Wepélisiananu 35 - Kazambale lé Sebe Sauunu 1979

Jakɔb tɔ dɛrɛ ye — Izraɛl

¹ Kazambale lé Jakɔb lɛ léé: ’I nwa, ’i go Bétɛl yé i nyana ’bɛna. ’I balebanna kɛlɛ, Bale lé é bɔra i va bléyian va lé i vɔ flii i bwe Ézau lee, a lɛ.

² Jakɔb lé élé kɔngimunu valé é mamunu faa lɛ léé: Bɛnnu lé balenu lé ke ka lee, ’ka wo si ka méléna. ’Ka kɛlɛ é zima, ’ka kalé sɔnu tavɔɔ.

³ Kaa nwa, kaa go Bétɛl. Maa dan balebanna do kɛlɛ lɛ ’bɛna, Bale lé é an dére nyi si anlé kle ble yi nya, ’té é kɛlɛ an va anlé tawo bléyi va bɛ, azé nya.

⁴ Bɛnnu lé balenu faa lé ke wo lee, é valé wo tɔnémakyan nya, wa nɔ Jakɔb lɛ. Jakɔb guru bo sɛnéyili lé ke Sisɛm sɔnɔ, a wuo, yé é wo zén a gi.

⁵ A zuo wo go. Kazambale lé kanale zén flanu faa lé é ke wo zi, wo tamunu gi, yé wo ’ka Jakɔb benu zuo bin lɛ lo.

⁶ Jakɔb valé munu faa lé ke a va, wo bɔ Luz, yee lé ke Bétɛl nya, Kanaan tɛrɛ la.

⁷ Jakɔb balebanna do kɛlɛ ana, yé é fɛkona tɔ laa El‐Bétɛl. ’Bɛna lé Bale ébozen gɔɔn a lɛ, bléyian va lé é vɔ fli gi é bwe lee, a bléyi va.

⁸ Rébéka pazan Débora ga. Wa pa Bétɛl, sɛnéyili do lé wa tɔ pa wuvɔsɛnéyili, a wuo.

⁹ Jakɔb sile Padan‐Aram zuo Kazambale bɔra a va é ziin, yé é a drɔɔ vo.

¹⁰ Kazambale lé a lɛ léé: I tɔ lé Jakɔb. Wo ’ka dan i laa lɛ Jakɔb é dɛrɛ lo, naa, i tɔ é dan kɛlɛ lɛ Izraɛl. Yé é a tɔ pa Izraɛl.

¹¹ Kazambale lé a lɛ léé: Maa a Plɛplɛfaazan Bale nya. ’I fan yé ’i kɛlɛ di ma. I dan bɛn do valé bɛn kiɛre yaa lɛ, yé i dan minwiinmunu yaa lɛ.

¹² Tɛrɛ lé maa a nɔ Abraam valé Izak lɛ, maa dan a nɔ lɛ i lɛ, yé maa dan tɛrɛ ’ko nɔ lɛ i kulunu lɛ, i zuo.

¹³ Kazambale nwa Jakɔb ta loru, fɛana lé é we fe a lɛ bɛ, ana.

¹⁴ Fɛana lé Kazambale we fe a lɛ, Jakɔb weseledɔmigifɛ dɔ ana. É a kɛlɛ gɔlɛnu nya, yé é baleban’yi valé nyɔnɔ zén a ta.

¹⁵ Fɛana lé Kazambale we fe a lɛ, Jakɔb ana tɔ pa Bétɛl.

¹⁶ Wo si Bétɛl; é vo sɛ yé wo bɔ Éfrat aan wo, Rasɛl né yaa. Alé né yaale kɛlɛ tɔntɔn.

¹⁷ Alé né yaale tɔntɔn bléyi va, a zi le lé a lɛ léé: Té i kana lo. I négɔné do ye é ziin.

¹⁸ Rasɛl a gona gana, naa, a lɛbole ’lɛ, é a tɔ pa Bɛn‐Oni, naa, a ti a tɔ pa Bɛnjamɛn.

¹⁹ Rasɛl ga yé wa pa Éfrat zi sɔnɔ, yee lé ke Bɛtléɛm nya.

²⁰ Jakɔb tɔmase dɔ a vun ta. Yee lé ke Rasɛl vun ta tɔmase nya. É ana tan kyɔ.

²¹ Izraɛl go, yé élé sɔkɔn dɔ Migidɔl‐Édɛɛ zi.

²² Bléyian va lé Izraɛl a tɛrɛ ’ko la, Rubɛn go yi gyɛ lɛ é ti wuozan Bila va. Yé Izraɛl a we ’ma. Jakɔb benu a mi vu ta fié.

²³ Léa benu lé ke ’ko: Jakɔb lé né vininzan Rubɛn koo, Siméɔn koo, Lévi koo, Juda koo, Isakaa koo, Zabulɔn koo, woo lé.

²⁴ Rasɛl benu lé ke Jozɛfu valé Bɛnjamɛn nya.

²⁵ Rasɛl wuole Bila be lé ke Dan valé Néfitali nya.

²⁶ Léa wuole Zilpa benu lé ke Gad valé Azɛɛ nya. Jakɔb benu lé wo wo yaa Padan‐Aram, wo lé ke bɛ.

Izak gale

²⁷ Jakɔb bɔ é ti Izak va Mamré, Kiijat‐Aaba, yee lé ke Ébrɔn nya. Ana lé Abraam valé Izak nyana.

²⁸ Izak tɛrɛlalɛɛ kɛlɛ lɛɛ yɔ sɔraziɛn.

²⁹ É ga yé é go élé munu va. É a é kwa yé alé yinu a di. A benu, Ézau valé Jakɔb a pa.