Wepélisiananu 41 - Kazambale lé Sebe Sauunu 1979

Jozɛfu Faraɔn lé nyɛ gi fe

¹ ’Bɛ zuo lɛɛ fié yé Faraɔn nyɛ gyɛ. É a ye nyɛ fla léé, ’é a é dɔle yuu sɔnɔ.

² Tɔɔn, dirida sɔrafié si yuu va yé wo kun lu blele ma bwi la. Wa é zima yé wa é buale.

³ A zuo dirida sɔrafié bɛ si yuu va é ziin yé wo dɔ wo va yuu gɔ la. Wa naané yé wa é kwééle é ziin.

⁴ Yé dirida naané kwéélenu, wo dirida zima buale ’konu mini. Yé Faraɔn vuo.

⁵ Faraɔn yi gyɛ é ziin yé é nyɛ fiézan gyɛ, ’té ’sanɛnɛ blɛn zima sɔrafié a é dɔle ’sagɔ do nwiin.

⁶ Yé ’sanɛnɛ pia sɔrafié lé é ke é fou nya, ’té yirinwana fu a gyɛ, ’bɛ a é dɔle wo sɔnɔ.

⁷ ’Sanɛnɛ blɛn lé ke é kanle é kɔlɛ nya, ’sa founu ’ko wo mini. Yé Faraɔn vuo. Nyɛ lé é a gyɛ, yee lé ke bɛ.

⁸ ’Bɛ é tu kini, Faraɔn gi kyɛ dɔ, yé yokɛlɛmunu faa valé wedɔɔmunu faa lé ke Éjipiti tɛrɛ la, é munu nwunvɔ wo laana. Wo da aan wo, é ’élé nyɛ zuo fe wo lɛ. Naa, wo va mi do kpen ’ka bɔ lɛ wo gi fele lɛ Faraɔn lɛ lo.

⁹ Yé dɔrɔtabinzan segele we fe yé é lé Faraɔn lɛ léé: An gi san turu; we do sele dɔ an gi kyɔ.

¹⁰ Faraɔn bli fli maa valé burukɛlɛzan segele ma bléyian va, é ko vɔ bokɔn gi gaadénu nwiinzan lé fɛna.

¹¹ Ko fiénu nyɛ gyɛ yi do nya é béli; yé wo kolé nyɛ gi fe ko lɛ do do.

¹² Ébru pɛniɛ do a ko va ’bɛna, é a gaadénu nwiinzan lé luu nya. Ko ’kolé nyɛnu zuo fe a lɛ yé é a gi fe ko lɛ.

¹³ É a gi fe ko lɛ fɛan zo, a lɛ sɔɔ a zo. Faraɔn an pla anlé nyanama ta é ziin, yé é burukɛlɛzan segele dun.

¹⁴ Faraɔn mi nwunvɔ Jozɛfu laana. Wa bɔra bokɔn gi fiéfié. É puoma gun bo, élé sɔ tavɔɔ yé é go Faraɔn va.

¹⁵ Faraɔn lé Jozɛfu lɛ léé: An nyɛ gyɛ. Mi do kpen ’ka bɔ lɛ a gi fele lɛ an lɛ lo, yé maa a ’ma léé, dé wo nyɛ zuo fe i lɛ, ’té i a a gi fena.

¹⁶ Jozɛfu lé Faraɔn lɛ léé: Maa kaan lo. Kazambale ɛ dan a gi fe lɛ Faraɔn lɛ é zima.

¹⁷ Yé Faraɔn lé Jozɛfu lɛ léé: Maa ye nyɛ fla mi, ’té maa a é dɔle yuu gɔ ta.

¹⁸ Yé dirida buale zima sɔrafié si yuu va yé wo kun lu blele ma bwi la.

¹⁹ Dirida sɔrafié bɛ si yuu va wo zuo; wa é kwééle yé wa naané é baba; wo nɛ ’ka wo wɔlɛ ma lo; maa ’ka tan ’bɛ zoɛ dirida naanénu ye lɛ Éjipiti tɛrɛ faa la lo.

²⁰ Dirida vininnu sɔrafié lé ke é buale, dirida kwééle naanénu wo mini.

²¹ Wo wo mini aan wo, mi ’ka a yé léé, fɛ do kpen go wo plɛ gi lo; yé wa naané wo dɔbɛ gi duowo. Yé an vuo.

