Wepélisiananu 18 - Kazambale lé Sebe Sauunu 1979

Lanjenu da Abraam va

¹ Gakelebale bɔra Abraam va Mamré sɛnéyilinu méléna, ’té é a é nyanale élé sɔkɔn ’léé é yiéyi, yiri plɛplɛ nya.

² Abraam é yara nwa yé é a nagini; i yua, mi yaa a é dɔle alé fɛna sɔnɔ. É wo ye aan wo, é nwa élé sɔkɔn ’léé yé é go wo si lɛ zia vlan nya, yé é dia é bli la wo gane wuo.

³ Yé é léé: Anzan, dé i an ye mi zin nya, té i gié maa, i wuozan ma baa lo ma.

⁴ ’Wo da ’yi sɛ nya ma, ’ka gane ma zuru, yé ’ka flin yili ’ko wuo ma.

⁵ Maa go buru kuru do si, ka fuu dɔle ka ta we ma; ’bɛ zuo yé ka kalé zi sia; naa, we ’ko ma lé ka giéan ka wuozan sɔnɔ. Wo lé a lɛ léé: We lé bé fe, bé kɛlɛ.

⁶ Abraam go é nya do élé sɔkɔn gi Sara va yé é lé a lɛ léé: ’I burupun zima si suo nya yaa, bé yɔɔ dɔ. Bé kɛlɛ buru nya é kele.

⁷ Abraam go vlan nya élé trubɛnu va yé diriné do lé a wi ke tɔɔtɔɔ é zima é a si yé é a nɔ é leegɔné do lɛ yé ’bɛ go a dɔne lɛ é kele.

⁸ Diriné ma aan wo, é a dɔra wo ma yé é dirinyɔyi valé dirinyɔyinyɔnɔ nɔ wo lɛ é ziin. Yeebozen vo é dɔle wo sɔnɔ yili wuo. Yé wo fɛ ble.

⁹ Yé wo lé a lɛ léé: I na Sara a kyɛɛn? É léé: É a sɔkɔn gi bɛ.

¹⁰ Yé wo va mi do léé: Maa dan da lɛ i va é ziin bléyi ’ko bɛ nya; bé ye, i na Sara é dan négɔné yaa lɛ. ’Té Sara a gɔnézan zuo, sɔkɔn ’léé, ’té a tɔné a é dɔle.

¹¹ Abraam valé Sara a é kwa yé wo lɛɛ a kiɛre; Sara ’ka bɔa né yaale lɛ é dɛrɛ lo.

¹² Sara yéri si é bli gi yé é léé: Maa kɛlɛ é kwa ’naan, an bli a we ’ko lɛ é dɛrɛɛ? Anzan a é kwa é ziin.

¹³ Gakelebale lé Abraam lɛ léé: Mɛmalé Sara yéri si, ’té é a fé léé, ’é kɛlɛ é kwa ’naan, ’é dan né yaa lɛ webozen nyaa?

¹⁴ Gakelebale kelewe aa? Bléyi lé maa a dɔ, maa dan da lɛ ’bɛ bléyi nya i va, bléyi ’ko bɛ nya, lɛɛ bɛ gi, yé Sara é dan né yaa lɛ gɔné nya.

¹⁵ Sara kana amalé é viéwo yé é léé: An ’ka yéri si lɛ lo. Naa, gɔnézan léé: Gba, i yéri si.

¹⁶ Munu ’ko nwa yé wo yara dɔ Sɔdɔm zia. Abraam go wo dɔ lɛ zia.

¹⁷ Yé Gakelebale léé: We lé maa dan a kɛlɛ lɛ, maa a yɔɔan Abraam maa?

¹⁸ Weboen lé, Abraam é dan kɛlɛ lɛ bɛn blɛn plɛplɛ nya. A pli zi lé tɛrɛ la bɛnnu faa drɔɔ é dan vo lɛ.

