Wepélisiananu 17 - Kazambale lé Sebe Sauunu 1979

Abram valé Sarai tɔ dɛrɛ ye

¹ Abram lɛɛ kɛlɛ yɔ ziɛn wɔlɛ vu ta sɔraziɛn aan wo, Gakelebale bɔra Abram va yé é lé a lɛ léé: Maa a Plɛplɛfaazan Bale nya. ’I tawo an yuɛ va yé ’i kɛlɛ mi tegele nya.

² Maa dan an gi pa lɛ do i va, yé maa dan i kɛlɛ lɛ di, fɔɔ ’bɛ glɛ ’ka lo.

³ Abram dia é bli la yé Kazambale we fe a lɛ yé é léé:

⁴ An gi lé maa dan a pa lɛ i va do, yee lé ke ’ko: i dan kɛlɛ lɛ bɛngɔnɔ kiɛre ti nya.

⁵ Wo ’ka dan i laa lɛ Abram é dɛrɛ lo, naa, maa dan i kɛlɛ lɛ bɛngɔnɔ kiɛre ti nya, amalé wo dan i tɔ laa lɛ Abraam.

⁶ Maa dan i kɛlɛ lɛ né kiɛre yaazan nya fɔɔ ’bɛ glɛ ’ka lo. I nya lé bɛnnu é dan kɛlɛ lɛ yé minwiinzan blɛnnu é dan si lɛ i gi.

⁷ Maa dan an gi pa lɛ do i va, yé maa dan an gi pa lɛ do ilé nénu lé wo dan kɛlɛ lɛ i zuo, wo va, wo kulu é kulu nya; ko gipawe ’ka dan sɛrɛ lɛ monomono lo, amalé an dan kɛlɛ lɛ ilé Bale nya yé maa dan kɛlɛ lɛ ilé nénu lé Bale nya i zuo.

⁸ Tɛrɛ lé i ke é nyanale a ta bɛn nya ’ko, maa dan a nɔ lɛ bii valé ilé nénu lé wo dan kɛlɛ lɛ i zuo bɛ, wo lɛ. Maa dan Kanaan tɛrɛ faa nɔ lɛ wo lɛ wozé nya lɛɛfaama, a glɛ ’ka lo, yé maa dan kɛlɛ lɛ wolé Bale nya.

Ganedɔle pélisiale

⁹ Kazambale lé Abraam lɛ léé: Bii, an gi lé ma a pa i va do ’ko, té bé sɛrɛ lo. Bii valé ilé nénu lé wo dan kɛlɛ lɛ i zuo, wo kulu é kulu nya, té ka a sɛrɛ lo.

¹⁰ Gipawe lé é a lé i dɔ a ta, bii valé ilé nénu lé wo dan kɛlɛ lɛ i zuo, yee lé ke ’ko: ’ka ka va gɔnénu faa gane dɔ.

¹¹ ’Ka ka va gɔnénu gane dɔ yé ’bɛ é dan kɛlɛ lɛ kaa gipale do tɔmase nya.

¹² ’Ka ka va gɔnénu faa gane dɔ wo yi sɔraazan nya, wo kulu é kulunu nya; dé wa yaa ilé kɔn gioo, dé bé lɔ bɛn bɛ mi lee yé é ’ka i bɛn nya looo, ’ka wo gane dɔ.

¹³ Négɔné lé wa yaa ilé kɔn gi koo, mi lé bé lɔ gɔɔli nya koo, é a lé ka wo gane dɔ; yé anlé gipale tɔmase é dan kɛlɛ lɛ ka kɔlɛ ma, gipawe lé é ’ka nyaan lo, a nya.

¹⁴ Gɔné lé a gane ’ka é dɔle lo, é anlé gipawe sɛrɛ, amalé é a lé wa kulu ga alé munu méléna.

¹⁵ Kazambale lé Abraam lɛ léé: Té i na Sarai tɔ laa Sarai é dɛrɛ lo; naa, bé laa Sara.

¹⁶ Maa dan a drɔɔ vo lɛ, yé maa dan négɔné do nɔ lɛ i lɛ a ma né nya; maa dan a drɔɔ vo lɛ yé é dan kɛlɛ lɛ bɛngɔnɔ kiɛre nya; bɛnnu nwiinzan blɛnnu é dan si lɛ a gi.

¹⁷ Abraam dia é bli la; é yéri si yé é lé é bli gi léé: Gɔné lé a lɛɛ bɔ yɔ soru ’naan, ’bɛ é dan né yaa lɛɛ? Yé Sara lé ’bɛ lɛɛ bɔ yɔ ziɛn wɔlɛ vu ’naan, ’bɛ é dan né yaa lɛ kaa?

¹⁸ Yé Abraam lé Kazambale lɛ léé: Oo, Ismaɛl ’é i yuɛi bɔ ma.

¹⁹ Kazambale léé: Webozen lé, i na Sara é dan né yaa lɛ gɔné nya i lɛ; yé i dan a tɔ pa lɛ Izak. Maa dan an gi pa lɛ do a va, gipawe do lé é ’ka nyaan lo, ’té é dan kɛlɛ lɛ alé nénu zé nya a zuo, a nya.

²⁰ Dé é a Ismaɛl zé nya, maa ’bɛ ’ma. Bé gini, maa dan a drɔɔ vo lɛ, yé maa dan a kɛlɛ lɛ né kiɛre yaazan nya, yé maa dan a fan lɛ fɔɔ a glɛ ’ka lo; é dan tɛrɛzannu yaa lɛ vu ta fié, yé maa dan a kɛlɛ lɛ bɛn gɔnɔ blɛn do nya.

²¹ Naa, Izak lé Sara é dan a yaa lɛ i lɛ bléyi ’ko va lɛɛ bɛ gi, yee ɛ va lé maa dan an gi pa lɛ do.

²² Kazambale nyaa aan wo wefele nya Abraam lɛ, é si Abraam va yé é go loru.

²³ Abraam be Ismaɛl koo, gɔnénu faa lé wa yaa alé kɔn gi koo, é valé wo lé é wo lɔ gɔɔli nya koo, gɔnénu faa lé wo ke Abraam lé kɔn gi, Abraam wo si yé é wo gane dɔ yee yi duo nya, dére lé Kazambale a fe a lɛ, a yɛrama.

²⁴ Wo Abraam gane dɔ aan wo, ’té a lɛɛ a yɔ ziɛn wɔlɛ vu ta sɔraziɛn.

²⁵ Wo Abraam be Ismaɛl gane dɔ aan wo, ’té a lɛɛ a vu ta yaa.

²⁶ Abraam koo, é be Ismaɛl koo, wo wo fiénu gane dɔ yee yi duo nya.

²⁷ Dé wo wo yaa Abraam lé kɔn gioo, dé Abraam wo lɔ bɛnnu lee gɔɔli nyaoo, Abraam ma gɔnénu faa valé Abraam bozen koo, wo wo faa gane dɔ yee yi duo nya.