Weblezannu 7 - Kazambale lé Sebe Sauunu 1979

Jédéɔn Madiannu gyɛ guli nya

¹ Jérubaal lé ke Jédéɔn nya, é nwa bladi tutu, yee valé é vamunu faa nya, yé wo sɔkɔnnu dɔ Arod ’yibɔna sɔnɔ. ’Té Madian lé sɔkɔnnu a é dɔle Jédéɔn lé yirinwana bɛbolazia, Moré gɔ vazia, gɔ worona.

² Gakelebale lé Jédéɔn lɛ léé: I vamunu a kiɛre anlé Madian pale wo lee ma; Izraɛl é dan an tɔ zin fele si lɛ a fele nya léé, ’é bɛ ɛ ’é si we gi.

³ Bɛwemalé bé fe munu lɛ léé, mi lé kana ke a gi, ’té di a é kinile a gi, ’é diéra yé ’é si Galaad gɔ ma baa. Munu va mi baa vu ta do diéra yé mi baa soru vo.

⁴ Gakelebale lé Jédéɔn lɛ léé: Munu a tan kiɛre. ’I da wo nya ’yiba gi yé maa dan wo vabo lɛ ’bɛna; mian maa dan a fe lɛ i lɛ léé, ’bɛ ’é go i zuo, ’bɛ ’é go; mian maa dan a fe lɛ i lɛ léé, ’bɛ diéra, ’bɛzan ’é diéra.

⁵ Jédéɔn go munu nya ’yi va yé Gakelebale lé Jédéɔn lɛ léé: Mi faa lé woo ’yi minian ’wo nɛnɛ nya bélé blén zo, ’i wo si munu lé woo powuo zunwo ’yiminile we gi, wo va.

⁶ Wonu lé wo ’yi mini ’wo bɛ nya wa mi wuru do mi yɔ soru; mi pɔnénu faa wo powuo zun ’yiminile we gi.

⁷ Gakelebale lé Jédéɔn lɛ léé: Mi wuru do yɔ soru lé wo ’yi mini ’wo bɛ nya, wo nya lé maa dan ka si lɛ we gi yé maa dan Madiannu pa lɛ ka lee. Mi pɔnénu faa ’é go ’wolé kɔn ’léé ma.

⁸ Munu lé fɛblele koo, wolé bélinu koo, wo wo si. ’Bɛ zuo, Jédéɔn Izraɛl munu pa zia wolé sɔkɔn ’léé do do, yé é mi wuru do yɔ soru vo ’é va. Madiannu lé sɔkɔnnu a é dɔle tɛrɛ zia gɔ worona.

⁹ Gakelebale lé Jédéɔn lɛ é béli léé: ’I nwa, ’i zun sɔkɔndɔna, naa, maa a pa i lee.

¹⁰ Dé i a kanana zunle ma, ’ka go i wuozan Pura nya.

¹¹ We lé wo dan a fe lɛ i dan a ’ma lɛ yé ’bɛ zuo i bɛ é dan dɔ lɛ plɛplɛ, amalé ’i zun sɔkɔndɔna. É zun é wuozan Pura nya é va fɔɔ yé é bɔ sɔkɔn vinin ma.

¹² Madiannu koo, Amalɛknu koo, yirinwanazia munu koo, wa é nwɛɛnle gɔ worona bélé gangan gbau zo, yé wolé nyɔgɔménu a bélé wɛyi gɔɔn ma nyéné lé mi ’ka bɔa a nɔnɔle lɛ lo, a zo.

¹³ Jédéɔn bɔ, yé bé ye, ’té mi do é nyɛgyɛle zuo fé é bɔluzan lɛ. É léé: An nyɛ gyɛ, yé bé ye, sɔnmlén buru do burula Madian lé sɔkɔndɔna; é zun sɔkɔn ma, yé é zana yé é go burulale nya a nya.

¹⁴ A béé lé a lɛ léé: Izraɛl mi Joas be Jédéɔn lé gwɔun lé; fɛ bɛ kaan lo; Bale Madiannu valé munu faa pa a lee.

¹⁵ Jédéɔn nyɛgyɛle valé a gi fele ’ma aan wo, é dia é bli la, yé é da Izraɛl lé sɔkɔndɔna é ziin yé é léé: ’Ka nwa, naa, Gakelebale Madiannu pa ka lee.

¹⁶ É munu wuru do yɔ soru guli palu yaa, yé é béli valé bɔkoro nɔ wo lɛ do do ’té sonanu a bɔnu gi.

¹⁷ É lé wo lɛ léé: ’Ka yuɛ vo an va yé ’ka kɛlɛ bélé anzé zo. Dé an bɔ sɔkɔndɔna, we lé maa dan a kɛlɛ lɛ, yee duo lé ka kɛlɛ;

¹⁸ yé dé maa valé an vamunu béli fɛn, ka dan béli fɛn lɛ é ziin sɔkɔndɔna zi fɛfaana, yé ka dan a fe lɛ léé: Gakelebale valé Jédéɔn zé lé!

¹⁹ Jédéɔn valé é vami yɔ soru bɔ sɔkɔndɔna gini ma mi taginimunu palu fiézan pélisia bléyi va, ’té wo mitaginimunu tavɔɔ é dɛrɛ. Wo bélinu fɛn yé bɔnu lé ke wo lee, wo wo ’wii.

²⁰ Mi palu yaa béli fɛn yé wo bɔnu ’wii; wo sonanu kun wo bɛbo nya, yé wo bélinu kun wo bɛyi nya wo fɛnle we gi yé wo siaa léé: Gakelebale valé Jédéɔn lé gwɔun lé!

²¹ Wo faa vo ’wo dɔna sɔkɔndɔna zi, yé sɔkɔn gi munu kun vlan burule koo, siaale koo, vɔle fli gi koo, wo ma.

²² Mi wuru do yɔ soru béli fɛn é ziin; yé Gakelebale a kɛlɛ léé, wo gwɔun so a gi wo ke ma sɔkɔn gɔrɔ faa gi. Sɔkɔn gi munu fwila fɔɔ Bɛt‐Sita, Séréra vazia, fɔɔ Abɛl‐Méola, Tabat sɔnɔ.

²³ Izraɛl munu zén ékeva, Néfitali munu koo, Azɛɛ munu koo, Manasé munu faa koo, yé wo Madian munu zuo bin.

²⁴ Jédéɔn munu nwunvɔ Éfraim gɔ faa ma a fele we gi léé: ’Ka zun Madian munu zuo; ’ka zi dɔ ’yikinina fɔɔ yé é bɔ Bɛt‐Bara, é valé Juudɛn kinina nya. Éfraim munu faa zén ékeva yé wo zi dɔ ’yikinina fɔɔ yé é bɔ Bɛt‐Bara, é valé Juudɛn kinina nya.

²⁵ Madian nwiinmunu Orɛb valé Zééb, wo wo kun; wo Orɛb gyɛ Orɛb gɔlɛ ta, yé wo Zééb gyɛ Zééb lé dɔrɔ borona. Wo Madiannu zuo bin yé wo da Orɛb valé Zééb ’wuonu nya Jédéɔn lɛ Juudɛn zi.