Wepélisiananu 39 - Kazambale lé Sebe Sauunu 1979

Jozɛfu a Éjipiti tɛrɛ la

¹ Wo go Jozɛfu nya Éjipiti tɛrɛ la; yé Éjipiti mi Potifaa lé ke Faraɔn bɛgizan valé gaadénu nwiinzan nya, é Jozɛfu lɔ Ismaɛl munu lé wo da a nya ana, wo lee.

² Gakelebale a Jozɛfu va yé a bɛ ma kɛlɛ néné. Éé nyanaan ézan Éjipiti mi lé kɔn gi.

³ Azan a ye léé, Gakelebale a a va. Yé we faa lé éé a kɛla, Gakelebale a va gya é zima.

⁴ Jozɛfu kɛlɛ mi zin nya ézan yuɛ gi, ’té éé ’bɛ lé nyanama paan, yé ’bɛ a pla élé kɔngimunu nwiin yé ’bɛ élé fɛnu faa tere bɛ pa a lee.

⁵ Potifaa Jozɛfu pla élé kɔngimunu nwiin yé é ’élé fɛnu faa bɛ pa a lee, tɔɔn, Jozɛfu lé we ma lé Gakelebale Éjipiti mi lé kɔn drɔɔ vo. Fɛnu faa lé ke a lee, dé wa kɔn gioo, dé wa féioo, Gakelebale wo drɔɔ vo.

⁶ Fɛnu faa lé ke azé nya, é wonu faa vo Jozɛfu lee. É ’ka é bɔn‐in bɔrɔan we do kpen ma é dɛrɛ lo, éé fɛ blé é pla; naa, Jozɛfu dɔ gɔné dɔbɛ gi é zima, yé a yara a é nɔnɔmi.

Wo Jozɛfu vɔ bokɔn gi

⁷ We ’konu zuo, we do bɔ; yee lé ke léé, azan Potifaa na bli bɔ Jozɛfu ma yé é léé: ’I yi gyɛ an va.

⁸ Jozɛfu ’ka a nyi si lɛ lo, yé é lé ézan na lɛ léé: Anzan lé we do kpen kana ’ka ’é gi lo; é ’é leefɛnu faa bɛ pa an lee.

⁹ Yeebozen ’ka blɛn yé é mini maa ta kɔn ’ko gi lo; yé é ’ka fɛ do kpen yi ga lɛ an lee lo, ’té dé é ’ka bii do nya lo; bii a a na nya, azama. An kɛla kaa yé an ’bɛ zo wenaané blɛn kɛlɛ yé an wenyané kɛlɛ Kazambale maa?

¹⁰ É vo a fena Jozɛfu lɛ yifaama, naa, ’bɛ ’ka yigyɛle a va nyi si lɛ duowo lo. Yé é ’ka a nyi si lɛ lee, é vo lezan sɔnɔ lo.

¹¹ Yi do nya é wɔra kɔn gi élé nyanama pale we ma, ’té kɔngimi do kpen ’ka ana lo.

¹² Lezan kun alé sɔ ma yé é léé: ’I yi gyɛ an va. Yé é ’élé sɔ vo a lee, yé é bɔra vlan nya béera.

¹³ Lezan a ye aan wo léé, alé sɔ vo é lee, yé é go vlan nya béera,

¹⁴ yé é ’élé kɔngimunu laa yé é lé wo lɛ léé: Ka yua, an zana da Ébru mi do nya ’ko blɛn gle wole ko va we ma. Mi ’ko da yi gyɛle an va we ma, yé maa siaa an dére plɛplɛ nya.

¹⁵ É a ye aan wo léé, an dére bié yé an siaa, é ’élé sɔ vo an lee yé é bɔra vlan nya béera.

¹⁶ Yé é Jozɛfu lé sɔ pla é sɔnɔ fɔɔ yé a zana da kɔn’léé.

¹⁷ Yé é we fe ’bɛ lɛ léé: Ébru luugɔné lé i da a nya ko va, é da blɛn glewo lɛ an va.

¹⁸ An dére bié yé maa siaa aan wo, é daan ’élé sɔ ma an lee yé é bɔra vlan nya.

¹⁹ Dérenu lé a na a fe léé, we lé ilé luu a kɛlɛ ’é lɛ, yee lé ke bɛ, Jozɛfu zan a ’ma aan wo, a bli fli é baba.

²⁰ É Jozɛfu kun yé é a vɔ bokɔn gi, fɛana lé woo minwiinzan blɛn lé bokɔngimunu vɔa, ana. Yé é vo bokɔn gi mi.

²¹ Gakelebale a Jozɛfu va yé é wezin kɛlɛ a lɛ. É a kɛlɛ mi zin nya bokɔngimunu nwiinzan yuɛ gi.

²² Yé bokɔngimunu nwiinzan Jozɛfu pla bokɔngimunu faa nwiin, ’té wo ’ka we do kpen kɛla a ma trɔnné va lo.

²³ Gakelebale a Jozɛfu va, amalé fɛnu lé ke Jozɛfu lee, bokɔngimunu nwiinzan ’ka é ’wuo gi bɔrɔan ’bɛ ma monomono lo. Yé we faa lé Jozɛfu a kɛla, Gakelebale a vɔa a ma.