Wepélisiananu 33 - Kazambale lé Sebe Sauunu 1979

Jakɔb valé Ézau kee

¹ Jakɔb yara nwa yé é a nagini, ’té Ézau a dana mi wuru fié nya é va. Yé Jakɔb nénu guli Léa koo, Rasɛl koo, wuolomu fié koo, wo ma.

² É wuolomu valé wolé nénu dɔ zi ’lɛ, ’bɛ zuo Léa valé élé nénu, yé Rasɛl valé Jozɛfu vo é voéla.

³ Yeebozen gié wo ’lɛ, yé é dia é bli la tɛrɛ va fɔɔ gɔnɔ sɔrafié yé é bɔ é bwe sɔnɔ.

⁴ Ézau da a va vlan nya; é Jakɔb tuu gyɛ, é vɔ a bɔrɔ ma yé é pwɛpwɛ vɔ a ma. Yé wo wuvɔ.

⁵ Ézau é yuɛ vɔ yé é lomu valé nénu ye yé é léé: De lé nénu ɛ ke i va bɛɛ? Yé Jakɔb léé: Nénu lé Kazambale a nɔ i wuozan lɛ, wo lé.

⁶ A wuolomu bié, wo valé wolé nénu nya, yé wo dia ’wo bli la;

⁷ Léa valé élé nénu bié é ziin yé wo dia ’wo bli la; ’bɛ zuo Jozɛfu valé Rasɛl bié yé wo dia ’wo bli la.

⁸ Ézau léé: Fɛnu faa lé maa kee wo nya bɛ, i a mɛ kɛlɛna wo nyaa? Yé Jakɔb léé: Anzan lé an ma we vole mafɛnu lé.

⁹ Ézau léé: An zuan, fɛ a an lee di. Ilé fɛnu ’é vo i lee ma.

¹⁰ Jakɔb léé: Gba, ilé zanté. Dé maa i yuɛi bɔ, ’i blan si an lee ma. Naa, maa i yara ye bélé woo Bale yara yé fɛan zo, a zo, yé i an si é zima.

¹¹ Blan lé maa a nɔ i lɛ, bé si, naa, Kazambale zin kɛlɛ an lɛ kiɛre yé fɛ do kpen ’ka vuru lɛ an ma lo. É Ézau tunu amalé ’bɛ a si.

¹² Ézau léé: ’I da, kaa zi sia. Maa dan gié lɛ i ’lɛ.

¹³ Jakɔb lé a lɛ léé: Anzan a gi dɔɔ léé, nénu ’ka plɛplɛ lo, yé ’bladanu valé diridanu lé wolé nénu ke nyɔ ma, wa an va; dé wo tawo gla nya yi do kpen nya, trubɛ faa éé gaan.

¹⁴ Anzan ’é gié é wuozan ’lɛ ma, yé maa dan da lɛ a zuo drɔɔ, trubɛnu valé nénu lé tawobɛ yɛrama, fɔɔ yé an bɔ anzan va Séii.

¹⁵ Ézau léé: ’Maa anlé mi kenu vo i va ma. Jakɔb léé: Mɛmaléé? ’Maa anzan yuɛi bɔ ma.

¹⁶ A yi duo nya Ézau Séii zi sia.

¹⁷ Jakɔb Sukɔt zi sia. É élé kɔn dɔ yé é trubɛnu zé dɔ é ziin. Bɛwemalé wo fɛkona tɔ laa Sukɔt.

¹⁸ Jakɔb si aan wo Padan‐Aram, é bɔ drɔɔ Sisɛin, Kanaan tɛrɛ la yé é nyana fla ’lɛ zia.

¹⁹ Féi bɛ do lé é ’élé sɔkɔn dɔ ana, é a lɔ Sisɛm ti Amɔɔ benu lee gɔɔli fu wɔlɛ yɔ soru nya.

²⁰ É balebanna do kɛlɛ ’bɛna yé é a laa El‐Eloé‐Izraɛl.