²² Maa ye é ziin mi léé, ’sanɛnɛ sɔrafié zima ana, ’té wa é kanle é kɔlɛ nya, ’té wa é dɔle ’sagɔ do nwiin.

²³ Yé ’sanɛnɛ sɔrafié lé ke é pia nya, é fou nya, ’té yirinwana fu wo kyɛ ble, wa é dɔle wonu zuo.

²⁴ ’Sanɛnɛ founu wo ’sanɛnɛ zima sɔrafié mini. Maa a fe yokɛlɛmunu lɛ, naa, wo va mi do kpen ’ka a gi fe lɛ an lɛ lo.

²⁵ Jozɛfu lé Faraɔn lɛ léé: Nyɛ fiénu ’ko gi a do; we lé Kazambale é dan a kɛlɛ lɛ, é a gɔɔn Faraɔn lɛ.

²⁶ Dirida zima sɔrafié a lɛɛ sɔrafié nya. ’Sanɛnɛ zima sɔrafié a lɛɛ sɔrafié nya. Nyɛ fiénu ’ko gi a do.

²⁷ Dirida kwééle naanénu sɔrafié lé, wo bɔra a vininzannu zuo, wa lɛɛ sɔrafié nya. ’Sa pia sɔrafié lé ke é fou nya, ’té yirinwana fu wo kyɛ ble, wo dan kɛlɛ lɛ lɔrɔdɔlɛɛ sɔrafié nya.

²⁸ We lé maa a fe Faraɔn lɛ lao, yee lé; we lé Kazambale é dan a kɛlɛ lɛ, é a nagɔɔn Faraɔn lɛ.

²⁹ Lɛɛ sɔrafié gi fɛblele kiɛre é dan kɛlɛ lɛ Éjipiti tɛrɛ faa la.

³⁰ Lɔrɔdɔlɛɛ sɔrafié é dan bɔ lɛ ’bɛnu zuo, yé fɛblele kiɛre lé é bɔra Éjipiti tɛrɛ la é vinin bɛ, munu gi é dan san lɛ ’bɛ ma, yé munu é dan zamaga wo lɛ lɔrɔ lee.

³¹ Lɔrɔ ’ko lé é dan dɔ lɛ fɛ kiɛre zuo, é dan kɛlɛ lɛ plɛplɛ, yé mi ’ka dan a gi dɔɔ lɛ léé, é vinin fɛ a kiɛre tɛrɛ ’ko la lo.

³² Faraɔn lé nyɛ gyɛle gɔnɔ fié bɛ, ’bɛ gi léé, Kazambale ɛ a fe yé é dan a we kɛlɛ lɛ é kele.

³³ Sin, Faraɔn ’é mi do si ma, gi kinizan valé wedɔɔzan nya, yé ’é ’bɛzan pla Éjipiti tɛrɛ nwiin ma.

³⁴ Faraɔn ’é bɛgimunu dɔ élé tɛrɛ la ma, yé ’wo Éjipiti tɛrɛ la féifɛ soruzan si, lɛɛ sɔrafié lé, fɛnu é dan dɔ lɛ a gi di bɛ, a lɛɛnu gi.

³⁵ Lɛɛ zin ’konu lé wo dan bɔ lɛ bɛ, wo gi, ’é wolé fɛnu faa zén ékeva ma. Faraɔn é dan fe lɛ munu lɛ léé, ’wo ’sazunnu dɔ yé ’wo fɛblele zén kɔnnu gi, flanu ta, yé ’wa tabin.

³⁶ Fɛblele ’konu é dan vo lɛ é tadɔle munu zé nya, lɔrɔdɔlɛɛ sɔrafié lé é dan da lɛ Éjipiti tɛrɛ la bɛ, wo gi fɛblele nya, té munu é zamagawo lɔrɔ lee lo we gi.

Jozɛfu kɛlɛ minwiinzan nya

³⁷ Dére ’konu sɔ Faraɔn valé é wuomunu faa lɛ.

³⁸ Yé Faraɔn lé é wuomunu lɛ léé: Ko mi bɛ yé bélé mi ’ko zo, ’té Bale léli a a gii?

³⁹ Yé Faraɔn lé Jozɛfu lɛ léé: Kazambale fɛ ’konu faa gɔɔn i lɛ, amalé mi do lé ’bɛ gi ke é kinile yé ’bɛ we dɔɔ bélé bii zo, ’bɛzan ’ka lo.

