Wepélisiananu 22 - Kazambale lé Sebe Sauunu 1979

Kazambale Abraam gi dan

¹ We ’konu zuo Kazambale Abraam gi dan yé é lé a lɛ léé: Abraam. Yé é léé: Maa lo.

² Yé Kazambale léé: ’I be si; i be wɔlɛ do kpen lé é ke Izak nya, ’té é sɔ i lɛ é baba bɛ, bé si yé ’i goan Morija tɛrɛ la yé gɔnu va gɔ do lé maa dan a gɔɔn lɛ i lɛ, bé kyɛ ble an lɛ blɛ nya a nwiin.

³ Abraam nwa bladi tutu, é nyanatafɛ pla élé sokofale punu yé é ’é wuomunu fié valé é be Izak si. É kyɛ fén gyɛ balebanwi kyɛblele we ma yé wo nwa yé wo go fɛ lé Kazambale a fe a lɛ, ana.

⁴ Wo tawo yi fié a yi yaazan nya Abraam é yuɛ vɔ é ’lɛzia yé é ana ye baa.

⁵ Yé Abraam lé é wuomunu lɛ léé: ’Ka vo sokofale va ’ko; maa valé pɛniɛ ’é dan go lɛ fɔɔ mi, yé ko Bale bɔ, ’bɛ zuo yé ko dan da lɛ ka va é ziin.

⁶ Abraam balebanwi kyɛble kyɛdin si yé é a dɔ Izak nwiin, ’té kyɛléékyɛ valé sɛnné a yeebozen lee. Yé wo fiénu vo tawona ékeva.

⁷ Yé Izak lé é ti Abraam lɛ léé: An ti. Yé ’bɛ léé: An be, maa lo. Yé Izak léé: Kyɛléékyɛ valé kyɛdin a ko lee ’ko, naa, ’blané lé wa kyɛ blé, é a kyɛɛn?

⁸ Abraam a zi pa léé: An be, Kazambale boen é dan ’blané nɔ lɛ é boan, yé wa kyɛ ble. Yé wo fiénu vo tawona ékeva.

⁹ Wo bɔ aan wo fɛ lé Kazambale ana fe Abraam lɛ, ana, Abraam balebanna do kɛlɛ ana, yé é kyɛ fén pla balebanna ta. Yé é ’é be Izak yere yé é a pla balebanna ta, kyɛ ta loru.

¹⁰ ’Bɛ zuo Abraam sɛnné sia é be bɔrɔ bole we gi.

¹¹ Yé Gakelebale lé lanje a laa la gi yé é léé: Abraam! Abraam! Yé é léé: Maa lo.

¹² Lanje léé: Té i bɛ mane né ma lo; té i we do kpen kɛlɛ a lɛ lo; naa, sin maa a gi dɔɔ léé, i kanaan Kazambale lee yé i ’ka i be wɔlɛ do kpen Izak nyané kɛlɛ lɛ an lɛ lo.

¹³ Abraam é yara nwa yé é ’blagɔné do ye é zuo, ’té a béli fié a é kuale yiliné ma; yé Abraam go yé é ’blagɔné si yé é a kyɛ ble Bale blan nya é be pa gi.

¹⁴ Abraam fɛkona tɔ pa Jéova‐Jiré. Bɛwemalé sin wa fé léé: ’Bɛ we a Bale lee, ’bɛ gi léé, fɛ lé i mawe ke a gi, Bale é dan a nɔ lɛ.

¹⁵ Gakelebale lé lanje Abraam laa la gi a gɔnɔ fiézan nya,

¹⁶ yé é léé: I we ’ko kɛlɛ yé i ’ka i be wɔlɛ do kpen nyané kɛlɛ lɛ an lɛ lo, amalé maa, Gakelebale dére lé, maa anbo ’nyɔɔn léé,

¹⁷ maa dan i drɔɔ vo lɛ yé maa dan i kulu kɛlɛ lɛ di bélé la gi monénénu zo, bélé wɛyi gɔɔn ma nyéné zo di; yé i kulu é dan pla lɛ é nyanézannu nwiin.

¹⁸ I an dére lɛdɔma, amalé tɛrɛla bɛnnu faa drɔɔ é dan vo lɛ i kulu pli zi.

¹⁹ Abraam nɔla é wuomunu va yé wo nwa yé wo go ékeva Bɛɛ‐Sééba; naa, yee Bɛɛ‐Sééba lé Abraam éé nyanaan.

²⁰ We ’konu zuo wo da a fe lɛ Abraam lɛ léé: Bé ye, Milka négɔnénu yaa i bwe Nakɔɔ lɛ.

²¹ Alé né vininzan Usi koo, ’bɛ zuané Buz koo, Aram ti Kémuɛl koo,

²² Kézɛd koo, Azo koo, Pildas koo, Jidilaf valé Bétuɛl koo,

²³ négɔné sɔraa lé Milka a yaa Abraam bwe Nakɔɔ lɛ, wo lé ke bɛ. Bétuɛl Rébéka yaa.

²⁴ Nakɔɔ bwɛ lé wa laama Réuma, ’bɛ né yaa é ziin. Tébak koo, Gaam koo, Taas koo, Maaka koo, woo lé.