Wepélisiananu 12 - Kazambale lé Sebe Sauunu 1979

Gakelebale Abram laa

¹ Gakelebale lé Abram lɛ léé: ’I si ilé tɛrɛ la, i lelenu va, ’i si i ti lé kɔn ’léé, yé ’i go tɛrɛ lé maa dan ana gɔɔn lɛ i lɛ, a ta.

² Maa dan i kɛlɛ lɛ bɛngɔnɔ blɛn nya, yé maa dan i drɔɔ vo lɛ, yé maa dan i tɔ kɛlɛ lɛ blɛn yé bii ɛ dan mi bɛnu drɔɔ vo lɛ.

³ Munuan, wo dan i drɔɔ vo lɛ, maa dan wo drɔɔ vo lɛ. Munuan wo dan bale pa lɛ i ma, maa dan bale pa lɛ wo ma, yé i ma lé tɛrɛ la lelenu faa tere drɔɔ é dan vo lɛ.

⁴ Abram go, bélé Gakelebale a fe a lɛ fɛan zo, a zo. Yé Lɔt go a zuo. Abram lɛɛ yɔ yaa wɔlɛ vu ta soruzan nya é si Karan.

⁵ Abram é na Sarai si, é valé é bwe be Lɔt nya; fɛnu lé é ke wo lee, é valé munu lé wo wo ye Karan, wo go wo nya. Wo zi sia gole we gi Kanaan tɛrɛ la, yé wo bɔ Kanaan tɛrɛ la.

⁶ Abram gié ana tɛrɛ la fɔɔ yé é bɔ fɛ lé wana tɔ laama Sisɛm, ana, fɔɔ fɛna dégélé lé wana tɔ laama Moré, ana. Kanaan munu ana ’bɛ bléyi va yee tɛrɛ ’ko la.

⁷ Yé Gakelebale bɔra Abram va, yé é léé: Maa dan tɛrɛ ’ko nɔ lɛ i kulu é kulu lɛ. Yé Abram Gakelebale banna kɛlɛ, fɛana lé é bɔra a yuɛ va bɛ, ana.

⁸ É si ’bɛna yé é go gɔ vazia, Bétɛl lé yirinwanazia, yé élé sɔkɔnnu dɔ ’bɛna, ’té Bétɛl a yirivɔnazia, yé Ai a yirinwanazia. Yé é Gakelebale banna do kɛlɛ é ziin yé é Gakelebale tɔ laa ’bɛna.

⁹ Yé Abram yara dɔ é ’lɛ, yé é go yirinwana bɛyilazia.

Abram go Éjipiti tɛrɛ la

¹⁰ Lɔrɔ dɔ tɛrɛ la, yé Abram go nyana lɛ Éjipiti tɛrɛ la, naa, lɔrɔ blɛn dɔ azama.

¹¹ Wo bɔ aan wo Éjipiti tɛrɛ sɔnɔ, yé é lé é na Sarai lɛ léé: Maa lé ma, maa a gi dɔɔ léé, i a le lé a yara ke é nɔnɔmi, a nya.

¹² Dé Éjipiti munu i ye, wo dan a fe lɛ léé, a na lo. Yé wo dan an gyɛ lɛ yé wo bii vo é yuɛma.

¹³ Ilé zanté, bé fe wo lɛ léé, bii a an buru nya, yé wo an pa é zima ilé we ma, yé an vo é yuɛma i pli zi.

¹⁴ Abram bɔ aan wo Éjipiti tɛrɛ la, yé Éjipiti munu a ye léé, lezan a é nɔnɔmi é baba.

¹⁵ Faraɔn lé mi blɛnblɛnnu a ye é ziin, yé wa nɔnɔmi ze vɔ Faraɔn va, yé wo go a nya Faraɔn lé kɔn gi.

¹⁶ Sarai lé we ma lé wo vo Abram pana é zima, yé ’blanu koo, dirinu koo, sokofalenu koo, nyanamapagɔnénu valé nyanamapalomu koo, sokofaledanu valé nyɔgɔménu koo, wa nɔ a lɛ.

¹⁷ Yé Gakelebale manɔn blɛnnu vɔ Faraɔn valé élé kɔngimunu ma, Abram na Sarai lé we ma.

¹⁸ Yé Faraɔn Abram laa, yé é léé: Mɛ we lé bé kɛlɛ an lɛ bɛɛ? Mɛmalé i ’ka a fe lɛ an lɛ léé, ’é na lé, loo?

¹⁹ Mɛmalé bé fe an lɛ léé, ’é buru léé? Yé maa a si an na nya. Sin, i na lo, bé si ’ka go.

²⁰ Yé Faraɔn lé élé munu lɛ léé, ’wa bin, yee valé é na, é valé fɛnu faa lé ke a lee, wo nya.