Wepélisiananu 13 - Kazambale lé Sebe Sauunu 1979

Abram go Kanaan tɛrɛ la é pai

¹ Abram si Éjipiti tɛrɛ la, yé é gié yirinwana bɛyilazia, yee valé é na, ’bɛ valé élé fɛnu faa nya, yé Lɔt go a va.

² Abram fua ble é baba; trubɛ koo, gɔɔli koo, kyan koo, wa a lee.

³ Yé é si yirinwana bɛyilazia, yé é gié Bétɛl, yé é bɔ fɛana lé alé sɔkɔn ke é vinin, Bétɛl valé Ai worona, ana,

⁴ fɛana lé é balebanna kɛlɛ é kyɛn bɛ, ana. Yé Abram Gakelebale tɔ laa ana mi.

Abram valé Lɔt kini ékema

⁵ Lɔt lé, ’bɛ tawo Abram va bɛ, ’blanu koo, dirinu koo, sɔkɔnnu koo, wa ’bɛ lee é ziin.

⁶ Yé ana tɛrɛ ’ka blɛn yé é wo fiénu zé bɔ lo. Wolé fɛnu a di, amalé wo ’ka bɔ lɛ nyanale lɛ ékeva lo.

⁷ Yé Abram lé trubɛ tabinzannu koo, Lɔt lé trubɛ tabinzannu koo, wo we sia. ’Bɛ bléyi va Kanaan munu valé Férézi munu ana ’bɛ tɛrɛ la.

⁸ Abram lé Lɔt lɛ léé: Ilé zanté, té we é kɛlɛ maa valé bii méléna lo ma; anlé trubɛ tabinmunu koo, ilé trubɛ?-?tabinmunu koo, té we do kpen é kɛlɛ wo méléna lo ma. Ko a mi do nya.

⁹ Tɛrɛ faa ’ka i ’lɛ loo? Ko kini ékema ma. Dé i go bɛbolazia, ’maa go bɛyilazia. Yé dé i go bɛyilazia, ’maa go bɛbolazia.

¹⁰ Lɔt é yuɛ vɔ, yé é Juudɛn yuu lé fɛna pɛblɛɛ ye, ’té ’yi yoro ana di. ’Té Kazambale ’ka tan Sɔdɔm valé Gɔmɔɔ kyɛ ble lɛ lo; ana a bélé Gakelebale lé féi zo. É a bélé Éjipiti tɛrɛ la zo fɔɔ é bɔ Soaa.

¹¹ Yé Lɔt Juudɛn yuu lé fɛna pɛblɛɛ si ézé nya, yé é go yirinwanazia. ’Bɛ zo lé wo kini ékema.

¹² Abram nyana Kanaan tɛrɛ la, yé Lɔt nyana fɛna pɛblɛɛ lé flanu ta yé é sɔkɔnnu dɔ fɔɔ Sɔdɔm.

¹³ Sɔdɔm munu a nyané, yé woo wenyané blɛnblɛn kɛla Gakelebale ma.

Kazambale blivolɛdére fe Abram lɛ

¹⁴ Lɔt valé Abram kinile ékema zuo, Gakelebale lé Abram lɛ léé: Fɛ lé i ke ana bɛ, ’i dɔ ana yé ’i yuɛ vɔ yirinwana valé yirivɔna, é valé yiri san fié gi, yé bé nagini.

¹⁵ Yé tɛrɛ faa lé bé ye, maa dan a nɔ lɛ bii koo, ilé nénu koo, ka lɛ, lɛɛfaama zé nya.

¹⁶ Maa dan ilé nénu kɛlɛ lɛ bélé tɛrɛ lé vun zo di. ’Bɛ ma, dé mi é bɔa lɛ é tɛrɛ lé vun nɔnɔ, ’té é bɔa ilé nénu nɔnɔle lɛ é ziin.

¹⁷ ’I nwa, ’i gié tɛrɛ sangi valé tɛrɛ ’wuo la, naa, maa dan a nɔ lɛ i lɛ.

¹⁸ Abram élé sɔkɔnnu si, yé é da nyana lɛ Mamré lé sɛnéyilinu méléna, ’té é ke Ébrɔn sɔnɔ bɛ. É Gakelebale banna do kɛlɛ ’bɛna.