Wepélisiananu 19 - Kazambale lé Sebe Sauunu 1979

Sɔdɔm valé Gɔmɔɔ sɛrɛle

¹ Woo lanje fiéo, wo bɔ Sɔdɔm nyanadi bléyi va; ’té Lɔt a é nyanale Sɔdɔm gɔrɔ ’léé. Lɔt wo ye aan wo, é nwa wo sile zia we gi, yé é dia é bli la wo ’lɛ.

² A zuo é léé: Anzannu, kalé zanté, ’ka da ka wuozan lé kɔn ’léé, yé ’ka gane ma zuru yé ’ka yii; yé tɛlɛ ’ka nwa bladi tutu yé kalé zi sia. Wo lé a lɛ léé: Gba, ko dan yii lɛ béera.

³ Naa, Lɔt wo tunu fɔɔ yé wo da a va yé wo wɔra alé kɔn gi. Yé Lɔt fɛti kɛlɛ wo lɛ; yé buru lé lévɛn ’ka a va lo, é a kɛlɛ wo lɛ. Yé wo fɛ ble.

⁴ Wo ’ka tan yia lɛ lo yé flamunu, Sɔdɔm munu da, yé wo Lɔt lé kɔn zi lɛ sɔɔ; é sia nénu ma yé é bɔ mi segelenu ma, flamunu faa zén ékeva ’té.

⁵ Wo Lɔt laa, yé wo lé a lɛ léé: Munu lé wo wɔra ilé kɔn gi kyɔ nyanadi, wa kyɛɛn? ’I wo bɔra ko lɛ ’ko, yé ko wo dɔɔ gɔné nya.

⁶ Lɔt bɔra wo va kɔn ’léé, yé é kɔn lɛ tan é zuo.

⁷ É lé wo lɛ léé: An bwenu, kalé zanté, té ka wenaané kɛlɛ lo.

⁸ Ka ye, an lunu lé wo ’ka tan gɔné dɔɔ lɛ lo, wa fié. Maa dan da lɛ wo nya béera, yé we lé é sɔ ka lɛ, ’ka kɛlɛ wo lɛ, naa, munu ’ko a bɛn nya anlé kɔn gi, amalé té ka we do kpen kɛlɛ wo lɛ lo.

⁹ Wo léé: ’I si ana mi! Yé wo lé é ziin léé: Mi ’ko da bɛn nya yé sin é sɔ a lɛ léé, ’é kɛlɛ weblezan nya. Aa bɔn! Ko dan wenaané kɛlɛ lɛ i lɛ yé é mini wozé ta. Yé wo Lɔt nyunu plɛplɛ, yé wo bié duoli sɛrɛle we gi.

¹⁰ Yé mi fié ’ko ’wo bɛ soi yé wo Lɔt wɔra ’wo va kɔn gi, yé wo kɔn lɛ tan.

¹¹ Yé munu lé ke kɔn ’léé bɛ, wo wo yuɛ ’wii, é sia né kiénénu ma yé é bɔ mi segelenu ma, yé ’bɛnu wo wɔlɛi nyaa ’wo ma é pla kɔn ’léé naginile nya.

¹² Munu ’konu lé Lɔt lɛ léé: Mi kyɛɛn ɛ ke i va tan ’koo? I lu zananu koo, i benu valé i lunu koo, ilé fɛ faa lé ke fla koo, ’i wo si fɛkona.

¹³ Naa, ko dan fɛkona sɛrɛ lɛ, siaale ana munu ma kɛlɛ plɛplɛ Gakelebale tɔné gi, azama. Gakelebale ko pa zia léé, ’ko ana sɛrɛ.

¹⁴ Lɔt bɔra yé é we fe é lu zananu lɛ, yé é lé wo lɛ léé: ’Ka nwa, ’ka fwi fɛkona, naa, Gakelebale a gona fla ’wii lɛ. Naa, é dɔ a lu zananu gi léé, gle lé é a wo.

¹⁵ Bladi tutu, lanjenu Lɔt tunu a fele nya léé: ’I nwa, i na valé i lu fié lé wo ke ’ko, ’i wo si ’i go woan, dé i da zamaga wo fla ’wii bléyi va.

¹⁶ É a mɔnna aan wo, ’bɛnu kun a bɛ ma, yee koo, a na koo, a lu fié koo, wo wo kun wo bɛ ma; é sɔ Gakelebale lɛ léé, wo vo é yuɛma, azama; wo go wo nya, yé wo si fla aan wo, wo daan wo ma.

¹⁷ Wo wo si fla aan wo, ’bɛnu va mi do lé wo lɛ léé: ’Ka go vlan nya kabo bélile we gi; té ka yuɛ vɔ ka zuo lo; té ka dɔ bwi la lo; ’ka vlan buru gɔ vazia, dé ka da zamaga wo.

