Wepélisiananu 24 - Kazambale lé Sebe Sauunu 1979

Izak le si

¹ Abraam kɛlɛ é kwa yé a lɛɛ kɛlɛ kiɛre; yé Gakelebale Abraam drɔɔ vo we faa gi.

² Yé Abraam we fe é leezan do lé, é mɔn a va alé kɔn gi é mini é bɔlunu faa ta, ’té alé fɛnu faa bɛ ke é pale a lee bɛ, a lɛ, yé Abraam lé a lɛ léé: Ilé zanté, ’i bɛlaa wɔra an boro wuo;

³ Gakelebale lé ke lagi Bale valé tɛrɛ lé Bale nya, bé ’nyɔɔn léé, i ’ka dan le si lɛ an be na nya Kanaan munu lé maa nyanaan wo va ’ko, wo lunu va lo;

⁴ naa, i dan go lɛ anlé tɛrɛ la, an lelenu va, yé i dan le do si lɛ an be Izak na nya wo va ’bɛna.

⁵ A leezan lé a lɛ léé: Dé lezan ’ka a nyi si lɛ léé, ’é dan an zuo tɛrɛ ’ko la lo nii? É a lé an go i be nya, tɛrɛ lé i si a ta bɛ, anaa?

⁶ Abraam lé a lɛ léé: ’I yuɛ pa ibozen va é zima; té i go an be nya ’bɛna lo.

⁷ Gakelebale, lagi Bale lé é an si an ti lé kɔn ’léé, é valé an lelenu va, ’té e we fe an lɛ yé ébo ’nyɔɔn an lɛ léé, ’é dan tɛrɛ ’ko nɔ lɛ an kulu lɛ, yeebozen é dan élé lanje nwunvɔ lɛ i ’lɛ; yé i dan le do si lɛ an be na nya ’bɛna.

⁸ Dé é ’ka sɔ lɛ lezan lɛ léé, ’é da i zuo lo, ilé bale lé bé ’nyɔɔn an lɛ bɛ, ’té i so a gi. Naa, duowo, té i go an be nya ’bɛna lo.

⁹ Abraam leezan é bɛlaa wɔra ézan Abraam boro wuo, yé é bale ’nyɔɔn léé, ’é dan we ’konu faa kɛlɛ lɛ.

¹⁰ Abraam leezan lé, azan lé fɛnu faa bɛ ke é pale a lee bɛ, é nyɔgɔmé si vu ézan lé nyɔgɔménu va yé é go. É nwa yé é go Mézopotami, Nakɔɔ lé fla.

¹¹ É nyɔgɔménu zun wo powuo ta flagini ma, ’yiguru sɔnɔ, é nyanadi, lomu lé ’yitɔbléyi va.

¹² Yé é léma: Gakelebale, anzan Abraam zé Bale, ilé zanté, we lé an bli bɔ a ma, bé kɛlɛ an lɛ kyɔ ma, yé ’i wezin kɛlɛ anzan Abraam lɛ ma.

¹³ Bé ye, maa a é dɔle ’yiguru sɔnɔ yé fla blɛnnu é dan bɔra lɛ ’yi tɔle we gi.

¹⁴ Dé maa fe blɛnzan‐an lɛ léé, ilé zanté, ’ilé ’yibɔ tua yé maa ’yi mini, yé é a zi pa léé, ’i ’yi mini yé maa dan ’yi nɔ lɛ é ziin ilé nyɔgɔménu lɛ, ’bɛ blɛnzan ’é kɛlɛ blɛn lé bé si a va i wuozan Izak zé nya, a nya. ’Bɛ nya lé maa dan a gi dɔɔ lɛ léé, i wezin kɛlɛ anzan lɛ.

¹⁵ É ’ka tan nyaa lɛ wefele nya lo tɔɔn yé Rébéka bɔ a ma élé bɔ nya é bɛapa ta. Abraam bwe Nakɔɔ na Milka be Bétuɛl lu lé.

¹⁶ É a blɛn nya, é yara nya é nɔnɔmi; gɔné do kpen ’ka tan a dɔɔ lɛ le nya lo. É zun ’yiguru gi yé é ’yi fan bɔ nya, yé é bɔra a gi loru.

¹⁷ Abraam leezan vlan buru a ’lɛ yé é léé: ’I ’yi nɔ an lɛ, maa mini.

¹⁸ É bɔ zun tuo, yé é a pa é lee, yé é léé: Anzan, ’i ’yi mini, yé é ’yiminile nɔ a lɛ.

¹⁹ Yee blɛn nyaa aan wo ’yiminile nɔle nya a lɛ, é léé: ’Maa ilé nyɔgɔménu zé tɔ é ziin, ’wa mini yé wo kan a nya ma.

²⁰ Élé bɔ gi ’yi zén winu lé ’yiminifɛ gi é kele yé é go vlan nya ’yiguru gi é ziin yé é ’yi tɔ nyɔgɔménu faa zé nya.

