Weblezannu 6 - Kazambale lé Sebe Sauunu 1979

Jédéɔn lé we

¹ Izraɛl lé nénu wo Gakelebale ’namawe kɛlɛ; yé Gakelebale wo pa Madian lee lɛɛ sɔrafié.

² Sole Madian lee lé we ma Izraɛl lé nénu go gɔmagurunu gi koo, gɔlɛkoronu gi koo, gɔlɛ plɛplɛnu koo, wo na.

³ Dé Izraɛl ’sa vɔ faa, Madian koo, Amalɛk koo, yirinwanazia munu koo, wo nwa yé wo da guli dan lɛ Izraɛl va.

⁴ Wo ’wolé sɔkɔnnu dɔ wolé fla ’lɛ, yé wo wolé féifɛnu sɛrɛ fɔɔ yé é bɔ Gaza, yé fɛblele koo, ’blanu koo, dirinu koo, sokofalenu koo, wo ’ka wo do kpen vo lɛ Izraɛlnu lee lo.

⁵ Naa, wo da ’wolé trubɛnu valé sɔkɔnnu nya, wo da bélé flɛflɛ zo kiɛre, wo valé ’wolé nyɔgɔménu lé wo ’ka bɔa wo nɔnɔle lɛ lo, wo nya; wo da tɛrɛ sɛrɛle tata we ma.

⁶ Nyané Izraɛl gyɛ é baba Madian lé we ma, yé Izraɛl lé nénu siaa Gakelebale lɛ.

⁷ Bléyian va lé Izraɛl lé nénu siaa Gakelebale lɛ, Madiannu lé we ma,

⁸ Gakelebale balelayezan do pa Izraɛl lé nénu lɛ zia. É lé wo lɛ léma: Gakelebale, Izraɛl lé Bale léma: Maa ka bɔra Éjipiti tɛrɛ la yé maa ka si luubale gi.

⁹ Maa ka si Éjipitinu lee, é valé wo faa lé wo nyané pa ka ta, wo lee; maa wo bin ka ’lɛ yé maa wolé tɛrɛ nɔ ka lɛ.

¹⁰ Maa lé ka lɛ léé, maa a Gakelebale, kazé Bale nya; Amorénu lé ka ke é nyanale wolé tɛrɛ la bɛ, té ka kana wolé balenu lee lo. Naa, ka ’ka an dére ’ma lɛ lo.

¹¹ Yé Gakelebale lé lanje da, yé é nyana Ofra térébɛnt yili wuo, ’té ’bɛ ke Abiézɛɛ gɔnɔlazan Joas lé fɛna nya. ’Té a be Jédéɔn a ’sa sunwona dɔrɔ borona, a yɔɔle Madiannu lee we ma.

¹² Gakelebale lé lanje bɔra a va yé é léé: Gakelebale a bii, nyanazan baba, va.

¹³ Jédéɔn lé a lɛ léé: Aa! anzan, dé Gakelebale a ko va mɛmalé we ’konu faa bɔ ko maa? Ko tranu ’ka a fe lɛ ko lɛ léé, Gakelebale ’wo si Éjipiti tɛrɛ la loo? Yé gyɛzorowe faa lé ko tinu wo zuo fe ko lɛ, wa kyɛɛn? Sin, Gakelebale ko vo ko saa, yé é ko pa Madian lee!

¹⁴ Gakelebale nɔla a va yé é léma: ’I go, plɛplɛ ’ko lé ke i lee, a nya, yé ’i Izraɛl si Madian lee; maa ’ka i pa lɛ zia loo?

¹⁵ Jédéɔn lé a lɛ léé: Aa, anzan, maa Izraɛl sié we gi mɛ fɛ nyaa? Bé ye, an gɔnɔlamunu faa a nyanégyɛzan nya é mini Manasé munu faa la, yé maa a kiéné an ti lé kɔn gi é mini wo faa ta.

¹⁶ Gakelebale lé a lɛ léé: Naa, maa dan kɛlɛ lɛ i va, yé i dan Madiannu gyɛ lɛ bélé mi do zo.

¹⁷ Jédéɔn lé a lɛ léé: Dé maa i yuɛi bɔ, ’i tɔmase do kɛlɛ an lɛ a gɔɔnle we gi léé, bii ɛ we fe an lɛ.

¹⁸ Té i si fɛkona lo fɔɔ yé an da i va é ziin, yé an da anlé blan nya yé maa a pla i ’lɛ. Yé Gakelebale léé: An dan vo lɛ fɔɔ yé i da é ziin.

¹⁹ Yé Jédéɔn go yé é boliné ma’lɛrɛ, yé burunu lé lévɛn ’ka a va lo é a kɛlɛ burupun vlekyɛɛ nya do. É wi pa kyɛɛné gi yé é a wuo ’yi zén bɔ gi, yé é da wo nya térébɛnt yili wuo, yé é wo dɔra a ’lɛ.

²⁰ Gakelebale lé lanje lé a lɛ léé: Wi valé burunu lé lévɛn ’ka a va lo, ’i wo si, bé pla gɔlɛ ’ko ta, yé bé wuo ’yi zana.

