Weblezannu 9 - Kazambale lé Sebe Sauunu 1979

Abimélɛk lé we

¹ Jérubaal be Abimélɛk go Sisɛm é bu bwenu va yé é we fe wo valé é bu ti gɔnɔlamunu faa lɛ léma:

² Kalé zanté, ’ka we fe Sisɛm munu faa lɛ léma: Jérubaal be yɔ yaa wɔlɛ vu plale ka nwiin ɛ fila vɔ laa, taa, mi do kpen plale ka nwiin ɛ fila vɔɔ? Yé a sele é dɔ ka gi léé, maa a ka wɔlɛ valé ka nɛ nya.

³ A bu bwenu alé we fe dére ’konu nya Sisɛm munu faa tɔné gi yé wo bli nɔla a vazia, naa, wo léé: Ko bwe lé.

⁴ Wo gɔɔlifu sikla yɔ yaa wɔlɛ vu si Baal‐Bérit lé kɔn gi yé wa nɔ a lɛ. Abimélɛk a si yé é nyanégyɛzannu valé boazannu lɔ a nya, yé wo go a zuo.

⁵ É da é ti lé kɔn gi Ofra yé é bwenu, Jérubaal benu gyɛ, mi yɔ yaa wɔlɛ vu, gɔlɛ do kpen ta. Jérubaal be voélazan, Jotam, yɔɔ, amalé yee do kpen si we gi.

⁶ Sisɛm munu faa valé Milo munu faa zén ékeva; wo da yé wo Abimélɛk dɔ ’wo nwiinzan nya, sɛnéyili lé wa suru Sisɛm, a sɔnɔ.

⁷ Wa zuo fe Jotam lɛ. É go yé é dɔ Garizim gɔ nwiin yé é siaa dére plɛplɛ nya yé é léma: Sisɛm munu, ’ka tɔné dɔ an lɛ yé Bale ’é tɔné dɔ ka lɛ ma.

⁸ Yilinu go nyɔnɔ zén lɛ mi do nwiin léé, ’é kɛlɛ wo nwiinzan valé wo zilɛzan nya. Wo lé ɔliviyili lɛ léé: ’I pla ko nwiin ma.

⁹ Naa, ɔliviyili a zi pa wo lɛ léé: An nyɔnɔ lé éé kɛla an tɔbɔfɛ nya munu valé Bale va, maa sɔn vɔa ’bɛ ma, plale yilinu nwiin we maa?

¹⁰ Yé yilinu lé bɔrɔyili lɛ léé: ’I da, bii, ’i pla ko nwiin ma.

¹¹ Naa, bɔrɔyili a zi pa wo lɛ léé: An sɔn vɔa an néné valé an poro zima ma, plale yilinu nwiin we maa?

¹² Yé yilinu lé dɔrɔyili lɛ léé: ’I da, bii, ’i pla ko nwiin ma.

¹³ Naa, dɔrɔyili a zi pa wo lɛ léé: An poro’yi lé éé Bale valé munu gi nanaan, an sɔ vɔa ’bɛ ma, plale yilinu nwiin we maa?

¹⁴ Yé yilinu faa lé léliyiliné lɛ léé: ’I da, bii, ’i pla ko nwiin.

¹⁵ Léliyiliné a zi pa yilinu lɛ léé: Dé ka bli tegele nya lé é sɔ ka lɛ léé, ka nyɔnɔ zén an nwiin ka nwiinzan nya, ’ka da, ’ka ta yɔɔ an furɔ va; dé ’bɛ kaan lo, kyɛ é dan bɔra lɛ léliyiliné gi yé é Liban lé sɛdrɛyilinu ble.

¹⁶ Sin, ka bli zin valé ka bli tegele nya léé, ka Abimélɛk dɔ ka nwiinzan nyaa? Ka wezin kɛlɛ Jérubaal valé élé kɔngimunu lɛɛ? Wezin lé é a kɛlɛ ka lɛ, ka we kɛlɛ a lɛ ’bɛ yɛramaa?

¹⁷ Naa, an ti ka ta guli dan, é bli si é gale lɛ, yé é ka si Madiannu lee;

¹⁸ yé ’kaa, ka nwa an ti lé kɔngimunu ma, ka alé nénu gyɛ mi yɔ yaa wɔlɛ vu, gɔlɛ do kpen ta, yé a wuole be Abimélɛk a ka bwe nya, bɛwemalé ka a dɔ Sisɛm munu nwiinzan nya.

