Wepélisiananu 38 - Kazambale lé Sebe Sauunu 1979

Juda valé Tamaa lé we

¹ ’Bɛ bléyi ’ko va, Juda si é bwenu va yé é go Adulam mi do va, wa laama Iira.

² ’Bɛna mi, Juda le do ye, Kanaan mi Sua lu lé; yé Juda a si é na nya, yé é yi gyɛ a va.

³ Lezan bɔn si yé é né yaa gɔné nya, yé é a tɔ pa Eɛ.

⁴ É bɔn si é ziin, yé é né yaa gɔné nya, yé é a tɔ pa Onan.

⁵ É négɔné do yaa é ziin yé é a laa Sééla; é a yaa bléyian va, ’té Juda a Zib.

⁶ Juda le do si élé né vininzan Eɛ na nya, wa laama Tamaa.

⁷ Juda lé né vininzan Eɛ a mi nyané nya Gakelebale yuɛ gi, yé Gakelebale a gyɛ yé é ga.

⁸ Yé Juda lé Onan lɛ léé: ’I go i bwe na va, bé si i na nya; a zana lé i nya; ’i ’i bwe kulu bɔra.

⁹ Onan a gi dɔɔ léé, né ’ka dan kɛlɛ lɛ ézé nya lo; amalé é go é bwe na va aan wo é fɛ zana tɛrɛ va, léé, té é né nɔ é bwe lɛ lo.

¹⁰ We lé é a kɛlɛ, é ’ka sɔ lɛ Gakelebale lɛ lo, yé Bale bɛ é gyɛ yé é ga.

¹¹ Yé Juda lé é be na Tamaa lɛ léé: ’I vo gyɛzarale nya i ti lé kɔn gi fɔɔ yé an be Sééla é tin. É a kanana léé, dé Sééla é dan ga lɛ bélé é bwenu zoo? amalé é a fe a zo. Tamaa go yé é vo é ti lé kɔn’léé.

¹² ’Bɛ zuo namɔn, Juda na, Sua lu ga. Juda bli dɔrala aan wo, yee koo, a béé Adulam mi Iira koo, wo go Timina, munu lé wa ’blakyɛɛ bɔina, wo va.

¹³ Wa zuo fe Tamaa lɛ yé wo lé a lɛ léé: I zana ti go Timina, élé ’blanu kyɛɛ bɔile we gi.

¹⁴ Naa, Tamaa a ye léé, Sééla tin yé wo ’ka ’é nɔna a lɛ a na nya lo, amalé é ’élé gyɛbo sɔnu si é ta yé é yarayɔɔsɔ zén é yara yé é sɔ zén é ta yé é nyana Énaim gɔrɔ’léé, Timina lé zi ta.

¹⁵ Juda a ye yé a yara a é yɔɔle, bɛwemalé é dɔ a gi léé, bɔrɔdɛ le lé.

¹⁶ É bɔ a ma zia, yé é léé: ’I zi nɔ an lɛ an yi gyɛ i va. É ’ka a gi dɔɔ lɛ léé, ’é be na lé lo. Yé ’bɛ léé: I dan mɛ fɛ nɔ lɛ an lɛ yé i yi gyɛ an vaa?

¹⁷ É léé: An dan boliné do si lɛ anlé trubɛ va yé maa a pa i lɛ zia. Lezan léé: I dan i bɛfɛ vo lɛ an va fɔɔ yé i boliné ’ko pa an lɛ ziaa?

¹⁸ É léé: Maa mɛ fɛ nɔ i lɛ an bɛfɛ nyaa? Lezan léé: I bɛnwɔlɛ ma zéné koo, i bɛmafɛ koo, yili lé ke i lee koo, woo lé. Yé é wo nɔ a lɛ. Yé é yi gyɛ a va yé é bɔn si a ma.

¹⁹ É nwa yé é go yé é sɔ si é yara, yé é ’élé gyɛbo sɔ zén é ta é ziin.

²⁰ Juda boliné pa é béé Adulam mi lee, léé, ’é go ’é bɛfɛ si lezan lee. Naa, é ’ka a ye lɛ lo.

²¹ É we laa ana munu lee léé, bɔrɔdɛ le lé é ke turu zia Énaim, é a kyɛɛn? Yé wo lé a lɛ léé: Bɔrɔdɛ le do kpen ’ka ’ko lo.

²² É nɔla Juda va é ziin yé é léé: Maa ’ka a ye lɛ lo, yé ana munu boen, wo léé, bɔrɔdɛ le do kpen ’ka ’wo va mun lo.

²³ Juda léé: Fɛ lé ke a lee, ’é vo a lee ma. Té ko kobo gyɛ yara nya lo. Maa boliné pa yee lezan lɛ zia, yé i ’ka a ye lɛ lo.

²⁴ ’Bɛ zuo moné yaa, wo da a fe lɛ Juda lɛ léé: I be na Tamaa kɛlɛ bɔrɔdɛ nya, yé é bɔn si élé bɔrɔdɛ kɛlɛle zi. Yé Juda léé: ’Wa bɔra yé ’wa kyɛ ble.

²⁵ Wa gona a nya béera bléyian va, é we pa é zana ti lɛ zia léé: Mi lé fɛ ’konu ke azé nya, yee ɛ an gyɛ bɔn nya. Bɛnwɔlɛ ma zéné ’ko koo, bɛmafɛ ’ko koo, yili ’ko koo, i wozan dɔɔ?

²⁶ Juda wo dɔɔ yé é léé: Lezan lé we a tegele é mini anzé ta, naa, maa ’ka a nɔ lɛ an be Sééla lɛ lo, azama. Yé é ’ka a dɔɔ lɛ le nya é dɛrɛ lo.

²⁷ Alé né yaa bléyi bɔ aan wo, ’té fiané ɛ ke a bɔn gi.

²⁸ Né yaa bléyi va, né do é bɛ bɔra; dɔtrɔle a kun yé é kununu sɔɔn vɔ a ma yé é léé: Mi ’ko ɛ bɔra é vinin.

²⁹ Naa, é bɛ wɔra é pai yé wa zuané yaa. Yé dɔtrɔle léé: I! I bɔra kaa? Yé é a tɔ pa Pérɛs.

³⁰ A zuo yee lé kununu sɔɔn ke a bɛ ma, wa yaa, yé wo ’bɛ tɔ pa Zérak.