Wepélisiananu 21 - Kazambale lé Sebe Sauunu 1979

Izak Yaale

¹ We faa lé Gakelebale a fe Sara lɛ, a sele dɔ Gakelebale gi yé blivolɛdére lé é a fe Sara lɛ léé, é dan a kɛlɛ lɛ é a lɛ sɔɔ.

² Sara bɔn si yé é né yaa gɔné nya Abraam lɛ kwa ta né nya, bléyi lé Bale a fe, a nya.

³ Né lé Sara a yaa Abraam lɛ, é a tɔ pa Izak.

⁴ Abraam é be Izak gane dɔ a yi sɔraazan nya, Kazambale a fe a lɛ fɛan zo, a zo.

⁵ Bléyian va lé wo Abraam be Izak yaa, ’té Abraam lɛɛ a yɔ soru.

⁶ Sara léé: Kazambale ginanawe kɛlɛ an lɛ. Dé miomian é anlé yéri sile ’ma, é dan yéri si lɛ an va gi nanale nya.

⁷ É lé é ziin léé: De ɛ dan fe lɛ Abraam lɛ kɔɔn léé, Sara é dan nyɔ dɔ lɛ né ’léé? Naa, duowo maa négɔné do yaa a lɛ, alé kwa ta gi.

Abraam Agaa valé Ismaɛl pa zia

⁸ Né tin yé é si nyɔ ma; Abraam fɛti blɛn kɛlɛ Izak sié nyɔ ma yi nya.

⁹ Sara a ye léé, négɔné lé Éjipiti le Agaa a yaa Abraam lɛ, é yéri si,

¹⁰ yé é lé Abraam lɛ léé: ’I wuole ’ko valé é be bin; naa, wuole ’ko, a be valé an be Izak ’ka dan i zara ble lɛ ékeva lo.

¹¹ Dére ’ko a Abraam yuɛ gi we plɛplɛ nya, é be lé we ma.

¹² Naa, Kazambale lé Abraam lɛ léé: Wuole valé né lé we ’ko, té é kɛlɛ i yuɛ gi we plɛplɛ nya lo. We faa lé Sara a fe i lɛ, bé kɛlɛ; naa, Izak gi lé i kulu bozen é dan si lɛ.

¹³ I wuole be ’ko, i be lé; naa, maa dan a kɛlɛ lɛ bɛngɔnɔ do nya é ziin.

¹⁴ Abraam nwa bladi tutu; é buru si yé é ’yi fan wikɔlɛkuo nya yé é wo nɔ Agaa lɛ yé ’bɛ a dɔ ’é bɛapa ta. Yé Abraam né nɔ a lɛ é ziin, yé é a pa zia. Lezan go yé é vo nɔɔna bwi lé wa laama Bɛɛ‐Sééba, a gi.

¹⁵ ’Yi nyaa aan wo kuo gi, é né vo yilinénu wuo,

¹⁶ yé é nyana a yara zia baa bélé mi éé sa vulian yé a wɔlɛ é dia fɛana bɛ, ana zo; naa, é léé: Anlé né ’ko, té maa ’bɛ gana ye lo. Amalé é nyana ana mi a yarazia, yé é dére bié wuvɔle nya.

¹⁷ Kazambale né dére ’ma; yé Kazambale lé lanje Agaa laa la gi yé é lé a lɛ léé: Agaa, mɛ léé? Té i kana lo, naa, fɛana lé né ke bɛ, Kazambale a dére ’ma.

¹⁸ ’I nwa, ’i né si, bé kun i bɛ nya; naa, maa dan a kɛlɛ lɛ bɛn blɛn do nya.

¹⁹ Yé Bale a yuɛ fuo yé é ’yiguru ye; é go yé é ’yi fan kuo nya yé é a nɔ né lɛ, yé ’bɛ a mini.

²⁰ Kazambale a né va, yé é tin yé é nyana bwi gi yé é kɛlɛ sadunzan nya.

²¹ É nyana Paran bwi la, yé a bu Éjipiti le do pa a lee a na nya.

Abraam valé Abimélɛk lé we

²² ’Bɛ bléyi va Abimélɛk élé sunyanu nwiinzan Pikɔl pa é va yé é go yé é lé Abraam lɛ léé: Kazambale a i va ilé we faa kɛlɛle gi.

²³ ’I bale ’nyɔɔn an lɛ sin fɛkona léé, maa koo, anlé nénu koo, an nénénu koo, i ’ka dan dabli kɛlɛ lɛ ko do kpen lɛ lo, naa, maa wezin kɛlɛ i lɛ fɛan zo, i dan wezin kɛlɛ lɛ maa valé tɛrɛ lé i nyana a ta bɛn nya bɛ, ko lɛ, a zo.

²⁴ Abraam lé a lɛ léé: Maa dan a ’nyɔɔn lɛ.

²⁵ Yé Abraam we pla Abimélɛk lɛ, ’yiguru lé Abimélɛk lé nyanamapamunu a si gla nya, alé we ma.

²⁶ Abimélɛk léé: Dé mi kyɛɛn ɛ we ’ko kɛlɛɛ? maa ’ka tan we ’ko ’ma lɛ lo; yé i ’ka a zuo fe lɛ an lɛ pelo. Kyɔ lé maa a ’ma bɛ.

²⁷ Yé Abrama ’blanu valé dirinu si yé é wo nɔ Abimélɛk lɛ, yé wo fiénu ’wo gi pa do.

²⁸ Abraam ’bla boroné sɔrafié pa é yɛrama.

²⁹ Yé Abimélɛk lé Abraam lɛ léé: ’Bla boroné sɔrafié lé bé pa é yɛrama bɛ, ’bɛ gi lé nɔɔ?

³⁰ É a zi pa léé: ’I ’bla boroné sɔrafié ’ko si an lee yé ’é kɛlɛ anayefɛ nya léé, maa ɛ ’yiguru ’ko bo.

³¹ Bɛwemalé wo fɛkona laama Bɛɛ‐Sééba; naa, wo bale ’nyɔɔn ’wo ke lɛ ’bɛna.

³² ’Bɛ zo lé wo fiénu ’wo gi pa do Bɛɛ‐Sééba. ’Bɛ zuo Abimélɛk valé élé sunyanu nwiinzan Pikɔl nwa yé wo go Filisiti munu lé tɛrɛ la.

³³ Abraam tamarisi yilinu suru Bɛɛ‐Sééba; yé Gakelebale lé ke lɛɛfaama Bale nya, Abraam a tɔ laa ’bɛna.

³⁴ Abraam mɔn Filisiti munu lé tɛrɛ la.