛ la yé Izraɛl benu go ’sa lɔ lɛ, ’té tɛrɛ bɛ ta munu é go é ziin, ’té wo go ’bɛnu nya.

⁶ Jozɛfu a é plale tɛrɛ nwiin, yee ɛ ’sa daan munu faa lee. Jozɛfu bwenu da, yé wo dia ’wo bli la a ’lɛ, ’té wo yara a tɛrɛ va.

⁷ Jozɛfu é bwenu ye, yé é wo dɔɔ, naa, é ’ébo ta yɔɔ wo ma yé ébo kɛlɛ bɛn bɛ zo. É we fe wo lɛ yara plɛplɛ nya yé é lé wo lɛ léé: Ka si kyɛɛn? Wo lé a lɛ léé: Ko si Kanaan tɛrɛ la, yé ko da fɛblele lɔ lɛ.

⁸ Jozɛfu é bwenu dɔɔ, naa, a bwenu ’ka a dɔɔ lɛ lo.

⁹ Nyɛnu lé Jozɛfu a gyɛ, ’té a bwenu lé we ke a gi, a sele dɔ a gi. Yé é lé wo lɛ léma: Mimavɔɔzannu lé ke ka nya. Fɛana lé tɛrɛ ke é tuale, ka da a nagini lɛ.

¹⁰ Wo lé a lɛ léé: Anzan, gba. I wuomunu da ’sa lɔ lɛ.

¹¹ Mi do benu lé ko faa nya; ko a mi tegelenu nya; i wuomunu ’ka mimavɔɔzannu nya lo.

¹² Yé é lé wo lɛ léé: É ’ka ’bɛ zo lo. Fɛana lé tɛrɛ ke é tuale, ka da a nagini lɛ.

¹³ Yé wo lé a lɛ léé: Ko, i wuomunu ’ko, ko a gɔné vu ta fié, Kanaan tɛrɛlami do benu nya; ko zuané a kyɔ ko ti va mi, yé a do ’ka ana é dɛrɛ lo.

¹⁴ Jozɛfu lé wo lɛ léé: Maa a fe ka lɛ lao léé, ka a mimavɔɔzannu nya.

¹⁵ Maa dan ka gi dan lɛ fɛan zo, yee lé ke ’ko: Faraɔn tɔ gi, ka ’ka dan bɔra lɛ ’ko pelo fɔɔ, ’té ka zuané da é wo.

¹⁶ ’Ka ka va mi do pa zia, ’é go ka zuané si, ’é da a nya, yé ka mi pɔnénu, ’ka vo bokɔn gi. Maa dan ka dére gi dan lɛ, yé dé weboen lé ka a fee? maa dan a gi dɔɔ lɛ. Dé ’bɛ kaan lo, Faraɔn tɔ gi, mimavɔɔzannu lé ka nya.

¹⁷ Yé é wo faa vɔ bokɔn gi yi yaa.

¹⁸ A yi yaazan nya, Jozɛfu lé wo lɛ léé: An kanaan Bale lee. ’Ka kɛlɛ ’ko zo yé ka vo é yuɛma.

¹⁹ Dé ka a mi tegelenu nya, ka bwe do ’é vo é vɔle bokɔn gi yé ’ka go ’sa nya ka lé munu lé fɛblele nya.

²⁰ Yé dé ka a dana, ’ka da ka zuané nya, yé maa a gi dɔɔ léé, ka dére a tegele; yé ka ’ka dan ga lɛ lo. Yé wa kɛlɛ a zo.

²¹ Yé wo lé wo ke lɛ léé: Iin, weboen lé, we lé ko a kɛ lɛ ko zuané lɛ, é ko gyɛ. Ko aboen lé nyané blɛn blele ye; é léé, ’ko nyanai zén ’é ta, yé ko ’ka ko tɔné dɔ lɛ a lɛ lilo. Awemalé we tɔntɔn ’ko bɔ ko ma.

²² Rubɛn lé wo lɛ léé: Maa ’ka a fe lɛ ka lɛ yi la léé, té ka wenyané kɛlɛ né ’ko lɛ lo loo? Yé ka ’ka tɔné dɔ lɛ an lɛ lilo. Yé ka ye, wa nyɛ ma laa sin.

