Wepélisiananu 15 - Kazambale lé Sebe Sauunu 1979

Kazambale é gi pa do Abram va

¹ We ’konu bɔle zuo, Gakelebale we fe Abram lɛ yuɛzi gi, yé é léé: Abram, té i kana pelo. Maa a i takuunfɛ nya, yé maa dan i gooli pa lɛ blɛn.

² Abram lé a lɛ léé: Anzan, Gakelebale, mɛ fɛ lé i dan a nɔ lɛ an lɛɛ? Maa a gona, ’té anlé né do kpen ’ka lo, yé an zarablezan lé ke Damas mi Éliézɛɛ nya.

³ Yé Abram lé é ziin léé: Bé ye, i ’ka né nɔ lɛ an lɛ lo, yé mi lé wa yaa anlé kɔn gi, yee ɛ dan kɛlɛ lɛ an zarablezan nya.

⁴ Yé Gakelebale é dére fe a lɛ léé: Mian ’bɛ é kɛla i zarablezan nya, ’bɛ ’ka ’bɛ nya lo. Mi lé i dan a yaa lɛ, yee ɛ dan kɛlɛ lɛ i zarablezan nya.

⁵ É go a nya béera yé é léé: ’I lagi gini, yé ’i monénénu nɔnɔ, dé i bɔa wo nɔnɔle lɛɛ? Yé é lé a lɛ léé: I kulu é dan kɛlɛ lɛ bélé wo zo.

⁶ Abram bli vo Gakelebale dére lɛ, yé ’bɛ kɛlɛ a ma we tegele nya.

⁷ Gakelebale lé a lɛ é ziin léé: Maa a Gakelebale nya. Maa i si Uu, Kaldé tɛrɛ la, tɛrɛ ’ko nɔle i lɛ izé nya we gi.

⁸ Abram lé a lɛ léé: Anzan, Gakelebale, mɛ fɛ ma lé maa dan a dɔɔ lɛ léé, é dan kɛlɛ lɛ anzé nyaa?

⁹ Yé Gakelebale lé a lɛ léé: Winu lé wo lɛɛ bɔ yaa, ’i wo si; diridané a do, boligɔné a do, ’blagɔné a do; ’i wo si, yé i plala valé plawuo boroné pa wo va.

¹⁰ Abram wi ’konu faa sia yé é wo faa fee bo é méléna tegele, yé é wo pla é ke yɛrama bale fié. É ’ka mianénu fee bo lɛ lo.

¹¹ Yé wiblemianénu wo po pla yee winu ’ko ta, a siale we ma, yé Abram wo bin.

¹² Yiri vɔle tɔɔn, yé yi blɛn Abram kun, yé bé ye, kana blɛn zén a gi, yé gunu dɔra tiritiri.

¹³ Yé Gakelebale lé Abram lɛ léé: ’I we ’ko dɔɔ ma, i kulunu é dan kɛlɛ lɛ bɛnnu nya, tɛrɛ lé é ’ka wozé nya lo, a ta. Wo dan kɛlɛ lɛ bɛnnu wuozannu nya, yé bɛnnu é dan yaa lɛ wo ta lɛɛ wuru fié gi.

¹⁴ Bɛn lé é dan pla lɛ wo nwiin bɛ, maa dan alé we ble lɛ, yé i kulunu é dan si lɛ ana fua blɛn nya.

¹⁵ Yé bii é dan go lɛ drɔɔ i tinu va; i dan kwa gyɛ lɛ gi nanale nya, ’bɛ zuo yé wo dan i pa lɛ.

¹⁶ Wo néné zi néné ziɛnzan nya wo dan nyana lɛ ’ko é ziin. Naa, Amoré munu lé wenyané ’ka tan fan lɛ lo.

¹⁷ Dé yiri vɔ, gunu dɔra tiritiri, yé bé ye, kyɛ blɛn bɔra ana é goi nya, yé winu lé Abram wo fee bo bɛ, kyɛnéné vo giéna wo méléna.

¹⁸ ’Bɛ yi la Gakelebale gi pa do Abram va, yé é léé: An tɛrɛ ’ko nɔ i kulu lɛ; a péli é sia Éjipiti yuu blɛn ma, yé éé goo fɔɔ yé é bɔ yuu blɛn lé wa laama Yufrat, a ma.

¹⁹ Kéni munu koo, Kénizi munu koo,

²⁰ Kadimon munu koo, Éti munu koo, Férézi munu koo, Réfaim munu koo,

²¹ Amoré munu koo, Kanaan munu koo, Giigazi munu koo, Jébusi munu koo, wolé tɛrɛ lé maa dan a nɔ lɛ i kulu lɛ.