Weblezannu 5 - Kazambale lé Sebe Sauunu 1979

Lɛrɛ lé Débora valé Barak a vɔ

¹ ’Bɛ yi la Débora valé Abinoam be Barak lɛrɛ ’ko vɔ léma:

² Wo minwiinmunu dɔ Izraɛl munu ’lɛ, Yé munu wobo nɔ gulidanle lɛ. ’Wo Gakelebale drɔɔ vo ma!

³ Minwiinmunu, ’ka tɔné dɔ! Mi blɛnnu, ’ka an ban ka tɔné nya. Maa dan lɛrɛ vɔ lɛ, iin, maa dan lɛrɛ vɔ lɛ Gakelebale lɛ, Maa dan lɛrɛ vɔ lɛ Gakelebale, Izraɛl zé Bale lɛ.

⁴ Oo, Gakelebale, dé i si Séii, Dé i bɔra Édom lé féinu la, Tɛrɛ ma nyɔɔn, yé lanu ’yibo, Yé latinu ’yibo ’yi nya.

⁵ Gɔnu ma nyɔɔn Gakelebale ’lɛ, Yé Sinai boen koo, a ma nyɔɔn Gakelebale, Izraɛl zé Bale ’lɛ.

⁶ Anat be Samagaa bléyi va, Jaɛl bléyi va, zi ’léénu vo é pla, Yé tawomunu paa zi bɛnu ta.

⁷ Minwiinmunu lé plɛplɛ ’ka lo, Izraɛlnu va, wolé plɛplɛ ’ka lo, Bléyian va lé maa nwa, maa Débora, Bléyian va lé an kɛlɛ Izraɛlnu bu nya, a bléyi va.

⁸ Izraɛl bale bɛ dɛrɛnu si, ’Bɛwemalé guli a fla ’léé; Golɛtayɔɔfɛ koo, din koo, Wo ’ka wo do kpen yé Izraɛl mi baa yɔ boen méléna lo.

⁹ An bli a Izraɛl nwiinmunu lɛ, Munu lé, wobo nɔ gulidanle lɛ munu va, an bli a wo ɛ lɛ. ’Ka Gakelebale drɔɔ vo ma.

¹⁰ Ka lé ka vɔa sokofale funu ta, Ka lé, ka nyanaa sɔblin gi, Yé ka lé ka ke tawona zia, ’ka lɛrɛ vɔ!

¹¹ Sadunzannu lé ke é dɔle winu lé ’yiminina sɔnɔ, Wo ɛ Gakelebale kɛlɛwe zin fé, Wo ɛ Izraɛl zilɛzan kɛlɛwe zin fé. Yé Gakelebale lé munu go flagɔrɔ ’léénu na.

¹² ’I vuo, Débora, ’i vuo! ’I vuo, ’i vuo, ’i lɛrɛ vɔ! Barak, ’i nwa, Abinoam be, ’i da bokɔn gi munu nya!

¹³ Yé munu lé wo vo, wo pla mi plɛplɛnu nwiin, Gakelebale guli ’wuo nɔ an lɛ nyanazannu va.

¹⁴ Amalɛk munu si Éfraim. Bɛnjamɛn tawo i zuo ilé sunyanu va. Minwiinmunu si Makii, Yé plawonwiinzannu si Zabulɔn.

¹⁵ Isakaa mi segelenu ana Débora va, Yé Isakaa go Barak zuo; Wo wo nwunvɔ a gane pa gi gɔnu worona, Rubɛn lé ’yibɔna sɔnɔ, Gibɔrɔ blɛn a wo bli gi.

¹⁶ Mɛmalé i vo ’blanu lé fɛblena I tɔné dɔna ’blanu wele lɛɛ? Rubɛn lé ’yibɔnanu, Gibɔrɔ blɛn a wo bli gi.

¹⁷ Galaad lé ke Juudɛn zi, é ’ka si lɛ é nyanana lo. Mɛmalé Dan dɔ élé ’yitagoronu sɔnɔɔ? Azɛɛ a é nyanale wɛyi gɔ la, Yé wo flin ’yitagoro dɔna.

¹⁸ Zabulɔn koo, Néfitali koo, Wa munu lé wo bli si ’wo gale lɛ Gɔ nwiin féinu ta, wo nya.

¹⁹ Minwiinzannu da, wo guli dan Yé Kanaan minwiinzannu guli dan Taanak, Mégido ’yinu sɔnɔ. Wo ’ka gulizarafɛnu valé gɔɔlifu si lɛ lo.

²⁰ Lanu guli dan, Monénénu lé wo ke nɔɔna, wo guli dan Sizéra va.

²¹ Kizɔn yuu go wo nya, Yuu lé ke yuu kwa nya, Kizɔn yuu, é go wo nya. Anbozen, ’i nyanazannu zɔn i gane nya!

²² Wisoonu gane sɔnéwɔlɛ vun we Gulidanzannu lé vlan buruna.

²³ Gakelebale lé lanje léé: ’Ka bale pa Méroz ma, ’Ka bale pa, ’ka bale pa alé munu ma. Naa, wo ’ka da lɛ bɔ lɛ Gakelebale va lo, Wo ’ka pa lɛ nyanazannu va, yé wo bɔ Gakelebale va lo.

²⁴ ’Wo Kéni mi Éébɛɛ na Jaɛl drɔɔ vo lomu méléna! Wa drɔɔ vo lomu lé wo ke sɔkɔn wuo, wo méléna.

²⁵ É ’yi laa a lee, yé é dirinyɔyi nɔ, É da dirinyɔyi nyɔnɔ nya minwiinzan lé ’yiminikana gi.

²⁶ É sɔkɔnyili si é bɛ do nya, Yé é nyanamapazan lé maato si é bɛyi nya; É Sizéra gyɛ yé é a ’wuo fɔn, Yé é a ’wii.

²⁷ É zanai Jaɛl gane ma, é dia é yiɛ; É zanai a gane ma, é dia; Fɛana lé é zanai bɛ, ana lé é dia yé é ga.

²⁸ Sizéra bu a nagini fɛnɛti ta, É a nagini foliɛwɔlɛ fɛnɛti ta, yé é siaa léé: Mɛmalé alé goro mɔn ziaa? Mɛmalé alé goronu a tawona wɔɔ?

²⁹ Alé lomu lé wo we dɔɔ é mini ’wo bɔluzannu faa ta, wa zi pa a lɛ, Yé yeebozen a zi pa ébo lɛ léé:

³⁰ Wo ’ka gulizarafɛnu ye lɛ é wo loo? wo ’ka a guli lɛ loo? Blɛn boroné do, blɛn boroné fié, mi do do zé nya, Sɔ yuɛɛ kiɛre a Sizéra zé gulizarafɛ nya. Pɛɛgyɛlasɔ yuɛɛ kiɛre, sɔ yuɛɛ kiɛre do, Pɛɛgyɛlasɔ, sɔ yuɛɛ kiɛre fié, Wa guliwuovolɛzan zé gulizarafɛ nya.

³¹ Oo Gakelebale, ’ko zo lé i nyanézannu faa ’é zamaga wo ma. Munu lé woo i lɔrɔ paan, wa bélé yiri zo, ’Té dé é bi élé plɛplɛ faa nya. Tɛrɛ vo drɔɔ lɛɛ yɔ fié wuo.