Wepélisiananu 37 - Kazambale lé Sebe Sauunu 1979

Jozɛfu bwenu é dan

¹ Jakɔb nyana Kanaan tɛrɛ la, fɛana lé a ti nyana, ana.

² Jakɔba lé nénu lé we lé ke ’ko. Jozɛfu lɛɛ bɔ aan wo vu ta sɔrafié, yee valé é bwenu a trubɛnu tabinna; né ’ko a é ti nanu Bila valé Zilpa benu va. Yé Jozɛfu wolé wenyanénu zuo fe é ti lɛ.

³ Izraɛl Jozɛfu yaa élé kwa ta gi, bɛwemalé a wea a lee é mini a be pɔnénu faa ta. Yé é varɔ nyɔɔzan do kini a lɛ.

⁴ A bwenu a ye léé, Jozɛfu sɔ wo ti lɛ é mini wo faa ta, bɛwemalé a za a wo gi. Wo ’ka bɔa we drɔɔ fele lɛ a lɛ lo.

⁵ Jozɛfu nyɛ gyɛ yé é a zuo fe é bwenu lɛ. Yé a za kɛlɛ wo bli gi blɛn é mini é vinin ta.

⁶ É lé wo lɛ léé: ’Ka tɔné dɔ nyɛ lé maa a gyɛ, a lɛ.

⁷ É kɛlɛ léé, kaa a féi mi, ’sa nwunnu yerena. Yé anzé ’sa nwun nwa yé é dɔ loru. Yé kazénu diri a zi, yé wo dia ’wo bli la anzé ’lɛ.

⁸ A bwenu lé a lɛ léé: I dan pla lɛ ko nwiin? Bii ɛ dan kɛlɛ lɛ ko nwiinzan nyaa? Alé nyɛgyɛlenu valé a dérenu lé we ma, a za kɛlɛ é ziin é bwenu bli gi blɛn é mini é vinin ta.

⁹ Yé é nyɛ do gyɛ é ziin yé é a zuo fe é bwenu lɛ. É léé: An nyɛ do gyɛ é ziin. Yiri koo, moné koo, monéné vu ta do koo, wo dia ’wo bli la an ’lɛ.

¹⁰ É a zuo fe é ti valé é bwenu lɛ. A ti we pla a lɛ, yé é léé: Nyɛ lé bé gyɛ bɛ, a gi lé nɔɔ? É a lé, maa koo, i bu koo, i bwenu koo, ko dia ko bli la tɛrɛ va i ’lɛɛ?

¹¹ A va maawole a é bwenu bli gi, naa, we ’konu sele voo a ti gi.

¹² Jozɛfu bwenu go Sisɛm wo ti lé trubɛ tabin lɛ.

¹³ Izraɛl lé Jozɛfu lɛ léé: I bwenu ’ka trubɛ tabinna Sisɛm loo? ’I da, maa i nwunvɔ wo va. Yé Jozɛfu léé: Maa lo.

¹⁴ Izraɛl lé a lɛ léé: ’I go ma. Dé i bwenu anaa? dé trubɛnu a drɔɔ? ’i go bé nagini, yé i da wo ta we fe an lɛ. Yé é Jozɛfu pa zia; yé é nwa Ébrɔn gɔnu worona yé é go Sisɛm.

¹⁵ Wo valé mi do kee, ’té é san bwi gi. Yé ’bɛ we laa a lee léé: Mɛ fɛ lé bé ginimaa?

¹⁶ Jozɛfu lé a lɛ léé: Maa a an bwenu naginina. Fɛana lé wa trubɛ tabinna, bé fe an lɛ ma.

¹⁷ Yé mi ’ko léé: Wo si ’ko, yé maa ’ma wo ta léé, kaa go Dotan. Jozɛfu go é bwenu zuo yé é bɔ wo ma Dotan.

¹⁸ Wa ye baa. Dé é ’ka tan bié lɛ wo ma lo, wo ’wo gi pa a ma léé, ’wa gyɛ.