²¹ Yé é a kɛlɛ a zo. Tawomayili lé ke Gakelebale lé lanje lee, é a soi, yé é a ’léé zun wi valé burunu lé lévɛn ’ka a va lo, wo ma. Yé kyɛ bɔra gɔlɛ gi yé wi valé buru lé lévɛn ’ka a va lo, é wo ble. Yé Gakelebale lé lanje ta san a yuɛ va.

²² Jédéɔn a ye aan wo léé, é a Gakelebale lé lanje nya, é léé: Mizan Gakelebale! Wenaané kɛlɛ an lɛ, naa, maa Gakelebale lé lanje ye an yuɛ nya.

²³ Gakelebale lé a lɛ léé: ’I vo drɔɔ, té i kana lo, i ’ka dan ga lɛ lo.

²⁴ Jédéɔn Gakelebale banna kɛlɛ ’bɛna, yé é a tɔ pa mivodrɔɔ Gakelebale; yé é ana tan kyɔ Ofra, fla lé ke Abiézɛɛ gɔnɔlamunu zé nya, ana.

²⁵ Alé béli duo nya, Gakelebale lé Jédéɔn lɛ léé: ’I ti lé dirigɔné boroné si, é valé dirigɔné fiézan lé a lɛɛ ke sɔrafié, a nya. Yé Baal banna lé ke i ti zé nya bɛ, bé zana, yé miyili lé ke a ta loru bɛ, bé sɛrɛ.

²⁶ ’Bɛ zuo, ’i Gakelebale, izé Bale banna kɛlɛ gɔlɛ ’ko ta loru. Yé miyili lé bé sɛrɛ bɛ, bé kyɛ sɔɔn, yé ’i dirigɔné fiézan si, yé bé nɔ wi lé wa kyɛ blé, a nya, a ta.

²⁷ Jédéɔn é wuomunu va mi vu si, yé we lé Gakelebale a fe, é a kɛlɛ; naa, é kana é ti lé kɔngimunu valé flamunu lee, bɛwemalé é a kɛlɛ é béli, é ’ka a kɛlɛ lɛ é yiéyi lo.

²⁸ Flamunu nwa bladi tutu aan wo, bé ye, Baal banna yara a é buale; miyili lé ke a ta loru, é a é sɛrɛle, yé dirigɔné fiézan a é nɔle wi lé wa kyɛ blé, a nya, balebanna lé wa dɔ bɛ, a ta.

²⁹ Wo lé ’wo ke lɛ léé: De ɛ ’bɛ kɛlɛɛ? Yé wo we gi laa, yé wa kɛlɛzan nagini. Wo lé wo lɛ léé: Joas be Jédéɔn ɛ kɛlɛ.

³⁰ Yé flamunu lé Joas lɛ léé: ’I be bɔra, yé ’é ga ma; é Baal banna yara bua yé miyili lé ke a ta loru, é a sɛrɛ, azama.

³¹ Joas lé, munu lé wo da a va bɛ, wo lɛ léé: Ka dɔ Baal zuoo? Ka da bɔ lɛ a vaa? Miomian é dɔ Baal zuo, ’wa gyɛ kyɔ ma. Dé Baal a bale nya, wo a banna yara bua fɛan zo bɛ, ’ébo zé fe ma.

³² Yi ’ko nya wo tɔ pa Jédéɔn ma Jérubaal, ’bɛ gi léé, Baal ’ébo zé fe ma, é a banna sɛrɛ, azama.

³³ Madiannu faa koo, Amalɛknu koo, yirinwanazia munu koo, wo faa zén ékeva; wo Juudɛn kini yé wo sɔkɔnnu dɔ Jizréɛl gɔ worona.

³⁴ Gakelebale Léli a é zénle Jédéɔn ta bélé sɔ zo; é béli fɛn yé Abiézɛɛnu da a zuo.

³⁵ É munu nwunvɔ Manasé munu faa va yé wo wo laa tawole a zuo we ma. É munu nwunvɔ Azɛɛnu koo, Zabulɔnnu koo, Néfitalinu koo, wo va, yé wo zén ékeva a va.

³⁶ Jédéɔn lé Bale lɛ léé: Dé é sɔ i lɛ léé, i Izraɛl si we gi an bɛ nya, fɛan zo lé bé fe, a zo,

³⁷ bé ye, an dan ’blakyɛɛ pla lɛ ’sasunwona; dé fli vɔ ’blakyɛɛ do kpen ta, ’té tɛrɛ faa a é gale, maa dan a gi dɔɔ lɛ léé, i dan Izraɛl si lɛ we gi an bɛ nya, fɛan zo lé bé fe, a zo.

³⁸ Yé é kɛlɛ ’bɛ zo. ’Bɛ é tu kini Jédéɔn nwa bladi tutu yé é ’blakyɛɛ boro yé a gi’yi ’yiminikana fan.

³⁹ Jédéɔn lé Bale lɛ léé: Té i bli fli an ma lo ma, yé an we fe é ziin do kpen. É sɔ an lɛ léé, maa we gi dan ’blakyɛɛ nya é ziin do: ’blakyɛɛ do kpen ’é vo é gale yé fli ’é vɔ tɛrɛ faa ta ma.

⁴⁰ Yé Bale a kɛlɛ ’bɛ zo é béli ’ko nya. ’Blakyɛɛ do kpen vo é gale yé fli vɔ tɛrɛ faa ta.