²³ Dé Jozɛfu we fe wo lɛ é danamla dɔ yee valé wo méléna, amalé wo ’ka a gi dɔɔa léé, éé wo dére maan lo.

²⁴ Jozɛfu si wo ma baa, wuvɔle we gi. É da é ziin, yé é we fe wo lɛ. ’Bɛ zuo yé é Siméɔn si wo va, yé wa yere foliɛwɔlɛbale nya wo yuɛ va.

²⁵ Jozɛfu lé munu lɛ léé, ’wo wolé pulunu fan ’sa nya, yé ’wo wolé gɔɔli pa é ziin wolé pulunu gi do do, yé ’wo zia fɛblele nɔ wo lɛ. Yé wa kɛlɛ a zo.

²⁶ Yé wo ’sa kɔnénu vɔ sokofalenu punu yé wo go.

²⁷ Fɛana lé wo yii, wo va mi do élé pulu lɛ so fɛblele nɔle élé sokofale lɛ we ma, yé gɔɔli lé wa pa ’sa ta loru alé pulu gi, é a ye.

²⁸ É lé é bwenu lɛ léé: Wo anlé gɔɔli nɔla an ma é pa gi. Yee lé ke anlé pulu gi ’ko. Wo gi nyɛ kini, yé wo kɔlɛ gi nyɔɔn, yé wo lé wo ke lɛ léé: Mɛ we lé Kazambale a kɛlɛ ko lɛ ’koo?

²⁹ Wo bɔ wo ti Jakɔb va Kanaan tɛrɛ la yé we faa lé é bɔ wo ma, wa zuo fe a lɛ. Yé wo léé:

³⁰ Mi lé ke tɛrɛzan nya ana mi, é we fe ko lɛ yara plɛplɛ nya yé é léé, ko a mimavɔɔzannu nya.

³¹ Ko lé a lɛ léé, ko a mi tegelenu nya. Ko ’ka mimavɔɔzannu nya lo.

³² Ko a mi vu ta fié, ko ti benu nya; ko bɔlu do ’ka ana lo, yé ko zuané voélazan a kyɔ ko ti va Kanaan tɛrɛ la.

³³ Yé mi lé ke tɛrɛzan nya, é lé ko lɛ léé: Dé ka a mi tegelenu nya, maa dan a gi dɔɔ lɛ we ’ko ma: ’ka ka bwe do vo an va; ’ka kalé munu lé fɛblele sia; ’ka go, yé ’ka da ka zuané voélazan nya an lɛ.

³⁴ ’Ko zo lé maa dan a gi dɔɔ lɛ léé, ka ’ka mimavɔɔzannu nya lo; ka a mi tegelenu nya. Maa dan ka bwe nɔ lɛ ka lɛ é ziin, ’té zi a ka lɛ drɔɔ.

³⁵ Dé wo fɛ si wolé pulunu gi, ’té wo faa lé gɔɔli binu a é pale wolé pulu gi do do. Wo valé ’wo ti, wo gɔɔli binu ye, yé kana zén wo gi.

³⁶ Wo ti Jakɔb lé wo lɛ léé: Ka anlé nénu si an lee. Jozɛfu ’ka ana lo, Siméɔn ’ka ana lo, yé ka a a va léé, ’wo Bɛnjamɛn sié é ziin! Maa ɛ ke nyané blena we ’konu faa gi.

³⁷ Rubɛn lé é ti lɛ léé: Dé an ’ka da lɛ Bɛnjamɛn nya i lɛ é ziin lo, ’i an be fié gyɛ ma. Bé bɛ pa an lee, yé maa dan da lɛ a nya i lɛ é ziin.

³⁸ Jakɔb léé: An be ’ka dan go lɛ ka va lilo. Naa, a bwe ga, yé é vo é do. Dé wenyané bɔ a ma, ta lé ka go a wo lɛ bɛ, a gi, ka dan an gyɛ lɛ an be lé gibɔrɔ nya, yé an dan go lɛ nyané blele nya an tranu zuo gamunu nyanana.