Wepélisiananu 26 - Kazambale lé Sebe Sauunu 1979

Izak valé Filisitinu lé we

¹ Lɔrɔ dɔ ana tɛrɛ la Izak bléyi va. Lɔrɔ vinin lé é dɔ Abraam bléyi va, ’bɛ kaan lo; yé Izak go Filisitinu nwiinzan Abimélɛk va, Géraa.

² Gakelebale bɔra Izak va yé é léé: Té i zun Éjipiti tɛrɛ la lo; ’i nyana tɛrɛ lé maa dan a fe lɛ i lɛ, a ta.

³ ’I vo tɛrɛ ’ko la ’ko; maa dan kɛlɛ lɛ i va yé maa dan i drɔɔ vo lɛ, naa, maa dan tɛrɛ ’konu faa nɔ lɛ bii valé i kulu lɛ, yé gipawe lé maa a kɛlɛ i ti Abraam va, maa dan dɔ lɛ a ta.

⁴ Maa dan i kulu kɛlɛ lɛ di bélé lagi monénénu zo; maa dan tɛrɛ ’konu faa nɔ lɛ i kulunu lɛ; yé tɛrɛ la bɛnnu faa drɔɔ é dan vo lɛ i kulu lé we ma;

⁵ Abraam an dére lɛdɔma, yé é tawo an dére ta, yé é anlé bélidɔwe sɔnnénu pa, yé é anlé gɔnɔlawenu kɛlɛ, yé é tawo anlé bélidɔwenu ta, azama.

⁶ Yé Izak vo Géraa.

⁷ Ana munu Izak na lé we laa aan wo é lee, é léé: An buru lé. Rébéka yara a é nɔnɔmi, amalé Izak kana a fele ma léé, ’é na lé, dé ana munu é da ’é gyɛ Rébéka we ma.

⁸ Izak mɔn tɛrɛ ’ko la. Yi do nya Filisitinu nwiinzan Abimélɛk a nagini fɛnɛti ta yé é Izak ye blɛn glewona é na Rébéka va.

⁹ Abimélɛk mi pa zia Izak laana yé é léé: I na lé, webozen nya. Mɛmalé i léé, ’é buru léé? Izak lé a lɛ léé: An kana, dé an da ga le ’ko we ma, amalé maa fe.

¹⁰ Abimélɛk léé: Mɛ lé bé kɛlɛ ko lɛ ’koo? Dé é kɛlɛ kɔɔn léé, ko va mi do yia i na va ’té i we dɔ ko nwiin.

¹¹ Abimélɛk dére fe munu faa lɛ léé: Mian é bɛ mane gɔné ’ko ma, ɛɛ, dé a na lé, a ma, wo dan ’bɛzan gyɛ lɛ.

Izak valé Abimélɛk lé we

¹² Izak féi pa ana tɛrɛ la. Gakelebale dɔ a zi, amalé ’bɛ lɛɛ ’ko gi alé féi fɛ dɔ, é gié é glɛ ta gɔnɔ yɔ soru.

¹³ Gɔné ’ko fua ble yé alé fɛ kɛlɛle di gi gyɛ fɔɔ ye é kɛlɛ fuablezan blɛɛn nya.

¹⁴ Alé trubɛnu a, diri valé ’blanu nya, yé a wuomunu a di. Amalé Filisitinu bli bɔ alé fɛnu ma.

¹⁵ ’Yigurunu faa lé Izak ti lé nyanamapamunu a bo a ti Abraam bléyi va, Filisitinu fɛ zén wo gi yé wo wo fan tɛrɛ nya.

¹⁶ Abimélɛk lé Izak lɛ léé: Bii a plɛplɛ é mini ko la, bɛwemalé ’i go, ’i si ko va.

¹⁷ Izak si ana mi, yé é nyana Géraa gɔ worona yé é vo ’bɛna.

¹⁸ ’Yigurunu lé wa bo Izak ti Abraam bléyi va yé Filisitinu wo fan tɛrɛ nya Abraam gale zuo, Izak wo gi si é ziin. Tɔnu lé a ti a pa wo ma é kyɛn, yee tɔnu duo lé é a pa wo ma.

¹⁹ Izak wuomunu ’yiguru bo é ziin gɔ worona, yé ’yi lé é ’ka bélié lo, wa ye ’bɛna.

²⁰ Géraa munu lé trubɛ tabinmunu za vɔ Izak lé trubɛ tabinmunu va yé wo léé: ’Yi ’ko, kozé lé. Wo za vɔ a ta, bɛwemalé é ’yiguru ’ko tɔ pa Ézɛk.

²¹ Alé nyanamapamunu ’yiguru dɛrɛ bɛ bo, yé wo za vɔ ’bɛ ta é ziin yé é a laa Sitina.

²² É si ’bɛna yé é ’yiguru do bo é ziin, yé wo ’ka za vɔ lɛ ’bɛ ta é dɛrɛ lo. É a tɔ pa Réobɔt yé é léé: Sin, Gakelebale fɛna nɔ ko lɛ, yé ko dan fua ble lɛ ’bɛ tɛrɛ ’ko la.

²³ É fwi ’bɛna yé é go Bɛɛ‐Sééba.

²⁴ Gakelebale bɔra a va é béli yé é léé: Maa a i ti Abraam zé Bale nya. Té i kana lo ma, maa a i va. Maa dan i drɔɔ vo lɛ, yé maa dan i kulu kɛlɛ lɛ di an wuozan Abraam lé we ma.

²⁵ É balebanna do kɛlɛ ana yé é Gakelebale tɔ laa ’bɛna yé élé sɔkɔn dɔ ana. Izak wuomunu ’yiguru do bo ana.

²⁶ Abimélɛk koo, a béé Auzat koo, alé sunyanu nwiinzan Pikɔl koo, wo si Géraa yé wo da Izak va.

²⁷ Izak lé wo lɛ léé: Mɛwemalé ka dan an vaa? An za a ka gi, yé ka an bin ka va.

²⁸ Wo léé: Ko a ye léé, Gakelebale a i va. Bɛwemalé ko léé, kaa bale ’nyɔɔn kaa ke lɛ, yé kaa gi é vo ékeva do.

²⁹ ’I bale ’nyɔɔn léé, ’é ’ka dan wenyané do kpen kɛlɛ lɛ ko lɛ lo, fɛan zo lé ko ’ka wenyané kɛlɛ lɛ i lɛ lo, yé ko wezin saa kɛlɛ i lɛ, yé ko zi nɔ i lɛ léé, i go drɔɔ bɛ, a zo. Sin, Gakelebale i drɔɔ vo.

³⁰ Izak fɛti kɛlɛ wo lɛ yé wo fɛ ble yé wo ’yi mini.

³¹ Wo nwa bladi tutu yé wo dére pa ékema do bale ’nyɔɔnle nya. Izak zi nɔ wo lɛ, yé wo si a va drɔɔ.

³² A yi duo nya Izak lé nyanamapamunu da, ’yiguru lé wa bo, alé we fe lɛ a lɛ, yé wo lé a lɛ léé: Ko ’yi ye.

³³ É a tɔ pa Siiba, bɛwemalé wo ’bɛ fla laama Bɛɛ‐Sééba fɔɔ kyɔ.

³⁴ Ézau lɛɛ kɛlɛ aan wo yɔ fié yé é le si; Et mi Bééri lu Judit a do, yé Et mi Élɔn lu Bazmat a do.

³⁵ Izak valé Rébéka bli gi kyɛ dɔ lomu ’konu lé we ma.