¹⁹ Yé wo lé wo ke lɛ léé: Nyɛgyɛzan‐o, yee lé é dan mun.

²⁰ Sin, ’ka da, kaa a gyɛ, yé kaa a vuli ’yiguru do gi. Yé kaa dan a fe lɛ léé, wi nyané do a ble. Yé dé alé nyɛgyɛle é dan kɛlɛ lɛ kaa? kaa dan a ye lɛ.

²¹ Rubɛn we ’ko ’ma, yé é né si wo lee a fele nya léé: Té kaa a gyɛ lo.

²² Rubɛn lé wo lɛ é ziin léé: Té ka a nyɛ zana lo. ’Yiguru lé ke bwi gi ’ko, kaa a vɔ ’bɛ gi. Té ka wenyané kɛlɛ a lɛ lo. É a ’bɛ gi léé, é dan a si lɛ wo lee, a pale zia é ti va we ma.

²³ Jozɛfu bɔ aan wo é bwenu va, ’té alé varɔ nyɔɔzan a é zénle a ta, yé wo yee varɔ si a ta,

²⁴ yé wo né si yé wa vuli ’yiguru gi. Guru ’ko gi a é pla; ’yi do kpen ’ka a gi lo.

²⁵ ’Bɛ zuo yé wo nyana fɛblena. Wo yara nwa yé wo Ismaɛl munu valé nyɔgɔménu ye dana. Wo si Galaad tɛrɛ la. Zianbla ginzannu koo, baumélia koo, mirélia koo, wa wolé nyɔgɔmé punu kɔné nya, ’té wo goan Éjipiti tɛrɛ la.

²⁶ Yé Juda lé é bwenu lɛ léé: Kaa zuané gyɛlɛ yé wa nyɛ yɔɔ, kaa dan mɛ fɛ ye lɛ ’bɛ maa?

²⁷ Kaa a dan Ismaɛl munu lee ma, té ka wenyané kɛlɛ a lɛ lo; é a kaa zuané nya, kaa faa ti a do. Yé a bwenu dɔ a dére la.

²⁸ Yaawomunu lé wo si Madian tɛrɛ la, wa giéna aan wo Jozɛfu bwenu wo zuané gana yé wa si ’yiguru gi. Yé wa dan Ismaɛl munu lee gɔɔli fu sikla yɔ do va, yé ’bɛnu go a nya wo lee Éjipiti tɛrɛ la.

²⁹ Rubɛn da é ziin ’yiguru ta, ’té Jozɛfu ’ka guru gi é dɛrɛ lo. Yé é ’élé sɔnu fia,

³⁰ yé é go é zuannu va é ziin yé é léé: Pɛniɛ ’ka ana é dɛrɛ lo. Yé maa, maa dan go lɛ kyɛɛn?

³¹ Yé wo Jozɛfu lé varɔ si yé wo boligɔné do gyɛ, yé wo yee varɔ burula a nyɛ va.

³² Yé wo yee varɔ nyɔɔzan pa wo ti lɛ zia yé wo we pa a lɛ zia léé: Fɛ lé ko a ye, yee lo. Dé i be lé varɔ léé, dé yee kaan lo, bé nagini yé bé fe.

³³ Jakɔb a dɔɔ yé é léé: An be lé varɔ lé. ’Té wi nyané a ble. É Jozɛfu wi kini ékema.

³⁴ Yé Jakɔb élé sɔnu fia yé é bɔlɔ dɔ é gyɛn, yé é mɔn ’é be gyɛ bona.

³⁵ A benu faa valé a lunu faa da a tɔrɔ paa lɛ; yé é ’ka ’bɛ nyi si lɛ monomono lo. É léé: An dan go lɛ an be va gamunu nyanana a wuvɔle nya. Yé é vo é be wuvɔna.

³⁶ Madian munu Jozɛfu dan Potifaa lee, Éjipiti tɛrɛ la. Potifaa a Faraɔn bɛgizan nya, gaadénu nwiinzan nya.