Wepélisiananu 28 - Kazambale lé Sebe Sauunu 1979

Jakɔb vɔ fli gi

¹ Izak Jakɔb laa yé é a drɔɔ vo yé é a yi ga a lee léé: Té i Kanaan le si i na nya lo.

² ’I nwa, ’i go Padan‐Aram i bu yaa ti Bétuɛl va yé i le si ’bɛna i bu bwe Laban lunu va.

³ Plɛplɛ faazan Bale ’é i drɔɔ vo yé ’é i fan ma, yé ’é i kɛlɛ di ma, i kɛlɛle bɛn kiɛre nya we ma.

⁴ ’Wo i drɔɔ vo Abraam drɔɔvobɛ gi, bii valé ilé nénu nya i va ma, tɛrɛ lé i nyanaan a ta bɛn nya ’ko, ’té é a nɔ Abraam lɛ bɛ, a kɛlɛle izé nya we ma.

⁵ Yé Izak Jakɔb pa zia yé é go Padan‐Aram, Aramézan Bétuɛl be Laban lé ke Jakɔb valé Ézau bu Rébéka bwe nya, a va.

⁶ Ézau a ye léé, Izak Jakɔb drɔɔ vo yé é a pa zia Padan‐Aram le sile ’bɛna we ma. Yé é a ye léé, a drɔɔ vole gi é a yi ga a lee léé, té é Kanaan le si é na nya lo.

⁷ É a ye léé, Jakɔb é ti valé é bu lɛdɔma yé é go Padan‐Aram.

⁸ ’Bɛ zo lé Ézau a ’ma léé, Kanaan lomu ’ka sɔ lɛ é ti Izak lɛ lo.

⁹ Yé Ézau go Ismaɛl va yé é Abraam be Ismaɛl lu Maalat si é na nya yé é a pa é na koɛnu va. Nébajɔt buru lé.

Jakɔb lé yuɛzi we

¹⁰ Jakɔb si Bɛɛ‐Sééba yé é go Karan.

¹¹ É bɔ aan wo fɛdona ’té yiri vɔ, amalé é yii ’bɛna. É gɔlɛ do si yé é a kɛlɛ é ’wuoplalafɛ nya yé é yii ’bɛna.

¹² Yé é nyɛ gyɛ, yé bé ye, kɔngiémayili do ana; a péli a é dɔrale tɛrɛ la yé a ’wuo zun la ma; ’té Kazambale lé lanjenu woo giéma, ’té woo zunwo yee kɔngiémayili ma.

¹³ Yé Gakelebale dɔ a nwiin loru yé é léé: Maa a Gakelebale nya, i tra Abraam lé Bale nya, Izak lé Bale nya, Tɛrɛ lé i ke é yiale a ta ’ko, maa dan a nɔ lɛ bii valé i kulunu lɛ.

¹⁴ I kulunu é dan kɛlɛ lɛ kiɛre bélé tɛrɛ lé vun zo; wo dan soi lɛ yirinwanazia fɔɔ yirivɔna, é valé yirinwana bɛbolazia fɔɔ yirinwana bɛyilazia. Tɛrɛ la lelenu faa drɔɔ é dan vo lɛ bii valé i kulunu lé we ma.

¹⁵ Maa a i va ma, yé fɛ faa lé i dan go lɛ ana, maa dan an yuɛ pa lɛ i va yé ma dan da lɛ i nya é ziin tɛrɛ ’ko la; maa ’ka dan i vo lɛ pelo, ’té we faa lé maa a fe i lɛ bɛ, ’té maa a lɛ sɔɔ é wo.

¹⁶ Jakɔb vuo yi fla yé é léé: Wezen lé, Gakelebale a fɛkona yé maa ’ka a gi dɔɔ lɛ lo.

¹⁷ Kana zén a gi yé é léé: Fɛkona éé kana zén‐é mi gi. Fɛkona lé Bale lé kɔn ke, yé fɛkona lé lanu’léé ke.

¹⁸ Jakɔb nwa bladi tutu; yé gɔlɛ lé é a kɛlɛ é ’wuoplalafɛ nya bɛ, é a dɔ ’bɛna weseledɔmigifɛ nya yé é nyɔnɔ zén a ta.

¹⁹ É fɛkona tɔ pa Bétɛl; é kyɛn wo fla ’ko tɔ laama Luz.

²⁰ Jakɔb bale kun yé é léé: Dé Kazambale kɛlɛ an va, dé é yuɛ pa an va, ta lé maa dan go lɛ a wo lɛ bɛ, a gi, dé é fɛblele valé sɔ nɔ an lɛ,

²¹ dé maa nɔla é ziin an ti lé kɔn ’léé drɔɔ, ’té Gakelebale é dan kɛlɛ lɛ anlé Bale nya;

²² gɔlɛ ’ko lé maa a dɔ weseledɔmigifɛ nya ’ko, é dan kɛlɛ lɛ Kazambale lé kɔn nya; yé fɛnu faa lé i dan wo nɔ lɛ an lɛ, maa dan wo vuzan nɔ lɛ i lɛ.