Wepélisiananu 25 - Kazambale lé Sebe Sauunu 1979

Abraam gale

¹ Abrama le do si é ziin, wa laama Kétura.

² Zimiram koo, Jɔkisan koo, Médan koo, Madian koo, Jisibak koo, Suas koo, é wonu yaa a lɛ.

³ Jɔkisan Séba valé Dédan yaa. Asisuunu koo, Létusinu koo, Léuminu koo, Dédan benu lé ke wo nya.

⁴ Éfa koo, Éfɛɛ koo, Énɔk koo, Abida koo, Eldaa koo, wa Madian benu nya. Kétura benu faa lé ke bɛ.

⁵ Abraam élé fɛnu faa nɔ Izak lɛ.

⁶ É blɛ kɛlɛ é bwɛnu benu lɛ; bléyian va lé é a tan é yuɛma é wo pa zia é be Izak ma baa yirinwanazia tɛrɛnu la.

⁷ Abraam lɛɛ lé ke ’ko: é lɛɛ kɛlɛ tɛrɛ la yɔ sɔraa wɔlɛ vu ta soru.

⁸ Abraam ga é kwa ta gi nanale nya. É a kwa yé a lɛɛ kɛlɛ kiɛre yé é go élé munu va.

⁹ A benu Izak valé Ismaɛl a pa Makipéla gɔmaguru gi, Et mi Sosaa be Éfrɔn lé féi, Mamré yara.

¹⁰ Féi lé Abraam a lɔ Et benu lee, yee lé. Ana lé wo Abraam valé é na Sara pa.

¹¹ Abraam gale zuo, Bale a be Izak drɔɔ vo. É nyana Lakai‐roi ’yiguru sɔnɔ.

Ismaɛl kulunu

¹² Abraam be Ismaɛl lé, Sara wuole Éjipiti le Agaa a yaa Abraam lɛ, a kulu lé ke ’ko:

¹³ Ismaɛl benu tɔnu lé ke ’ko, wo kulu la tɔnu lé ke ’ko: Ismaɛl né vininzan Nébajɔt koo, Kédaa koo, Adébéél koo, Mibisam koo,

¹⁴ Misima koo, Duma koo, Masa koo,

¹⁵ Adad koo, Téma koo, Jétuu koo, Nafis koo, Kédima koo, woo lé.

¹⁶ Ismaɛl benu lé ke bɛ. A zo lé wo tɔnu ke wolé kɔn ma kɔn ma, é valé wo gɔnɔ ma gɔnɔ ma. Wo kɛlɛ ’wolé munu guniwuo vu ta fié nya.

¹⁷ Ismaɛl lɛɛ kɛlɛ lɛɛ yɔ suiɛdo wɔlɛ vu ta sɔrafié. É ga, yé é go élé munu va.

¹⁸ A benu nyanale glɛ si fɔɔ Avila yé é bɔ Sure, yee lé ke Éjipiti yara bɛ, ’té dé i a gona Asiri zia. É kɛlɛ mi nya é bwenu faa méléna.

Izak be fiénu

¹⁹ Abraam be Izak kulu lé ke ’ko:

²⁰ Abraam Izak yaa. Izak Rébéka si aan wo é na nya, ’té a lɛɛ a yɔ fié; a na a Aramézan Bétuɛl lé é si Padan‐Aram, a lu nya; é a Aramézan Laban buru nya.

²¹ Izak na a sɔn le nya, amalé Izak zanté vɔ Gakelebale lɛ alé we ma. Gakelebale a ’ma, yé Izak na Rébéka bɔn si.

²² Nénu a guli danna a bɔn gi yé é léé: Dé é a a zo, mɛwemalé maa bɔn sii? Yé é go a gi laa lɛ Gakelebale lee.

²³ Gakelebale lé a lɛ léé: Bɛn fié a i bɔn gi; dé i wo yaa tɔɔn wo dan kini lɛ ékema migɔnɔ fié nya. Bɛn do é dan kɛlɛ lɛ plɛplɛ yé é mini é bɔluzan ta yé a segelezan é dan pla lɛ a kiénézan wuo.

²⁴ Alé né yaa yi bɔ aan wo yé bé ye, fiané a a bɔn gi.

²⁵ A vininzan bɔra é tɛn bélé wikyɛɛsɔ zo. Wa tɔ pa Ézau.

²⁶ A zuo a zuané bɔra, ’té a bɛ a é kunle Ézau ganetɛn ma. Wa tɔ pa Jakɔb. Bléyian va lé wo nénu ’ko yaa ’té Izak lɛɛ a yɔ yaa.

²⁷ Nénu ’ko tin; Ézau kɛlɛ lupazan zin nya, bwiizan nya. Jakɔb a mi drɔɔ nya, yé é vo sɔkɔnnu wuo.

²⁸ Bwiiwi blele sɔ Izak lɛ, amalé Ézau sɔ a lɛ; yé Jakɔb sɔ Rébéka lɛ.

²⁹ Yi do nya Jakɔb a fɛ dɔnena aan wo, Ézau si bwi gi, ’té a wɔlɛgi nyaa a ma é baba.

³⁰ Yé Ézau lé Jakɔb lɛ léé: Ilé zanté, an wɔlɛgi nyaa an ma. ’I fɛ sɔɔn ’ko nɔ an lɛ, maa ble; fɛ sɔɔn ’ko lé maa fe yé ’maa ble. Amalé wo Ézau tɔ do pa Édom.

³¹ Jakɔb léé: ’I dɔna dan an lee kyɔ.

³² Ézau léé: Bé ye, maa a gana; an dɔna é mɛ kɛla an lɛɛ?

³³ Jakɔb léé: ’I bale ’nyɔɔn faa ’lɛ. Yé é bale ’nyɔɔn a lɛ yé é ’é dɔna dan Jakɔb lee.

³⁴ Jakɔb buru valé zɔrɛ zian nɔ Ézau lɛ. É fɛ ble, yé é ’yi mini, ’bɛ zuo é nwa yé é go. ’Bɛ zo lé Ézau é dɔna ye fɛ pla nya.