Wepélisiananu 32 - Kazambale lé Sebe Sauunu 1979

Jakɔb we pa Ézau lɛ zia

¹ Jakɔb zi sia; yé woo valé Bale lé lanjenu kee.

² Jakɔb wo ye aan wo, é léé: Kazambale lé sunya palu do lé. Yé é fɛkona laa Maanaim.

³ Jakɔb munu nwunvɔ ’é ’lɛ é bwe Ézau va Séii tɛrɛ la, Édom bɛn gi.

⁴ É lé wo lɛ léé: ’Ka fe anzan Ézau lɛ léma: i wuozan Jakɔb léma: ’é nyana Laban va yé é vo ana mi fɔɔ bléyi ’ko va;

⁵ dirinu koo, sokofalenu koo, ’blanu koo, nyanamapagɔnénu valé nyanamapalomu koo, wa ’é lee, yé ’é we ’ko pa ’ézan lɛ zia, léé, ’é ’ é ye mi zin nya ma.

⁶ Nwunvɔzannu da é ziin Jakɔb va yé wo léé: Ko go i bwe Ézau va; é a dana keena i nya, mi wuru fié nya é va.

⁷ Kana zén Jakɔb gi é baba yé a gi nyɛ kini. É vamunu koo, ’blanu koo, dirinu koo, nyɔgɔménu koo, é wo gi bɔi fié yé é léé:

⁸ Dé Ézau da guli dan lɛ a palu do va yé é wo gyɛ, a palu koɛzan ’ko, wo bɔa sole lɛ a lee.

⁹ Jakɔb léé: An ti Abraam zé Bale, an ti Izak zé Bale, Gakelebale, bii a fe an lɛ léé, ’an go anlé tɛrɛ la an yaafla la yé ’é dan wezin kɛlɛ lɛ an lɛ.

¹⁰ Zin faa lé bé kɛlɛ i wuozan lɛ, é valé i yara pale an mawe faa kɛlɛle ta, maa a ’bɛ ma kiéné; an Juudɛn ’ko kini, ’té tawomayili do kpen ɛ ke an lee, yé sin an kɛlɛ palu fié nya.

¹¹ Ilé zanté, ’i an si an bwe Ézau leeoo, Ézau lee! Naa, kana a an gi léé, é dan da lɛ yé é maa gyɛ, maa valé né bunu valé nénu nya.

¹² Yé bii, i léé, ’é dan wezin kɛlɛ lɛ an lɛ, yé ’é dan an kulunu kɛlɛ lɛ di bélé wɛyi gɔɔn ma nyéné zo, ’té wo ’ka bɔa wo nɔnɔle lɛ lo.

¹³ Fɛkona lé Jakɔb yii. É ’é leefɛnu ke si é bwe Ézau blan nya.

¹⁴ Bolida wuru do valé boligɔné yɔ do koo, ’blada wuru do valé ’blagɔné yɔ do koo,

¹⁵ nyɔgɔméda yɔ do wɔlɛ vu valé wolé nénu lé wo ke nyɔ ma koo, dirida yɔ fié koo, dirigɔné vu koo, sokofaleda yɔ do ko, sokofalegɔné vu koo, wo lé é wo si.

¹⁶ É trubɛnu lɛ pa é wuomunu lee do do yé é lé é wuomunu lɛ léé: ’Ka gié an ’lɛ trubɛ ’konu nya.

¹⁷ É lé a vininzan lɛ léé: Dé ka valé an bwe Ézaunu kee, dé é a laa i lee léé, de lé mi lé i nyaa? i go kyɛɛn? trubɛ lé ke i ’lɛ ’ko, de zé léé?

¹⁸ bé fe a lɛ léma: i wuozan Jakɔb zé lé; anzan Ézau blan lé é a pa zia, yee lé, yeeboen a dana ko zuo.

¹⁹ É dére ’ko duo fe a fiézan lɛ yé é yee duo fe a yaazan lɛ, yé munu faa lé wo ke trubɛnu zuo, é yee dére duo fe wo faa do do lɛ. É léé: Dé ka valé anzan Ézaunu kee, a zo lé ’ka fe a lɛ.

²⁰ ’Ka fe léé, i wuozan Jakɔb a dana ko zuo é ziin. Naa, Jakɔb léé: Maa dan a bli dɔrala lɛ blan ’ko lé é go an ’lɛ, a nya; a zuo dé an dɔ a yara, dé é dan an si lɛ é zimaa?

²¹ Alé blɛfɛnu gié a ’lɛ; yé ’bɛ béli é yii kampéman la bɛ.

²² ’Bɛ béli duo nya é nwa; é na fiénu koo, é wuolomu fiénu koo, élé né vu ta do koo, é wo si yé wo gié Jabɔk lé ’yikinina.

²³ É wo si yé é yuu kini wo nya yé fɛnu faa lé ke a lee, é yuu kini wo faa nya.

Jakɔb buo si lanje va

²⁴ Jakɔb vo é do. Yé mi do vo buo sina a va fɔɔ yé tu kini.

²⁵ Mi ’ko a ye aan wo léé, ’é ’ka Jakɔb kelena lo, é fɛ duun a binla polu la yé Jakɔb boro so é ke ’léé bléyian va lé é a buo sina a va, a bléyi va.

²⁶ Mi ’ko léé: ’I daan an ma ’an go, naa, tu a kinina. Yé Jakɔb léé: Dé i ’ka an drɔɔ vo lɛ lo an ’ka dan daan lɛ i ma pelo.

²⁷ É lé a lɛ léé: Wo i tɔ laama nɔɔ? Yé é léé: Wo an laama Jakɔb.

²⁸ É lé é ziin léé: I tɔ ’ka dan kɛlɛ lɛ Jakɔb é dɛrɛ lo, naa, wo dan i laa lɛ Izraɛl; i buo si Kazambale valé munu va yé i wo kele a nya, azama.

²⁹ Jakɔb léé: Wo i tɔ laama nɔɔ? É léé: Mɛmalé i an tɔ laa an lee? yé é a drɔɔ vo ’bɛna.

³⁰ Jakɔb fɛkona tɔ pa Péniɛl, naa, é léé: Maa Kazambale yara ye, yé an béli.

³¹ É si Péniɛl bléyian va, ’té yiri a nwana. Jakɔb boro sona é ke ’léé lé we ma lé é tun bo,

³² bɛwemalé wi boro gi wɔlɛ sona é ke ’léé miin fu bɛ, Izraɛl lé nénu ’ka a blé lo, fɔɔ kyɔ; naa, Kazambale Jakɔb gyɛ é binla polu la é boro sona é ke ’lééna.