Wepélisiananu 27 - Kazambale lé Sebe Sauunu 1979

Izak Jakɔb drɔɔ vo

¹ Izak kɛlɛ é kwa, yé a yuɛ fuu ’ka a ta lo yé é ’ka fɛna yé é dɛrɛ lo. Yé é ’é be vininzan Ézau laa yé é léé: An be. Yé ’bɛ léé: Maa lo.

² Izak léé: Bé ye do, maa a é kwa yé an ’ka an gayi dɔɔa lo.

³ Amalé sin, ilé wigyɛfɛnu si ma, ilé sakɔlɛ koo, ilé sa koo, ’i wo si ma, ’i go bwii yé ’i bwiiwi gyɛ an lɛ ma.

⁴ Zian lé é sɔ an lɛ, bé dɔne ma yé ’i da a nya an lɛ maa a ble, anlé i drɔɔ vole we gi an gale ’lɛ.

⁵ We lé Izak ke a fena é be Ézau lɛ bɛ, Rébéka tɔné a é dɔle a lɛ. Yé Ézau go lu pa lɛ.

⁶ A zuo Rébéka lé é be Jakɔb lɛ léé: Maa lé ma: bé ye do, maa we ’ma i ti ta, ’té éé we fé i bwe Ézau lɛ.

⁷ É lé a lɛ léé, ’i go bwiiwi gyɛ ’é lɛ, yé i zian dɔne ’é lɛ yé ’é a ble yé ’é i drɔɔ vo Gakelebale yuɛ va ’é gale ’lɛ.

⁸ Sin, an be, we lé maa dan a fe lɛ i lɛ, ’i tɔné dɔ an lɛ ma.

⁹ ’I go boliné zima fié si trubɛnu va yé ’i da a nya an lɛ yé maa i ti sɔlɛzian dɔne a nya;

¹⁰ yé i dan go lɛ a nya i ti va yé é a ble yé é i drɔɔ vo ’é gale ’lɛ.

¹¹ Jakɔb lé é bu lɛ léé: An bwe Ézau a makyɛɛzan nya yé an makyɛɛ do kpen ’ka lo.

¹² Dé an ti é bɛ mane an ma nii? ’Té maa kɛla viézan nya a yuɛ gi yé é dan bale pa lɛ an ma; é ’ka dan an drɔɔ vo lɛ lo.

¹³ A bu lé a lɛ léé: An be, bale pale ’ko, ’é dia maa ɛ ta ma. ’I tɔné dɔ an dére lɛ é pla, ’i go wo si é wo an lɛ.

¹⁴ Jakɔb go wo si lɛ yé é da wo nya é bu lɛ, yé a bu a ti sɔlɛzian dɔne.

¹⁵ A zuo Rébéka ’é be vininzan Ézau lé sɔnu si, alé sɔnu va sɔ zima baba lé é a ye kɔn gi, yee lé é a si yé é a nɔ é be voélazan Jakɔb lɛ, léé, ’bɛ a zén ’é ta.

¹⁶ É bolikɔlɛ wo a bɛnu ma, é valé a bɔrɔ lé a makyɛɛ ’ka lo, a ma.

¹⁷ Zian valé buru lé é a dɔne é a pa é be Jakɔb lee.

¹⁸ Jakɔb go é ti va yé é léé: An ti. Yé Izak léé: Maa lo. An be, de ɛ ke i nyaa?

¹⁹ Jakɔb lé é ti lɛ léé: Maa a i be vininzan Ézau nya; we lé bé fe an lɛ, maa a kɛlɛ. Ilé zanté, ’i nwa, ’i nyana ma, ’i anlé bwiiwi ble ma yé ’i an drɔɔ vo ma.

²⁰ Izak lé é be lɛ léé: I! An be, bé ye tɛkɛɛ? Jakɔb a zi pa léé: Gakelebale, ilé Bale, da a nya an lɛ.

²¹ Izak lé Jakɔb lɛ léé: An be, ’i bié yé an bɛ mane i ma, dé bii a an be Ézau nya webozen nyaa? yé maa ye.

²² Jakɔb bié é ti Izak ma yé ’bɛ é bɛ mane a ma yé ’bɛ léé: I dére a Jakɔb dére nya, naa, i bɛnu a Ézau bɛnu nya.

²³ A bɛ makyɛɛ a, bélé a bwe Ézau bɛ zo, amalé a ti ’ka a dɔɔ lɛ lo yé é a drɔɔ vo.

²⁴ É léé: Bii ɛ ke an be Ézau nyaa? Yé Jakɔb léé: Maa lé.

²⁵ Izak léé: Bé fɛ nɔ an lɛ, yé maa an be lé bwiiwi ble yé maa i drɔɔ vo. Jakɔb a nɔ a lɛ yé é a ble; é dɔrɔ nɔ a lɛ é ziin, yé é a mini.

²⁶ Yé Jakɔb ti Izak léé: An be, ’i bié yé i an tuu gyɛ.

