Wepélisiananu 2 - Kazambale lé Sebe Sauunu 1979

¹ ’Bɛ zo lé la valé é gifɛnu koo, tɛrɛ valé é tafɛnu koo, wo kɛlɛle lɛ sɔɔ.

² Kazambale élé nyanama lɛ sɔɔ a yi suiɛdozan nya; yé a yi sɔrafiézan nya é flin élé nyanama faa lé é a pa bɛ, a ma.

³ Kazambale yi sɔrafiézan drɔɔ vo, yé é a pa é yɛrama; yi ’ko nya lé é flin élé nyanama faa lé é a pa fɛ faa kɛlɛle nya bɛ, a ma, ’bɛzama.

⁴ La valé tɛrɛ pélisia fɛan zo, ’té Kazambale wo kɛlɛ fɛan zo, yee lé ke bɛ. Bléyian va lé Bale, Gakelebale tɛrɛ valé lanu kɛlɛ,

⁵ ’té féifɛ do kpen ’ka tan tɛrɛ la lo, yé zian do kpen gɔn ’ka tan bɔ lɛ féi lo; Bale, Gakelebale ’ka tan lɛɛ vinin da lɛ tɛrɛ la lo, yé mi do kpen ’ka ana yé ’bɛ féi pa lo, azama.

⁶ Naa, lolu éé sié tɛrɛ gi bélé tɛrɛ ta goi sile zo, ’té éé kɛla tɛrɛ la fɛfaana, ’té tɛrɛ éé kɛla a nya drɔɔdrɔɔ.

Édɛn féi

⁷ Bale, Gakelebale vun si yé é a kɛlɛ mi nya; é mibélifu fɛɛ a nyé ’léé yé mi kinin mi yuɛmale nya.

⁸ ’Bɛ zuo Bale, Gakelebale zianféi do pa yirinwanazia, fɛ lé wana laama Édɛn, ana, yé mi lé é a kɛlɛ bɛ, é ’bɛ nyana ’bɛna.

⁹ Yé Bale, Gakelebale yili gɔnɔ faa si tɛrɛ gi; yili nɔnɔmi lé wo poro ke blefɛ zimanu nya, wo gɔnɔ faa lé; mibéliyili a féi méléna, yé wezin valé wenyané vasiyili ana é ziin.

¹⁰ Yuu do lé a ’wuo si Édɛn, éé féi kɛla drɔɔdrɔɔ; dé é féi kini a blan si ziɛn.

¹¹ Wa blan vininzan laama Pisɔn; éé giéan Avila tɛrɛ faa zi; kyan a ’bɛna.

¹² Tɛrɛ ’ko la kyan a kyan tegele nya; délium gɔlɛ valé ɔnisigɔlɛ a ’bɛna é ziin.

¹³ Wa blan fiézan laama Giɔn; yee ɛ giéan Kus tɛrɛ faa zi.

¹⁴ Wa blan yaazan laama Idékɛl; éé yoroan Asiri tɛrɛ la yirinwanazia. A blan ziɛnzan lé ke Yufrat nya.

¹⁵ Bale, Gakelebale mi si yé é a nyana Édɛn féi, yuɛpale a va valé féi pale we gi.

¹⁶ Bale, Gakelebale é sɔnné gɔɔn mi lɛ ’ko zo: maa zi nɔ i lɛ léé, i féi yilinu faa poro ble;

¹⁷ naa, wezin valé wenyané vasiyili bɛ, té bé poro ble lo; dé bé ble yian ma, i gaan.

Le kɛlɛle

¹⁸ Bale, Gakelebale léé: Gɔné vole é do ’ka é zima lo; maa dan azozan do kɛlɛ lɛ a bɔavazan nya.

¹⁹ Gakelebale tɛrɛ si yé é a kɛlɛ tɛrɛlawinu valé lagi mianénu nya, yé é da wo faa nya gɔnézan va, dé é dan wo laa lɛ fɛan zo, yé é a gi dɔɔ, yé tɔ lé gɔnézan a pa fɛ yuɛmale faa ma, yé é vo wo tɔ nya.

²⁰ Flawinu koo, lagi mianénu koo, bwiiwinu koo, gɔnézan wo faa tɔ pa; naa, mi lé ke bélé yeebozen zo, a bɔavazan nya, é ’ka a ye lɛ ’bɛnu va lo.

²¹ Yé Bale, Gakelebale yi vɔ gɔnézan yuɛ la, yé yi go a nya baa; Gakelebale gɔnézan sɛewɔlɛ do si, yé é ana lɛ tan.

²² A sɛewɔlɛ lé Bale, Gakelebale a si gɔné gi bɛ, é a kɛlɛ le nya yé é goan gɔnézan va.

²³ Yé gɔnézan léé: U‐uun! Sin, mi ’ko wɔlɛ si an wɔlɛ va yé a nɛ si an nɛ va; é si gɔné gi amalé wo dan a laa lɛ, le.

²⁴ Bɛwemalé gɔné é dan si lɛ é ti valé é bu va, yé é dan péli vɔ lɛ é na va, yé wo fiénu é dan kɛlɛ lɛ mi do kpen nya.

²⁵ Gɔnézan valé é na a é porole, yé yara do kpen ’ka wo ’wuo ma ’bɛ we ma lo.