Wepélisiananu 11 - Kazambale lé Sebe Sauunu 1979

Kɔn torole lé wa dɔ Babɛl

¹ Tɛrɛ faa la munu dére a do; wolé we a do.

² Wo go aan wo yirinwanazia, wo fɛna dégélé do ye Sinéaa tɛrɛ la, yé wo nyana ana.

³ Wo lé wo ke lɛ léé: Kaa go briki gyɛ, yé kaa wo pane kyɛ va; yé briki kɛlɛ wo lɛ gɔlɛ nya yé gudrɔn kɛlɛ wo lɛ laso nya.

⁴ Yé wo lé é ziin léé: Kaa go, kaa fla do pa, yé kaa kɔn kiilii torole dɔ fɔɔ a ’wuo ’é zun la ma, yé kaa tɔ ’é kɛlɛ, blɛn, dé ko da kini ékema tɛrɛ la fɛfaana.

⁵ Gakelebale zun yé é da, fla valé kɔn kiilii torole lé munu ke a dɔna bɛ, wo nagini lɛ.

⁶ Yé Gakelebale léé: Ka ye, wo faa kɛlɛ bɛn do nya, yé wo faa dére a do, amalé wo fɛ ’konu kɛlɛle pélisia; dé kaa wo vo we ’ko kɛlɛna, dé wo wean pélisia a yi ’ka dan ga lɛ wo lee lo.

⁷ Kaa go, kaa zun, kaa wo dére kini ékema mi, té wo wo ke dére ’ma é ziin lo.

⁸ Yé Gakelebale wo kini ékema yé wo nwɛɛn baa tɛrɛ la fɛfaana, yé wo daan fla pale ma.

⁹ Ana mi lé Gakelebale tɛrɛlamunu faa tere dére kini ékema; amalé wa tɔ pa Babɛl. Ana mi lé Gakelebale wo kini ékema tɛrɛ la fɛfaana.

Sɛm kulunu

¹⁰ Sɛm kulunu lé ké ’ko: Sɛm lɛɛ yɔ soruzan nya é Aapasad yaa, lɛɛ blɛn dale zuo lɛɛ fiézan nya.

¹¹ Aapasad yaale zuo, Sɛm lɛɛ kɛlɛ tɛrɛ la lɛɛ wuru fié yɔ soru, yé é négɔnénu valé nélomu yaa.

¹² Aapasad lɛɛ yɔ do wɔlɛ vu ta soruzan nya é Sélak yaa.

¹³ Sélak yaale zuo Aapasad lɛɛ kɛlɛ tɛrɛ la wuru fié lɛɛ yaa, yé é négɔnénu valé nélomu yaa.

¹⁴ Sélak lɛɛ yɔ do wɔlɛ vuzan nya é Éébɛɛ yaa.

¹⁵ Éébɛɛ yaale zuo Sélak lɛɛ kɛlɛ wuru fié lɛɛ yaa, yé é négɔnénu valé nélomu yaa.

¹⁶ Éébɛɛ lɛɛ yɔ do wɔlɛ vu ta ziɛnzan nya é Pélɛg yaa.

¹⁷ Pélɛg yaale zuo, é lɛɛ kɛlɛ tɛrɛ la lɛɛ wuru fié yɔ do wɔlɛ vu, yé é négɔnénu valé nélomu yaa.

¹⁸ Pélɛg lɛɛ yɔ do wɔlɛ vuzan nya é Réu yaa.

¹⁹ Réu yaale zuo é lɛɛ kɛlɛ lɛɛ wuru do lɛɛ sɔraziɛn, yé é négɔnénu valé nélomu yaa.

²⁰ Réu lɛɛ yɔ do wɔlɛ vu ta fiézan nya, é Sérug yaa.

²¹ Sérug yaale zuo, Réu lɛɛ kɛlɛ lɛɛ wuru do lɛɛ sɔrafié, yé é négɔnénu valé nélomu yaa.

²² Sérug lɛɛ yɔ do wɔlɛ vuzan nya é Nakɔɔ yaa.

²³ Nakɔɔ yaale zuo Sérug lɛɛ kɛlɛ wuru do, yé é négɔnénu valé nélomu yaa.

²⁴ Nakɔɔ lɛɛ yɔ do wɔlɛ sɔraziɛnzan nya é Téra yaa.

²⁵ Téra yaale zuo Nakɔɔ lɛɛ kɛlɛ lɛɛ yɔ soru wɔlɛ vu ta sɔraziɛn, yé é négɔnénu valé nélomu yaa.

²⁶ Téra lɛɛ yɔ yaa wɔlɛ vuzan nya, Abram koo, Nakɔɔ koo, Aaran koo, é wo yaa.

²⁷ Téra kulunu lé ke ’ko: Abram koo, Nakɔɔ koo, Aaran koo, Téra wo yaa.

²⁸ Aaran Lɔt yaa. Yé Aaran ga é ti Téra yuɛ va ’é yaatɛrɛ la. Kaldé tɛrɛ lé, walé fla tɔ laama Uu.

²⁹ Abram valé Nakɔɔ le si. Abram na tɔ lé Sarai. Nakɔɔ na tɔ lé Aaran lu Milka. Aaran a Milka valé Jisika ti nya.

³⁰ Sarai a sɔnzan nya; alé né ’ka lo.

³¹ Téra be Abram koo, a néné Aaran be Lɔt koo, a be Abram na Sarai koo, Téra wo si yé wo si Uu, Kaldé tɛrɛ la, gole we gi Kanaan tɛrɛ la. Wo da fɔɔ Karan, yé wo nyana ana.

³² Téra yi faa kɛlɛ lɛɛ wuru do lɛɛ soru, yé Téra ga Karan.