²⁷ Jakɔb bié yé é a tuu gyɛ. Izak alé sɔnu gin si; a zuo é a drɔɔ vo yé é léé: An be gin a bélé féi lé Gakelebale a drɔɔ vo, a gin zo.

²⁸ Kazambale ’é lagi fli vɔ i ta ma; Yé ’é tɛrɛ nyɔnɔ nɔ i lɛ ma; ’É ’sa valé dɔrɔ nɔ i lɛ kiɛre ma.

²⁹ Munu ’é pla i wuo ma, Bɛnnu ’é dia ’wo bli la i ’lɛ ma, ’I kɛlɛ i bwenu nwiinzan nya ma, I bu benu ’é dia ’wo bli la i ’lɛ ma. Dé mian é bale pa i ma, ’wo bale pa ’bɛzan ma ma, Yé dé mian é i drɔɔ vo, ’wo ’bɛzan drɔɔ vo ma.

³⁰ Izak nyaa Jakɔb drɔɔ vole nya yé Jakɔb si é ti Izak va tɔɔn, a bwe Ézau si lu pana.

³¹ É zian dɔne é ziin yé é goan é ti lɛ; yé é lé é ti lɛ léé: An ti ’é nwa yé ’é be lé bwiiwi ble yé ’i an drɔɔ vo ma.

³² A ti Izak lé a lɛ léé: De ɛ ke i nyaa? Yé é léé: Maa a i be vininzan Ézau nya.

³³ Yé Izak gi nyɛ blɛn kini yé é léé: Yé de ɛ da bwiiwi nya an lɛ lao ’koo? Maa a faa ble i dale ’lɛ yé maa azan drɔɔ vo. A drɔɔ é dan vo lɛ a zo weboen nya.

³⁴ Ézau é ti dére ’ma aan wo, é sia plɛplɛ wuvɔle nya yé é lé é ti lɛ léé: An ti, ’i maa drɔɔ vo é ziin.

³⁵ Izak léé: I zuané da gi kinile nya yé é ilé drɔɔ vole si.

³⁶ Ézau léé: A tɔ laale Jakɔb lé we ma lé é dɔ an pa gi gɔnɔ fiéé? É an dɔna si yé sin é da anlé drɔɔ vole si lɛɛ? Yé é lé é ziin léé: I ’ka drɔɔ vole do kpen tadɔ lɛ anzé nya loo?

³⁷ Izak lé Ézau lɛ léé: Bé ye, maa a dɔ izan nya, yé maa a bwenu faa kɛlɛ a wuomunu nya, yé maa ’sa valé dɔrɔ nɔ a lɛ. An be, maa mɛ fɛ ɛ kɛla i lɛɛ?

³⁸ Ézau léé: An ti, drɔɔ vole ’ko do kpen ɛ ke i lee? An tioo, an ti! ’I anzé drɔɔ vo é ziin! Yé Ézau é dére bié plɛplɛ yé é wuvɔ.

³⁹ A ti Izak lé a lɛ léé: Bé ye, tɛrɛ nyɔnɔ ’ka dan kɛlɛ lɛ i nyanana lo, Yé lagi fli ’ka dan vɔ lɛ ana lo.

⁴⁰ I dan ilé fɛ blele ye lɛ ilé gwɔun ma Yé i dan kɛlɛ lɛ i zuané wuozan nya. Naa, dé i vo kuunna fɔɔ yé i si alé se wuo, Bale lé é a vɔ i bɔrɔ ma, i dan a kini lɛ.

⁴¹ Jakɔb za Ézau bɔn fan a ti lé a drɔɔ vole we ma; yé Ézau lé é bli gi léé: Fɛan zo lé an ti gyɛboyinu a bɔna é pu, dé ’bɛ nyaa faa, maa dan an zuané Jakɔb gyɛ lɛ.

⁴² We lé Rébéka be vininzan Ézau a fe, wa glewo Rébéka lɛ. Amalé é ’é be voélazan Jakɔb laa yé é lé a lɛ léé: I yua, i bwe Ézau é dan élé we lɛgi pa lɛ i ma i gyɛle nya.

⁴³ Sin, an be, ’i tɔné dɔ an dére lɛ. ’I nwa, ’i fwi ’ko, yé ’i go an bwe Laban va Karan;

⁴⁴ ’i vo a va bléyi ke nya fɔɔ yé i bwe bli é dɔrala,

⁴⁵ yé a bli ’ka flian i ma é dɛrɛ lo yé we lé bé kɛlɛ a lɛ yé é san a gi. Yé maa we pa i lɛ zia léé, ’i da. Mɛmalé an vuruan ka fiénu gi yi do kpen nyaa?

⁴⁶ Rébéka lé Izak lɛ léé: Anlé tɛrɛla lɔrɔ nyaa an ma Et lunu lé we ma. Dé Jakɔb ’bɛ zo le si Et lunu va, tɛrɛ ’ko la blɛnnu va, ’té mɛmalé an voo é yuɛmaa?