Wepélisiananu 16 - Kazambale lé Sebe Sauunu 1979

Agaa lé we

¹ Abram na Sarai ’ka né do kpen yaa lɛ Abram lɛ lo. Éjipiti le do a Sarai wuozan nya, wa laama Agaa.

² Yé Sarai lé Abram lɛ léé: Maa lé ma, Gakelebale an kɛlɛ sɔnzan nya. Ilé zanté, ’i go an wuole va, dé an bɔa nénu yele lɛ ’bɛ maa? Abram Sarai dére ’ma.

³ Abram nyana Kanaan tɛrɛ la lɛɛ vu; ’bɛ zuo Abram na Sarai é wuozan Éjipiti le Agaa si, yé é a nɔ é zana Abram lɛ a na nya.

⁴ Abram yi gyɛ Agaa va, yé ’bɛ bɔn si. Dé ébo ye bɔnzan nya, azan ’ka a yuɛ gi bɔ lɛ é dɛrɛ lo.

⁵ Yé Sarai lé Abram lɛ léé: Wenaané lé i na ke a kɛlɛna an lɛ bɛ, ’é kɛlɛ bii ɛ zé nya ma. Maa an wuole nɔ i lɛ, yé é a ye léé, é bɔn a ’é ma, yé an ’ka a yuɛ gi bɔa é dɛrɛ lo. Gakelebale ’é maa valé bii lé we ble ma.

⁶ Abram lé Sarai lɛ léé: I wuole ’ka ibo bɛ nya loo? Dé wean sɔ i lɛ, bé kɛlɛ a lɛ. Yé Sarai nyané pa Agaa ta yé é vɔ fli gi baa.

⁷ Gakelebale lé lanje Agaa ye ’yibɔna sɔnɔ bwi gi; ’yibɔna lé ke Suré lé zi ta, yee lé.

⁸ É léé: Agaa, Sarai wuole, i si kyɛɛn? Yé i go kyɛɛn? Lezan lé a lɛ léé: An vɔ anzan Sarai lee bwi gi.

⁹ Yé Gakelebale lé lanje lé a lɛ léé: ’I nɔla izan va i pa gi, yé ibo pla a wuo bo kiéné nya.

¹⁰ Gakelebale lé lanje lé a lɛ léé: Maa dan i kulunu kɛlɛ lɛ di; wo dan kɛlɛ lɛ kiɛre, ’té mi do ’ka bɔa wo nɔnɔle lɛ lo.

¹¹ Gakelebale lé lanje lé a lɛ léé: Bé ye, i bɔn a i ma. I dan né ’ko yaa lɛ gɔné nya. Gakelebale i dére ’ma ilé kleblele gi, bɛwemalé bé tɔ pa Ismaɛl.

¹² É dan kɛlɛ lɛ bélé bwi gi sokofale zo. É dan kɛlɛ lɛ munu faa nyanézan nya, yé munu faa é dan kɛlɛ lɛ a nyanézan nya é ziin, yé é dan nyana lɛ é zuanénu faa punma.

¹³ É léé: Bale lé an yele zuo, an ’ka fɛ do ye lɛ ’ko loo? Bɛwemalé Gakelebale lé ’bɛ we fe a lɛ bɛ, é a tɔ laa Ata‐El‐roi.

¹⁴ Amalé ’yiguru ’ko, wa laa Lakai‐roi ’yiguru. É a Kadɛs valé Barɛd worona.

¹⁵ Agaa né yaa gɔné nya Abram zé nya. Yé né lé Agaa a yaa Abram lɛ, Abram a tɔ pa Ismaɛl.

¹⁶ Yian nya lé Agaa Ismaɛl yaa Abram lɛ, ’té Abram lɛɛ a yɔ ziɛn wɔlɛ suiɛdo.