Weblezannu 8 - Kazambale lé Sebe Sauunu 1979

Jédéɔn Madiannu zuo bin

¹ Éfraim munu lé Jédéɔn lɛ léé: We kɛlɛle ko vazia ’ko zo gi lé nɔɔ? Dé i a gona guli dan lɛ Madiannu va, mɛmalé i ’ka ko laa lɛ loo? Yé wo zɔ dɔ a va é baba.

² Jédéɔn a zi pa wo lɛ léé: Mɛ we lé maa a kɛla yé ’bɛ mini kazé taa? Éfraim lé ’sagɔi fila vɔle ’ka mini lɛ Abiézɛɛ lé ’sazun ta loo?

³ Ka lee lé Bale Madian nwiinmunu Orɛb valé Zééb pa. Mɛ lé an bɔa a kɛlɛle lɛ yé ’é bɔ kazé nya ékemaa? É we fe ’bɛ zo aan wo, wo bli dɔrala.

⁴ Jédéɔn bɔ Juudɛn yuu ma yé é a kini, yee valé é va mi wuru do yɔ soru nya, dé wo wɔlɛi nyaa wo maoo, ’té wa ’bɛnu zuo duowo bléyi faa va.

⁵ É lé Sukɔt munu lɛ léé: Kalé zanté, ’ka buru nɔ an vamunu lɛ, naa, wo wɔlɛ gi nyaa wo ma yé maa a Madiannu nwiinzannu Zébak valé Salmuna zuo binna.

⁶ Sukɔt nwiinmunu a zi pa léé: I Zébak valé Salmuna kele tɛkɛ yé ko buru nɔ ilé sunyanu lɛɛ?

⁷ Yé Jédéɔn léé: Dé Gakelebale Zébak valé Salmuna pa an lee faa maa dan ka ma mian lɛ bwiléli valé danna nya.

⁸ É si ’bɛna yé é go loru Pénuɛl yé é yee fɛ duo laa Pénuɛl munu lee. Yé wa zi pa a lɛ fɛan zo lé Sukɔt munu a zi pa a lɛ, a zo.

⁹ Yé é lé é ziin Pénuɛl munu lɛ léé: Dé an da é ziin drɔɔ, maa dan kɔn torole ’ko zana lɛ.

¹⁰ Zébak valé Salmuna a Kaakɔɔ yé wolé sunyanu a wo va, wo mi baa sɔrafié mi wuru soru bɔa, wo saa ɛ vo yirinwanazia munu lé sunyanu faa méléna; guli gwɔun soimunu baa yɔ yaa gyɛ.

¹¹ Jédéɔn go munu lé woo nyanaan sɔkɔnnu gi, wolé zi ta, Nobas valé Jogbéa yirinwanazia, yé sunyanu lé wo gi a é sanle ’wobo ma, é wo gyɛ.

¹² Zébak valé Salmuna vɔ fli gi; Jédéɔn wo zuo bin yé é Madian munu nwiinzan fiénu, Zébak valé Salmuna kun yé é sunyanu faa fwila.

¹³ Joas be Jédéɔn si guli danna yé é gié Érɛs gɔpané vazia.

¹⁴ É Sukɔt pɛniɛ do kun yé é we laa ’bɛ lee, yé ’bɛ Sukɔt nwiinmunu valé mi segelenu tɔ gyɛ a lɛ, mi yɔ yaa wɔlɛ vu ta sɔrafié.

¹⁵ ’Bɛ zuo é da Sukɔt munu va yé é léé: Zébak valé Salmuna lé ka an sɔnɔ wolé we ma a fele nya léé, I Zébak valé Salmuna kele tɛkɛ, yé ko buru no ilé sunyanu lé wo wɔlɛi ke é nyaale wo ma, wo lɛɛ? woan wo ke ’ko loo?

¹⁶ Yé é fla mi segelenu si, yé é we lɛdɔ Sukɔt munu gi bwiléli valé danna nya.

¹⁷ Kɔn torole lé ke Pénuɛl, é ’bɛ zana é ziin faa yé é flamunu gyɛ.

¹⁸ É lé Zébak valé Salmuna lɛ léé: Munu lé ka wo gyɛ Tabɔɔ, wa kaa? Wa zi pa léé: Wa bii zo, wo faa do do a bélé minwiinzan be zo.