²¹ Gɔnézan vo a naginina gi vurule nya, yé é ’ka we do kpen si lɛ a ta a zi lo; dé Gakelebale alé tawogiwe vɔ a maa? dé é ’ka a vɔ lɛ a ma loo? a yele we ma.

²² Nyɔgɔménu nyaa ’yi minile nya aan wo, gɔnézan nyémakyan si, ’té a bɛn a sikla buu nya, yé é bɛmafɛ fié si, ’té ’bɛ bɛn a kyan sikla vu nya, yé é a nɔ blɛnzan lɛ

²³ yé é léé: De lu lé ke i nyaa? Bé fe an lɛ. An bɔaléé, an yiina ye i ti lé kɔn gii?

²⁴ É léé: Maa a Milka valé Nakɔɔ be Bétuɛl lu nya.

²⁵ Yé é lé é ziin léé: Lɔɔ valé winu lé fɛblele a ko va di, yé yiina ana é ziin.

²⁶ Yé gɔnézan bua, yé é dia é bli la Gakelebale ’lɛ,

²⁷ ’té é a fé léé: ’Wo Gakelebale drɔɔ vo ma; anzan Abraam lé Bale lé; é ’ka daan é nyanai zénle ma anzan ta lo, ’té é alé we kɛla yarapalale nya. Maabozen, Gakelebale da maa nya anzan bwenu lé kɔn’léé.

²⁸ Yé blɛnzan go vlan nya we ’konu zuo fe lɛ ’é bu lɛ kɔn gi.

²⁹ Rébéka bwe do ana wa laama Laban. Yé Laban go gɔnézan si lɛ zia vlan nya, ’té é a é dɔle ’yiguru sɔnɔ.

³⁰ É nyémakyan ye, yé é bɛmafɛnu ye é zuané bɛ ma, yé we lé a zuané Rébéka a fe léé, ’ko zo lé gɔnézan we fe ’é lɛ bɛ, é a ’ma; amalé é go gɔnézan va, ’té ’bɛ a é dɔle nyɔgɔménu va, ’yiguru sɔnɔ

³¹ yé é léé: Bii lé Gakelebale i drɔɔ vo, ’i da. Mɛmalé i vo béeraa? Maa kɔn ma’lɛrɛ yé maa nyɔgɔménu lé fɛna ma’lɛrɛ.

³² Gɔnézan bɔ kɔn ’léé. Laban kɔné si nyɔgɔménu punu yé é lɔɔ valé fɛblele nɔ nyɔgɔménu lɛ, yé é gane ma zuru ’yi nɔ gɔnézan valé é vamunu lɛ.

³³ ’Bɛ zuo é fɛblele nɔ wo lɛ. Naa, gɔnézan léé: Maa ’ka dan fɛ ble lɛ lo, ’té dé an ’ka tan an damawe gi fe lɛ lo. Laban léé: Bé fe.

³⁴ Yé é léé: Maa a Abraam leezan nya.

³⁵ Gakelebale anzan drɔɔ vo é baba yé é kɛlɛ plɛplɛ. ’Blanu valé dirinu koo, gɔɔlifu valé kyan koo, nyanamapagɔnénu valé nyanamapalomu koo, nyɔgɔménu valé sokofalenu koo, Bale a nɔ anzan lɛ.

³⁶ Anzan na Sara négɔné yaa anzan lɛ alé kwa ta né nya; yé é élé fɛ faa nɔ a lɛ.

³⁷ Anzan lé an lɛ léé, ’maa bale ’nyɔɔn ’é lɛ léé, Kanaan munu lé éé nyanaan wo va bɛ, té maa wo va le si é be na nya lo,

³⁸ naa, ’maa go ’é ti lé kɔn’léé, yé ’maa le do si ’é be na nya ’élé munu va.

³⁹ Yé maa lé anzan lɛ léé, dé é ’ka sɔ lɛ lezan lɛ léé, é da an zuo lo nii?

⁴⁰ Yé é lé maa lɛ léé, Gakelebale lé ’é tawo a ’lɛ, é dan ’élé lanje do pa lɛ maa va, yé anlé tawowe é dan vɔ lɛ a ma, yé an le do si ’é be na nya ’é ti lé kɔn gi, ’é ti lé munu va.

⁴¹ É léé, dé an si élé munu va faa, ’té bale lé maa ’nyɔɔn ’é lɛ bɛ, ’té an so a gi, yé dé ’élé munu ’ka le nɔ lɛ an lɛ lo, ’té bale lé maa a ’nyɔɔn ’é lɛ bɛ, ’té an so a gi.

⁴² An bɔ kyɔ ’yiguru ta yé maa léé: Gakelebale, anzan Abraam zé Bale, dé é sɔ i lɛ léé, anlé tawogiwe ’é vɔ a ma,

⁴³ bé ye, maa a é dɔle ’yiguru ’ko sɔnɔ; dé blɛnzan‐an da ’yi tɔ lɛ yé dé maa fe a lɛ léé, ’i ’yi nɔ an lɛ maa mini, dé é a fe léé,

⁴⁴ ’i ’yi mini yé ’maa ’yi tɔ é ziin ilé nyɔgɔménu zé nya, ’bɛ blɛnzan ’é kɛlɛ le lé Gakelebale a si a va anzan be na nya, a nya.