⁴⁰ Maa i dɔ kyɔ anlé kɔngimunu nwiin, yé anlé munu faa é dan i lɛdɔ lɛ a ma wenu faa lé bé fé wo lɛ, a ma. Maa ɛ ke minwiinzan blɛn nya; dé maa kaan lo, mi bɛ ’ka mini lɛ i lɛ lo.

⁴¹ Faraɔn lé Jozɛfu lɛ léé: Bé ye, maa i pla Éjipiti tɛrɛ faa tere nwiin.

⁴² Faraɔn é bɛmazéné si é bɛ ma, yé é a vɔ Jozɛfu bɛnwɔlɛ ma. Yé é lɛnsɔ zima zén a ta, yé é bɔrɔmakyan vɔ a bɔrɔ ma.

⁴³ Yé é a vɔ goro lé ke ’ézé zuo, a gi, yé wo siaa a ’lɛ léé: ’Ka powuo zun! A zo lé Faraɔn Jozɛfu pla Éjipiti tɛrɛ faa nwiin.

⁴⁴ Yé é lé Jozɛfu lɛ é ziin léé: Maa lé ke Faraɔn nya. Dé bii ’ka tan a fe lɛ léé, ’wo bɛ valé ’wo gane nwa lo, té mi do a kɛlɛ Éjipiti tɛrɛ faa la lo.

⁴⁵ Faraɔn tɔ pa Jozɛfu ma Safanat‐Paénéa, yé é Onfla balebanzan Poti‐Féra lu Asinat nɔ a lɛ a na nya. Yé Jozɛfu go Éjipiti tɛrɛ nagini lɛ.

⁴⁶ Jozɛfu da aan wo Éjipiti mununwiinzan blɛn Faraɔn ’lɛ, ’té a lɛɛ a yɔ do wɔlɛ vu, yé é si Faraɔn va yé é gié Éjipiti tɛrɛ faa la.

⁴⁷ Fɛ kiɛre dɔlɛɛ sɔrafié bléyi va, tɛrɛ fɛ dɔ di.

⁴⁸ Jozɛfu lɛɛ sɔrafié ’konu gi fɛblele faa zén ékeva Éjipiti tɛrɛ faa la. É fɛblelenu zun dɔ flanu ta. É flanu faa do do ta féifɛnu si, yé é wo zun dɔ flanu ta.

⁴⁹ Jozɛfu ’sazun dɔ kiɛre bélé wɛyi gɔɔn ma nyéné zo. É a kiɛre fɛan zo, bɛwemalé wo daan a nɔnɔle ma; a nɔnɔ’léé ’ka lo, azama.

⁵⁰ Lɔrɔdɔlɛɛ sɔrafié ’lɛ, Onfla balebanzan Poti‐Féra lu Asinat négɔné fié yaa Jozɛfu lɛ.

⁵¹ Jozɛfu élé né vininzan tɔ pa Manasé. Naa, é léé: Anlé nyanéblele koo, an ti lé kɔngimunu koo, Kazambale wo faa sele saan an gi.

⁵² Yé é ’é be fiézan tɔ pa Éfraim. Yé é léé: Bale an fan anlé nyanébletɛrɛ la.

⁵³ Éjipiti tɛrɛ la fɛdɔlɛɛ sɔrafié gié.

⁵⁴ Yé lɔrɔdɔlɛɛ sɔrafié pélisia, Jozɛfu a fe fɛan zo, a zo. Lɔrɔ dɔ tɛrɛ faa la, naa, fɛblele ana Éjipiti tɛrɛ faa la.

⁵⁵ Dé fɛ nyaa Éjipiti tɛrɛ faa la é ziin, ana munu da wuvɔ lɛ Faraɔn ma, léé, ’é fɛblele nɔ ’wo lɛ. Faraɔn lé Éjipiti munu faa lɛ léé: ’Ka go Jozɛfu va, yé we lé é dan fe lɛ ka lɛ, ’ka kɛlɛ.

⁵⁶ Lɔrɔ dɔ fɛfaana. Jozɛfu fɛblele kɔnnu lɛ so yé é ’sa dan Éjipiti munu lee. Yé lɔrɔ dɔle Éjipiti tɛrɛ la gi gyɛ.

⁵⁷ Lɔrɔ dɔ plɛplɛ tɛrɛnu faa la, yé munu si ’wolé tɛrɛnu faa la yé wo da Éjipiti, ’sa lɔle Jozɛfu lee we gi.