¹⁹ Dé ka bli zin valé ka bli tegele nya léé, ka we kɛlɛ Jérubaal valé élé kɔngimunu lɛ kyɔ, ka gi ’é nana Abimélɛk lé we ma ma, yé a gi ’é nana kalé we ma ma.

²⁰ Dé ’bɛ kaan lo, kyɛ ’é si Abimélɛk gi yé é Sisɛm munu valé Milo munu ble ma, yé kyɛ ’é si Sisɛm munu valé Milo lé kɔn gi yé ’é Abimélɛk ble ma.

²¹ Jotam si ana yé é vlan buru; é go Bɛɛ, ana lé é nyana baa, é bwe Abimélɛk ma.

²² Abimélɛk pla Izraɛl nwiin lɛɛ yaa.

²³ Yé Bale Abimélɛk valé Sisɛm munu sɛrɛ wo ke gi, yé Sisɛm munu yuɛ gi blan Abimélɛk lé we ma,

²⁴ glawe lé é a kɛlɛ Jérubaal be yɔ yaa wɔlɛ vu lɛ, a lɛgi pale we gi, yé wo nyɛwe ’é dɔ wo bwe Abimélɛk lé é wo gyɛ, a nwiin, ’é valé Sisɛm munu lé wo bɔ a va a bwenu gyɛna, wo nwiin.

²⁵ Kyeenmunu lé woo wiié tawozannu ta zia, ’té woo wolé fɛnu sié, Sisɛm munu wo dɔ gɔnu nwiin zi dɔle Abimélɛk lee we ma. Yé wa zuo fe Abimélɛk lɛ.

²⁶ Ébɛd be Gaal da, yee valé é bwenu nya yé wo go Sisɛm. Sisɛm munu bli pa wo gi.

²⁷ Wo go féi yé wo ’wolé dɔrɔporo so, yé wa ’yi boro yé wobo nɔ gi nanale lɛ; wo go ’wolé bale lé kɔn gi, wo fɛ ble yé wo fɛ mini yé wo bale pa Abimélɛk ma.

²⁸ Yé Ébɛd be Gaal léé: De ɛ ke Abimélɛk nyaa? Yé de ɛ ke Sisɛm nya yé ko pla Abimélɛk wuoo? É ’ka Jérubaal be nya loo? Zébul ’ka a zuo sunya nya loo? ’Ka pla Sisɛm ti Amɔɔ wuo; naa, ko, mɛmalé ko plaan Abimélɛk wuoo?

²⁹ Oo, dé é kɛlɛ léé, maa a munu ’ko nwiinzan nya, ’té maa Abimélɛk bin. Yé é lé Abimélɛk ma léé, ’ilé sunyanu dɔ plɛplɛ, ’i zén zia!

³⁰ We lé Ébɛd be Gaal ke a fena, duti Zébul a ’ma aan wo, a bli fli.

³¹ É munu nwunvɔ Abimélɛk va kyeen gi, a fele a lɛ we gi léé: Bé ye, Ébɛd be Gaal valé é bwenu da Sisɛm yé wo flamunu nwa i ma.

³² Sin, ’i go é béli, bii valé i vamunu, yé ka yɔɔ féi.

³³ Bladi, yirinwabléyi va, ’ka ’wii fla ta, yé dé Gaal valé é vamunu bɔra i ma, bé kɛlɛ a lɛ fɛan zo lé i bɔa a kɛlɛle lɛ, a zo.

³⁴ Abimélɛk valé é vamunu faa go é béli, yé wo yɔɔ Sisɛm sɔnɔ, palu ziɛn nya.

³⁵ Ébɛd be Gaal bɔra yé é dɔ flagɔrɔ ’léé. Abimélɛk valé é vamunu nwa ’wo yɔɔna.

³⁶ Gaal munu ye yé é lé Zébul lɛ léé: Bé ye, munu a gɔnu zunna. Zébul a zi pa a lɛ léé: Gɔnu furɔ lé bé yé munu zo bɛ.