¹⁹ Naa, maa a si a va léé, ’é ’é benu valé élé kɔngimunu béli dɔ léé, ’wo tawo Gakelebale lé zi ta, ’té woo we drɔle valé we tegele kɛla; ’bɛ zo lé, we faa lé Gakelebale a fe Abraam lɛ blivolɛdére nya, é dan a kɛlɛ lɛ.

²⁰ Yé Gakelebale léé: Siaale Sɔdɔm valé Gɔmɔɔ ma gi a gyɛna yé wolé wenyané kɛlɛ blɛɛn.

²¹ Bɛwemalé maa dan zun lɛ yé we lé maa ’ma an tɔné gi ’ko, dé wo kɛlɛwe a ’bɛ zo webozen nyaa? yé maa a ye; yé dé wo ’ka a kɛla ’bɛ zo loo? yé maa a gi dɔɔ.

²² Munu si wo va yé wo go Sɔdɔm zia. Naa, Abraam vo é dɔle Gakelebale ’lɛ.

²³ Abraam bié yé é léé: I dan mi tegele gyɛ lɛ zamaga nya mi nyané vaa?

²⁴ Dé mi tegele yɔ fié wɔlɛ vu a fla nii? I dan wo gyɛ lɛ zamaga nya é ziin? I ’ka dan flamunu ma we vo lɛ mi tegele yɔ fié wɔlɛ vu lé ke fla bɛ, wolé we ma loo?

²⁵ Mi tegele gyɛle mi nyané va, ’té mi tegele valé mi nyané lé we bɔ ékema, ’bɛ zo we kɛlɛle a é sile i ma baa boenwo. Mian éé tɛrɛlamunu faa lé we blé, é ’ka dan we tegele kɛlɛ lɛ loo?

²⁶ Yé Gakelebale léé: Dé maa mi tegele yɔ fié wɔlɛ vu ye Sɔdɔm, maa dan flamunu faa ma we vo lɛ wolé we ma.

²⁷ Abraam we fe é ziin yé é léé: Maa lé ma, maa lé an ke fɛpun valé kyɛyee nya é pla, an bli tadɔ plɛplɛ yé an we fe Mizan lɛ.

²⁸ Dé é vo soru yé mi tegele yɔ fié wɔlɛ vu lɛ é sɔɔ nii? I dan fla ’wii lɛ mi soru lé we maa? Yé Gakelebale léé: Dé maa mi tegele ye yɔ fié wɔlɛ soru, maa ’ka dan fla ’wii lɛ lo.

²⁹ Abraam é yara pa wefele ta a lɛ yé é léé: Dé mi tegele yɔ fié ɛ ke ana nii? Yé Gakelebale léé: ’Bɛ mi yɔ fié lé we ma, maa ’ka dan we do kpen kɛlɛ lɛ lo.

³⁰ Abraam léé: Té Mizan bli é fli lo ma, yé maa dan we fe lɛ. Dé mi tegele yɔ do wɔlɛ vu ɛ ke ana nii? Yé Gakelebale léé: Dé maa mi tegele yɔ do wɔlɛ vu ye ana, maa ’ka dan we do kpen kɛlɛ lɛ lo.

³¹ Abraam léé: Bé ye, an bli si anbo lɛ yé an we fe Mizan lɛ. Dé mi tegele yɔ do ɛ ke ana nii? Yé Gakelebale léé: ’Bɛ mi yɔ do lé we ma, maa ’ka dan fla ’wii lɛ pelo.

³² Abraam léé: Té Mizan bli é fli lo ma, yé maa ’ka dan we bɛ laa lɛ a lee é dɛrɛ lo. Dé mi tegele vu ɛ ke ana nii? Yé Gakelebale léé: ’Bɛ mi tegele vu lé we ma, maa ’ka dan fla ’wii lɛ pelo.

³³ Gakelebale nyaa aan wo wefele nya Abraam lɛ, é go. Yé Abraam go élé kɔn ’léé.