¹⁹ É léé: An bwenu lé, an bu benu lé. Gakelebale a é yuɛma. Dé é vo léé, ka wo vo é yuɛma, ’té manɔ ka gya lo.

²⁰ Yé é lé élé né vininzan Jétɛɛ lɛ léé: ’I nwa, ’i wo gyɛ. Naa, ’bɛ a tan pɛniɛné nya, yé ’bɛ kana, amalé ’bɛ ’ka élé gwɔun so lɛ é kɔlɛ gi lo.

²¹ Zébak valé Salmuna léé: Biibozen é nwa yé ’i ko gyɛ. Naa, gɔné a fɛan zo, a zo lé alé plɛplɛ ke. Yé Jédéɔn nwa yé é Zébak valé Salmuna gyɛ. ’Bɛ zuo, kyanmoné foto lé ke wolé nyɔgɔménu bɔrɔ ma, é wo si.

²² Izraɛl munu lé Jédéɔn lɛ léé: ’I pla ko nwiin, bii koo, i be koo, i néné koo é ziin, naa, i ko si Madiannu lee, azama.

²³ Jédéɔn lé wo lɛ léé: Maa ’ka dan pla lɛ ka nwiin lo, yé an benu ’ka dan pla lɛ ka nwiin lo; Gakelebale ɛ dan pla lɛ ka nwiin.

²⁴ Jédéɔn lé wo lɛ léé: Maa we do laa ka lee. Bɛmakyan lé ka wo ye gulizarafɛ nya, ’ka wo nɔ an lɛ. Wo nyanézannu a Ismaɛl munu nya, amalé bɛmakyan a wo lee.

²⁵ Wo léé: Ko dan wo nɔ lɛ bli drɔɔ nya, yé wo sɔ fwila tɛrɛ va, yé bɛmakyan lé wa ye gulizarafɛ nya wo wo zana a ta.

²⁶ Bɛmakyan lé Jédéɔn a laa, a bɛn kɛlɛ kyansikla wuru sɔraa yɔ soru nya, ’té kyanmoné fotonu koo, tɔnémakyannu koo, sɔ drɔndrɔnnu lé Madian minwiinzannu a zén‐é ’wo ta koo, wo ’ka wo pa lɛ a va lo, yé wolé nyɔgɔmé bɔrɔmafɛnu é ziin, wo ’ka wo pa lɛ a va lo.

²⁷ Jédéɔn éfɔdi do kɛlɛ a nya yé é a pla élé fla, Ofra, ana lé é kinin Izraɛl faa lé pɛnpɛnnégyɛfɛ nya; yé é kɛlɛ Jédéɔn valé élé kɔngimunu kunsan nya.

²⁸ Izraɛl lé nénu Madiannu tua yé wo ’ka wo ’wuo nwa lɛ é dɛrɛ lo. Yé tɛrɛ vo drɔɔ lɛɛ yɔ fié wuo, Jédéɔn lé tɛrɛla faa gi.

Jédéɔn gale

²⁹ Joas be Jérubaal go ’wo va yé é nyana élé kɔn gi.

³⁰ Jédéɔn benu a yɔ yaa wɔlɛ vu, abo yaa nénu nya, a nanu a kiɛre, azama.

³¹ A bwɛ lé ke Sisɛm, é négɔné do yaa a lɛ é ziin, yé wa tɔ pa Abimélɛk.

³² Joas be Jédéɔn kwa gyɛ gi nanale nya faa yé é ga, yé wa pa a ti Joas lé mi pana, Ofra lé ke Abiézɛɛ gɔnɔlamunu zé nya, ana.

³³ Jédéɔn gale zuo Izraɛl lé nénu kun pɛnpɛnnégyɛle ma Baalnu va é ziin, yé wo Baal‐Bérit si wolé bale nya.

³⁴ Gakelebale, wolé Bale lé é wo si wo nyanézannu faa lé ke wo zi, wo lee, a sele ’ka dɔ lɛ Izraɛl lé nénu gi é dɛrɛ lo.

³⁵ Yé Jérubaal, ’bɛ gi lé Jédéɔn, alé we zin faa kɛlɛle Izraɛl lɛ zuo, wo ’ka wezin kɛlɛ lɛ alé munu lɛ lo.