⁴⁵ An ’ka tan nyaa lɛ wefele nya an bli gi lo tɔɔn, Rébéka bɔ an ma élé bɔ nya é bɛapa ta; é zun ’yiguru gi yé é ’yi tɔ. Maa lé a lɛ léé, ’é yi nɔ an lɛ, maa mini.

⁴⁶ Élé ’yibɔ si é bɛapa ta tuo yé é léé, ’an ’yi mini yé é dan ’yiminile nɔ lɛ anlé nyɔgɔménu lɛ é ziin. An ’yi mini, yé é ’yiminile nɔ anlé nyɔgɔménu lɛ é zii.

⁴⁷ Maa we laa a lee léé, de lu lé ke i nyaa? É léé, ’é a Nakɔɔ valé Milka be Bétuɛl lu nya. Yé maa kyan vɔ a nyé ma, yé maa kyan vɔ a bɛ ma.

⁴⁸ A zuo maa bua yé an dia an bli la Gakelebale ’lɛ yé maa Gakelebale anzan Abraam zé Bale drɔɔ vo; é da an nya yarapalale nya, anlé anzan bwe lu sile a be na nya we gi.

⁴⁹ Sin, dé é sɔ ka lɛ léé, ka wezin valé we tegele kɛlɛ anzan lɛ, ’ka fe an lɛ, dé é ’ka sɔ lɛ ka lɛ lo, ’ka fe an lɛ yé an nɔla, dé an bɛyilazia léé, dé an bɛbolazia léé, ana.

⁵⁰ Laban valé Bétuɛl léé: We ’ko si Gakelebale va. Dé é a wezin nyaoo, dé é a wenyané nyaoo, ko ’ka bɔa we do kpen fele lɛ a gi lo.

⁵¹ Bé ye, Rébéka lé é dɔle bɛ, bé si i goan yé ’é kɛlɛ izan be na nya, Gakelebale a fe fɛan zo, a zo.

⁵² Abraam leezan wo dére ’ma aan wo é dia é bli la Gakelebale ’lɛ.

⁵³ Gɔɔlifufɛnu koo, kyanfɛnu koo, sɔnu koo, Abraam leezan wo bɔra yé é wo nɔ Rébéka lɛ; é fuafɛnu nɔ é ziin a bwe valé a bu lɛ blan nya.

⁵⁴ ’Bɛ zuo yee valé é vamunu fɛ ble yé wo yii. Dé tu kini, wo nwa yé Abraam leezan léé: ’Ka zi nɔ an lɛ ’an go anzan va.

⁵⁵ Blɛnzan bwe valé a bu léé: Blɛnzan ’é vo ko va sɛ é ziin ma, dé yi vu léé? a zuo yé i go.

⁵⁶ É lé wo lɛ léé: Gakelebale anlé tawogiwe vɔ a ma, amalé té ka an mɔn lo ma; ’ka zi nɔ an lɛ yé an go anzan va ma.

⁵⁷ Yé wo léé: Kaa blɛnzan laa, ’wo we laa a lee.

⁵⁸ Wo Rébéka laa yé wo lé a lɛ léé: É sɔ i lɛ léé, i go gɔné ’ko vaa? É léé: ’An go.

⁵⁹ Yé wo zi nɔ ’wo zuané Rébéka valé le lé ’bɛ a pa é kyɛn, wo lɛ, yé wo go Abraam leezan valé é vamunu nya.

⁶⁰ Wo Rébéka drɔɔ vo yé wo lé a lɛ léé: Oo, ko zuané, ’i kɛlɛ mi baa wuru é wuru bu nya, yé ilé nénu é pla ’wo nyanézannu nwiin ma.

⁶¹ Rébéka valé é wuolomu nwa; wo vɔ nyɔgɔménu punu yé wo go gɔnézan zuo. Yé Abraam leezan Rébéka si yé wo go.

⁶² Izak si Lakai‐roi ’yiguru va yé é nyana tɛrɛ lé ke yirinwana bɛyilazia, ana.

⁶³ Yi do é nyanadi Izak go bazoro lɛ féi, yé é yara nwa yé é a nagini yé bé ye, nyɔgɔménu a dana.

⁶⁴ Rébéka é ziin, é yara nwa loru yé é Izak ye, yé é zun élé nyɔgɔmé punu.

⁶⁵ É lé Abraam leezan lɛ léé: Mi lé ke sina féi yé kaa go kee lɛ wo nya bɛ, de léé? Abraam wuozan léé: Anzan lé. Yé Rébéka sɔ bua é wuo ma.

⁶⁶ We faa lé Abraam leezan a kɛlɛ, é a zuo faa fe Izak lɛ.

⁶⁷ Izak go Rébéka nya é bu Sara lé sɔkɔn gi; é Rébéka si é na nya, yé é sɔ a lɛ. ’Bɛ kɛlɛ Izak tɔrɔpaawe nya a bu gale zuo.