Wepélisiananu 34 - Kazambale lé Sebe Sauunu 1979

Dina lé we

¹ Blɛnzan Dina lé Léa a yaa Jakɔb lɛ, é go we lɛ ana tɛrɛ la blɛnnu va.

² Tɛrɛ ’ko la minwiinzan, Amɔɔ be Sisɛm, Dina ye. É a si, yé é yi gyɛ a va yé é a sɛrɛ.

³ A bli bɔ Jakɔb lu Dina ma. Blɛnzan sɔ a lɛ yé é blaané pa a ma.

⁴ Sisɛm lé é ti Amɔɔ lɛ léé: ’I blɛnzan ’ko nɔ an lɛ an na nya.

⁵ Jakɔb a ’ma léé, é ’é lu Dina gi sɛrɛ; naa, a benu ke aan wo féi alé trubɛnu va, Jakɔb tadɔ fɔɔ, yé wo da.

⁶ Sisɛm ti Amɔɔ go we fe lɛ Jakɔb lɛ.

⁷ Jakɔb benu a sina féi aan wo, wo we ’ko ’ma. É ’na wo ma yé wo bli fli é baba. Sisɛm we lɛrɛlɛrɛ kɛlɛ Izraɛl gɔnɔ gi. É yi gyɛ Jakɔb lu va; we lé wo ’ka a kɛla lo, é a kɛlɛ.

⁸ Amɔɔ we fe wo lɛ léé: An be Sisɛm bli bɔ i lu ma. Ilé zanté, bé nɔ a lɛ a na nya.

⁹ Kaa kɛlɛ do. ’Ka ka lunu nɔ ko lɛ, yé ka kozénu si.

¹⁰ ’Ka vo ko va, yé tɛrɛ ’ko ’é vo ka bɛ nya. ’Ka vo ’ko, yé ’ka yaawo, yé ’ka fɛnu ye.

¹¹ Sisɛm lé Dina ti valé a bwenu lɛ léé: ’Maa ka yuɛi bɔ ma, yé dé ka fɛofɛan laa, maa dan a nɔ lɛ ka lɛ.

¹² Dé é a gɔɔli ’lééoo ’lééan nya, yee valé blanfɛnu kiɛre nya, dé ka fe, maa dan wo nɔ lɛ ka lɛ, naa, ’ka le ’ko nɔ an lɛ an na nya.

¹³ Sisɛm Jakɔb benu buru Dina sɛrɛ, amalé wo we fe Sisɛm valé ’é ti Amɔɔ lɛ dabli nya.

¹⁴ Wo lé wo lɛ léé: We do ana. Gɔné lé wo ’ka a gane dɔ lɛ lo, ko ’ka bɔa ko buru nɔle lɛ ’bɛzan lɛ lo. ’Bɛ é dan kɛlɛ lɛ ko ma yaragyɛwe nya.

¹⁵ Ko kalé blibɔmawe nyi sié, ’té dé ka kɛlɛ bélé ko zo; ’wo kalé gɔnénu faa gane dɔ.

¹⁶ ’Té ko dan ko lunu nɔ lɛ ka lɛ, yé ko kazénu si kozé nya. Ko dan nyana lɛ ka va yé kaa kɛlɛ lele do nya.

¹⁷ Naa, dé é ’ka sɔ lɛ ka lɛ léé, ka ko dére ’ma yé wo ka gane dɔ lo, ko dan ko lu si lɛ yé ko goan.

¹⁸ Wo dére sɔ Amɔɔ valé é be Sisɛm lɛ.

¹⁹ Jakɔb lu sɔ a lɛ, amalé pɛniɛ ’ka mɔn lɛ we ’ko kɛlɛna lo. É a mi zin nya é ti lé kɔngimunu va.

²⁰ Amɔɔ valé é be Sisɛm go wolé flagɔrɔ ’léé, yé wo zana dɔɔ ’wolé flamunu lɛ yé wo léé:

²¹ Munu ’ko a bli drɔɔzanu nya ko vazia. ’Wo vo tɛrɛ ’ko la ma yé ’wo yaawo ma. Tɛrɛ ’ko a blɛn wo ma. ’Ko wo lunu si ko nanu nya yé ko ko lunu nɔ wo lɛ ma.

²² Naa, dé ko fe léé, ’wo vo ko va yé ko kɛlɛ lele do nya, wo léé, ’ko ko va gɔnénu faa gane dɔ bélé fɛan zo lé wobozen gane ke é dɔle, a zo.

²³ Wolé trubɛnu koo, wolé fuafɛnu koo, wolé winu faa koo, wo ’ka dan kɛlɛ lɛ kozé nya loo? We lé wa fe ko lɛ, ’ko a kɛlɛ tegele, yé wo nyana ko va.

²⁴ Munu faa lé wo da flagɔrɔ ’léé, wo Amɔɔ valé é be Sisɛm dére ’ma. Yé fla ’ko la gɔnénu faa wo gane dɔ. Gɔnénu faa lé wo da flagɔrɔ ’léé, woo lé.

²⁵ A yi yaazan nya, dé wa nyané blena, Jakɔb be fiénu, Siméɔn valé Lévi, Dina bwenu, wo ’wolé gwɔun sia do do, yé fla lé, é dɔ a gi léé, ’wa drɔɔ, wo ’wii a tamunu ta, yé wo a ta gɔnénu faa gyɛ.

²⁶ Wo Amɔɔ valé é be Sisɛm gyɛ é ziin gwɔun nya, yé wo Dina si Sisɛm lé kɔn gi yé wo bɔra.

²⁷ Jakɔb benu ’wii migalenu ta yé wo wolé fɛnu si; wo wo buru sɛrɛ, amalé.

²⁸ Wolé trubɛnu koo, wolé dirinu koo, wolé sokofalenu koo, ’té wo ke fla valé féi bɛ, wo wo si.

²⁹ Wolé fuafɛnu faa koo, wolé nénu valé wo nanu koo, fɛnu faa lé ke kɔnnu gi koo, wo wo si gulizara nya.

³⁰ Jakɔb lé Siméɔn valé Lévi lɛ léé: Ka an sɛrɛ yé ka an gin dɔ tɛrɛ ’ko la munu nyé gi, Kanaannu valé Férézinu nyé gi. An vamunu ’ka kiɛre lo. Wo dan zén lɛ ékeva an ma yé wo dan an bla lɛ yé wo dan an kulu ga lɛ, maa valé anlé munu nya.

³¹ Wo lé a lɛ léé: ’Wo ko buru kɛlɛ bélé bɔrɔdɛ zoo?