Wepélisiananu 20 - Kazambale lé Sebe Sauunu 1979

Abraam go Géraa tɛrɛ la

¹ Abraam si ’bɛna yé é go yirinwana bɛyilazia; é nyana Kadɛs valé Suré méléna yé é nyana Géraa sɛ.

² Abraam léé, ’é na Sara a ’é buru nya. Géraa mununwiinzan lé wa laama Abimélɛk, é Sara si.

³ Kazambale da Abimélɛk va nyɛ fla é béli yé é lé a lɛ léé: Lezan lé bé si bɛ, i dan ga lɛ alé we ma, naa, a zana a.

⁴ Abimélɛk ’ka tan mane lɛ lezan ’ko ma lo, yé é léé: Mizan, i zamaga dɔa bɛn tegele nwiin?

⁵ Gɔnézan ’ka a fe lɛ an lɛ léé, ’é buru lé, loo? Yé lezan bozen ’ka a fe lɛ léé, ’é bwe lé, loo? An we ’ko kɛlɛ an bli gi fu valé an bɛ ma bɔle nya.

⁶ Kazambale lé a lɛ nyɛ fla léé: Maa a gi dɔɔ léé, i we ’ko kɛlɛ i bli gi fu nya. Maa é ziin, maa ilé wenyané kɛlɛle an ma yi ga. Bɛwemalé maa ’ka zi nɔ lɛ i lɛ léé, i bɛ mane a ma lo.

⁷ Sin, ’i lezan nɔ gɔnézan ’ko lɛ é pai; naa, é a balelayezan nya yé é dan bazoro lɛ i tɔ ma yé i dan béli lɛ. Naa, ’i we ’ko gi dɔɔ ma: dé i ’ka a nɔ lɛ lo, i dan ga lɛ, bii valé ilé munu faa nya.

⁸ Abimélɛk nwa bladi tutu, yé é wuomunu faa laa yé é we ’konu faa zuo fe wo lɛ; yé kana blɛɛn zén munu ’konu gi.

⁹ Abimélɛk Abraam laa é ziin yé é lé a lɛ léé: Mɛ we lé bé kɛlɛ ko lɛ koo? Mɛ we lé maa kɛlɛ i lɛ yé é ’na i ma yé i maa valé anlé munu vɔ ’bɛ zo wenyané blɛn gii? We lé bé kɛlɛ an lɛ bɛ, mi ’ka a kɛla lo.

¹⁰ Yé Abimélɛk lé Abraam lɛ léé: I gi bɔrɔ kaa yé i ’bɛ zo we kɛlɛɛ?

¹¹ Abraam a zi pa léé: Maa lé an bli gi léé, webozen lé, tɛrɛ ’ko la munu ’ka kanaan Bale lee lo, yé wo dan an gyɛ lɛ an na lé we ma.

¹² ’Bɛ ta loru, é a an buru nya webozen nya; é a an ti lé né nya, naa, é ’ka an bu lé né ɛ nya lo; yé é kɛlɛ an na nya.

¹³ Bléyian va lé Kazambale an si an ti lé kɔn ’léé yé an go baa, maa lé Sara lɛ léé, ’é wezin kɛlɛ an lɛ, dé ko go fɛofɛana, ’é a fe an ma léé, ’é bwe lé ke an nya.

¹⁴ ’Blanu koo, dirinu koo, nyanamapamunu valé nyanamapalomu koo, Abimélɛk wo nɔ Abraam lɛ; yé é a na Sara nɔ a lɛ é ziin.

¹⁵ Abimélɛk léé: Bé ye, anlé tɛrɛ faa a i ’lɛ; dé fɛana sɔ i lɛ ’i nyana ana.

¹⁶ Yé é lé Sara lɛ léé: Bé ye, maa gɔɔlifu wɔlɛ yɔ soru nɔ i bwe lɛ; ’bɛ é dan kɛlɛ lɛ i ma folifɛ nya i vamunu faa yuɛ gi, yé i dan kɛlɛ lɛ tegele munu faa yuɛ gi.

^17-18 Abraam na Sara lé we ma Gakelebale Abimélɛk lé kɔn gi lomu faa kɛlɛ sɔnzannu nya turu. Amalé Abraam bazoro Kazambale lɛ yé Kazambale Abimélɛk béli, yee valé é na valé é wuolomu nya, yé wo kɛlɛ néyaazannu nya é ziin.