³⁷ Gaal lé é ziin léé: Weboen lé, munu a sina fɛna loruna, yé palu do a dana ’monédɔmunu lé sɛnéyili lé zi ta.

³⁸ Zébul a zi pa a lɛ léé: Biian bé fe léé, Abimélɛk a de nya yé ko plaan a wuoo? I lɔlu a sin kyɛɛn? Munu lé i serele bo wo ma, woan wo dan bɛ loo? ’I tawo sin, ’i guli dan a va!

³⁹ Gaal dɔ Sisɛm munu ’lɛ yé é guli dan Abimélɛk va.

⁴⁰ É vlan buru Abimélɛk ’lɛ yé Abimélɛk a zuo bin, yé munu kiɛre ga fɔɔ wo bɔ flagɔrɔ ’léé.

⁴¹ Abimélɛk dɔ Aruma. Zébul Gaal valé é bwenu bin yé wo ’ka bɔ lɛ vole lɛ Sisɛm lo.

⁴² ’Bɛ é tu kini munu go féi, yé wa zuo fe Abimélɛk lɛ.

⁴³ Élé munu si yé é wo guli palu yaa yé wo yɔɔ féi. É a ye aan wo léé, munu si fla, é nwa wo ma yé é wo gyɛ guli nya.

⁴⁴ Abimélɛk valé élé palu go zi ’lɛ yé wo dɔ flagɔrɔ ’léé; palu fié baa munu lé ke féi, wo ta, yé wo guli dan wo va.

⁴⁵ Abimélɛk guli dan flamunu va yiéyi bléyi faa va; yé é a si yé é ana munu gyɛ. ’Bɛ zuo é fla guru zana a gi yé é wɛ nwɛɛn ana.

⁴⁶ Wo we ’ko ’ma aan wo, munu lé wo nyana Sisɛm lé kɔn torole gi, wo go bale lé wa laama Bérit, alé kɔn plɛplɛ gi.

⁴⁷ Wa fe Abimélɛk lɛ léé, Sisɛm lé kɔn torole gi munu a é zénle ékeva ana.

⁴⁸ Yé Abimélɛk go Salmɔn gɔ nwiin, yee valé é vamunu nya. Yé é zaa si yé é yilibɛ bɔi, é a sia yé é a pa é bɛapa ta. ’Bɛ zuo é lé é vamunu lɛ léé: We lé maa a kɛlɛ, ka a ye. ’Ka kɛlɛ anzé zo fiéfié.

⁴⁹ Yé wo faa yilibɛ bɔi do do yé wo go Abimélɛk zuo; wo yilibɛnu pla kɔn plɛplɛ ma yé wa kyɛ ble, yee valé a gi munu nya. ’Bɛ zo lé Sisɛm lé kɔn torole gi munu zamaga wo. Wo mi wuru soru bɔa, gɔné valé lomu nya.

⁵⁰ Abimélɛk nwa Tébɛs ma é ziin. É nyana a zi yé é a si.

⁵¹ Kɔn torole plɛplɛ a fla worona yé flamunu faa yɔɔ ana, gɔnénu valé lomu nya; wa lɛ tan yé wo go a nwiin.

⁵² Abimélɛk bɔ kɔn torole ma; é guli dan a ma yé é bié a duoli sɔnɔ, a kyɛ vɔle we gi.

⁵³ Yé lezan do fɛzɔngɔlɛ kuru dia a nwiin yé a ’wuo ’wii.

⁵⁴ Tɔɔn, pɛniɛ lé é alé gulidanfɛnu kɔné sié, é a laa, yé é lé a lɛ léé: ’Ilé gwɔun so a gi, yé ’i an gyɛ, dé wo da fe an ma léé, lezan ɛ gyɛ. Pɛniɛ a fɔn yé é ga.

⁵⁵ Izraɛl lé munu a ye aan wo léé, Abimélɛk ga, wo faa go ’wolé kɔn ’léé do do.

⁵⁶ Wenaané lé Abimélɛk a kɛlɛ é ti lɛ é bwe yɔ yaa wɔlɛ vu gyɛle nya, Bale a lɛgi pa a ma ’bɛ zo.

⁵⁷ Yé wenaané faa lé Sisɛm munu a kɛlɛ, Bale a faa dɔ wo nwiin. ’Bɛ zo lé Jérubaal be Jotam lé balepale wo kun.