Wepélisiananu 3 - Kazambale lé Sebe Sauunu 1979

Mi saanna

¹ Méné gi kini é mini winu faa lé Bale, Gakelebale a kɛlɛ, wo ta. É lé lezan lɛ léé: Kazambale a fe weboen nya léé, té ka féiyili poro faa ble loo?

² Lezan lé méné lɛ léé: Ko féi yili poro faa blé.

³ Naa, yili lé é ke féi méléna bɛ, Kazambale a fe léé, té ko a poro ble lo, té ko mane a ma lo, dé ko kɛlɛ, ko gaan.

⁴ Yé méné lé lezan lɛ léé: Ka ’ka dan ga lɛ lo;

⁵ naa, Kazambale a gi dɔɔ léé, dé ka ble yian ma, ka yuɛ é dan fuo lɛ yé ka dan kɛlɛ lɛ balenu zo, ’té ka wezin valé wenyané vasina dɔɔ.

⁶ Lezan a ye aan wo léé, yili ’ko poro a blefɛ zima nya, yé é a nɔnɔmi mi yuɛ gi, yé é a mi bɔn‐in kinifɛ zima nya, é a poro so yé é a ble; a zana lé ’bɛ ke a va bɛ, é a ke nɔ ’bɛ lɛ yé ’bɛ a ble.

⁷ Yé wo fiénu yuɛ fuo, yé wa ye léé, ’wa é porole; wo go bɔrɔ laa so lɛ yé wo wo tan, yé wo wo dɔ ’wo gyɛn bélé kyɛsidi zo.

⁸ Yé wo Bale, Gakelebale dére ’ma, ’té ’bɛ éé giéan féi nyanadi bléyi va yé gɔnézan valé é na yɔɔ Bale Gakelebale lee, féiyilinu méléna.

⁹ Yé Bale, Gakelebale gɔnézan laa, yé é lé a lɛ léé: Bii a kyɛɛn?

¹⁰ Gɔnézan léé: Maa i dére ’ma féi, yé maa a é porole amalé an kana yé an yɔɔ.

¹¹ Yé Bale, Gakelebale léé: De ɛ i bɔn‐in kini léé, i a é porolee? Yili lé maa a poro blele yi ga i lee bɛ ’naan, bé blee?

¹² Gɔnézan a zi vɔ léé: Lezan lé bé nɔ an lɛ, yee ɛ yiliporo nɔ an lɛ yé maa a ble.

¹³ Yé Bale, Gakelebale lé lezan lɛ léé: Mɛmalé i ’bɛ kɛlɛɛ? Lezan ézé fe léé: Méné dabli kɛlɛ an lɛ yé maa a ble.

¹⁴ Bale, Gakelebale lé méné lɛ léé: I ’bɛ we ’ko kɛlɛ, amalé bale a é pale i ma flawinu valé bwiiwinu méléna; i dan tawo lɛ i plɛ la, yé i dan vun ble lɛ ilé tɛrɛla faa gi.

¹⁵ Maa dan guli pa lɛ bii valé lezan méléna, a kulu valé i kulu méléna; a kulu é dan i ’wuo wii lɛ yé i kulu é dan suiɛ dɔ lɛ a kulu ganetɛn ma.

¹⁶ Yé Gakelebale lé lezan lɛ léé: Maa dan nyané blele taa pa lɛ i bɔn bɔle ma, yé i dan né yaa lɛ kleblele kaii nya; i bli é dan bɔ lɛ i zana ma yé i zana é dan pla lɛ i nwiin.

¹⁷ Kazambale lé gɔnézan lɛ léé: I tɔné dɔ i na dére lɛ, yé yili lé maa a fe i lɛ léé, té bé poro ble lo, bé ble, bɛwemalé maa dan bale pa lɛ tɛrɛ ma ilé we ma.

¹⁸ Nyanéblele nya lé i dan ilé fɛblele ye lɛ tɛrɛ va, ilé tɛrɛla faa gi. Tɛrɛ é dan lélinu valé goligyɛnénu bɔra lɛ i lɛ, yé i dan féi lunu ble lɛ.

¹⁹ I yara kyɛyee zi lé i dan fɛ ble lɛ fɔɔ yé i nɔla é ziin tɛrɛ lé maa i kɛlɛ a nya bɛ, a nya; naa, i a vun nya, yé i dan nɔla lɛ vun nya é ziin.

²⁰ Adam é na tɔ pa Eve; é a mi yuɛmale faa bu nya, azama.

²¹ Bale, Gakelebale wikɔlɛ kɛlɛ Adam valé é na lé sɔ nya yé é a zén wo ta.

²² Bale, Gakelebale léé: Ka a yé loo? Mi kɛlɛ bélé kaa va mi do zo yé é wezin valé wenyané vasina dɔɔ. Naa, kaa mibéliyili poro sole yi ga a lee, dé é da ’bɛ ble yé é vo é yuɛma lɛɛfaama, ’té ’bɛ glɛ ’ka dɔa lo.

²³ Yé Bale, Gakelebale mi bin Édɛn féi, léé, ’é go féi pa, tɛrɛ lé wa kɛlɛ kɔɔn a nya bɛ, a va.

²⁴ ’Bɛ zo lé é Adam bin; yé lanjenu lé wa laama sérubɛnnu, é wo dɔ Édɛn féi yirinwanazia, yé gwɔunnu lé kyɛ ke wo ’léé, é a ’bɛnu lee, ’té ’bɛnu a giéan, mibéliyili lé zi tabinle we ma.