¹⁸ Lɔt lé wo lɛ léé: Oo Mizan, gba!

¹⁹ I an ye mi zin nya kɔɔn yé i nyanai zén an ta, yé i an vo é yuɛma; naa, we tɔntɔn é dan bɔ lɛ an ma yé an zamaga wo an sile we gi ’lɛ, ’té an ’ka tan bɔ lɛ gɔ ma lo.

²⁰ I yua, fla mun a é pu, an bɔalé an yɔɔ ’bɛna, yé é ziin, ’bɛ a kiéné. Ilé zanté, ’an go ’bɛna yé ’an yɔɔ ’bɛna yé an béli. Fla mun, ’bɛ ’ka kiéné loo? yé an boen é vo é yuɛma.

²¹ Yé é lé a lɛ léé: Maa ’ma, maa zin ’ko kɛlɛ i lɛ é ziin yé fla lé i alé we fe bɛ, maa ’ka dan a sɛrɛ lɛ lo.

²² ’I go fiéfié, ’i yɔɔ ’bɛna, naa, dé i ’ka tan bɔ lɛ ana lo, an ’ka bɔa we do kɛlɛle lɛ lo. We ’ko ma lé wo fla ’ko laama Soaa.

²³ Yiri nwa bléyian va, ’té Lɔt bɔ Soaa.

²⁴ Yé Gakelebale povun valé kyɛ zana Sɔdɔm valé Gɔmɔɔ ta bélé lɛɛ zo. Gakelebale bozen va lé we ’ko si.

²⁵ Fla ’konu koo, fɛna pɛblɛɛ faa koo, fla ’konu la munu faa koo, tɛrɛ la lu faa koo, é wo sɛrɛ tatata.

²⁶ Lɔt na é yuɛ vɔ é zuo yé é kinin miwɛyili nya.

²⁷ Abraam nwa bladi tutu, yé é go fɛana lé é dɔ Gakelebale ’lɛ é kyɛn, ana.

²⁸ Yé é yuɛ vɔ sɔdɔm valé Gɔmɔɔ vazia, yé é yuɛ vɔ fɛna pɛblɛɛ faa la, yé é ana kyɛgoi ye nwana bélé ’furu blɛn lé kyɛgoi zo.

²⁹ Dé Kazambale fɛna pɛblɛɛ flanu sɛrɛ Abraam sele dɔ a gi; yé dunuzén?-?milawe lé é bɔ Lɔt nyanala flanu ma yé é wo guru zana a gi bɛ, é Lɔt si ’bɛ we ’konu gi.

³⁰ Lɔt kana nyanale ma Soaa, amalé é si Soaa yé é gɔ gié yé é nyana gɔ nwiin loru, yee valé é lu fiénu nya. É nyana gɔmaguru gi, yee valé é lu fiénu nya.

³¹ A lu vininzan lé é zuané lɛ léé: Ko ti a kwa; yé mi do kpen ’ka tɛrɛ ’ko la yé ’bɛ da ko va bélé tɛrɛ faa la we zo lo.

³² ’I da, ’ko nwɛ nɔ ko ti lɛ yé é a mini, yé ko yi gyɛ a va, yé ko ti kulu ’é kɛlɛ.

³³ Yé wo nwɛ nɔ wo ti lɛ ’bɛ yi la é béli; yé a vininzan go yi gyɛ lɛ é ti va. Yé a ti ’ka we do kpen dɔɔ lɛ a yiale valé a nwale gi lo.

³⁴ ’Bɛ é tu kini a vininzan lé é zuané lɛ léé: Bé ye, an yi gyɛ kyɔ an ti va; ’ko nwɛ nɔ a lɛ béli ’ko é ziin yé ’é a mini, yé ’i go yi gyɛ a va, yé ko ti kulu ’é kɛlɛ.

³⁵ Wo nwɛ nɔ wo ti lɛ é ziin ’bɛ yi nya é béli, yé a lu voélazan go yi gyɛ lɛ a va; yé a ti ’ka we do kpen dɔɔ lɛ a yiale valé a nwale we gi lo.

³⁶ Lɔt lu fiénu bɔn si ’wo ti ma.

³⁷ A lu vininzan né yaa gɔné nya yé é a tɔ pa Moab; Moab munu lé ke ana fɔɔ kyɔ yi nya, é a wo faa tra nya.

³⁸ A lu voélazan né yaa gɔné nya é ziin, yé ’bɛ ézé tɔ pa Bɛn‐Ami; Amɔn munu lé ke ana fɔɔ kyɔ yi nya, é a wo faa tra nya.