Weblezannu 4 - Kazambale lé Sebe Sauunu 1979

Débora valé Barak lé we

¹ We lé é ’ka sɔ lɛ Gakelebale lɛ lo, Izraɛl lé nénu a kɛlɛ é ziin Éud gale zuo.

² Gakelebale wo dan Kanaan nwiinzan Jabɛn lé é pla munu nwiin Asɔɔ, a lee. Alé sunyanu nwiinzan a Sizéra nya, yé é nyana Arosɛt‐Goim.

³ Izraɛl lé nénu siaa Gakelebale lɛ, Jabɛn lé foliɛwɔlɛ goronu a wuru ziɛn yɔ soru, yé é nyané pa Izraɛl lé nénu ta é baba lɛɛ yɔ do gi, ’bɛzama.

⁴ ’Bɛ bléyi va balelaye le, Lapidɔt na Débora a Izraɛl lé weblezan nya.

⁵ Éé nyanaan Débora lé yɔ wuo, Rama valé Bétɛl méléna, Éfraim gɔ nwiin, ’té Izraɛl lé nénu éé goo a va léé, ’é wolé we ble.

⁶ É mi nwunvɔ Kédɛs‐Néfitalizan Abinoam be Barak laana, yé é lé a lɛ léé: We lé Gakelebale Izraɛl lé Bale a fe i lɛ, yeean ke ’ko loo? ’I go, ’i drɔ Tabɔɔ gɔ nwiin zia, yé ’i mi baa soru si Néfitali munu valé Zabulɔn munu va yé ’ka go wo nya.

⁷ Maa dan Jabɛn lé sunyanu nwiinzan Sizéra bié lɛ i va Kizɔn ’yiba ma, yee valé élé goronu valé élé sunyanu nya, yé maa dan wo pa lɛ i lee.

⁸ Barak lé Débora lɛ léé: Dé i go an va, an dan go lɛ; naa, dé i ’ka go an va lo, an ’ka dan go lɛ lo.

⁹ Débora léé: Maa dan go lɛ i va webozen nya, naa, zi lé bé sia, i ’ka dan tɔ ye lɛ a ’léé lo, naa, Gakelebale é dan Sizéra pa lɛ leezan do lee. Yé Débora nwa, yé wo go Barak nya Kédɛs.

¹⁰ Barak Zabulɔnnu valé Néfitalinu laa yé wo da Kédɛs; mi baa soru tawo Barak zuo, yé Débora go a va.

¹¹ Kéni mi Éébɛɛ si Kéni munu va yé élé sɔkɔn dɔ Sanaim sɛnéyili wuo, Kédɛs sɔnɔ. Kéninu a Moizi na ti Obab kulunu nya.

¹² Wa fe Sizéra lɛ léé, Abinoam be Barak a gona Tabɔɔ gɔ vazia.

¹³ Sizéra élé goronu faa zén ékeva, foliɛwɔlɛ goro wuru ziɛn yɔ soru nya, yé é sia Arosɛt‐Goim yé é bɔ Kizɔn ’yi ba ma, yé munu faa go a va.

¹⁴ Yé Débora lé Barak lɛ léé: ’I nwa, Gakelebale Sizéra pa i lée kyɔ. Gakelebale ’ka tawona i ’lɛ loo? Yé Barak Tabɔɔ gɔ zun mi baa soru nya ’é zuo.

¹⁵ Sizéra koo, alé goronu faa koo, alé munu faa koo, Gakelebale wo fwila gwɔun sorosoro nya Barak ’lɛ. Sizéra zun élé goro gi yé é vlan buru é gane la.

¹⁶ Barak goronu valé sunyanu zuo bin fɔɔ yé é bɔ Arosɛt‐Goim yé é Sizéra lé sunyanu faa gyɛ gwɔun nya, yé mi do kpen ’ka vo lɛ lo.

¹⁷ Sizéra vlan buru é gane la Kéni mi Éébɛɛ na Jaɛl lé sɔkɔn vazia; naa, vole drɔɔ a Asɔɔ minwiinzan Jabɛn valé Kéni mi Éébɛɛ worona, ’bɛzama.

¹⁸ Jaɛl bɔra Sizéra va, yé é lé a lɛ léé: ’I wɔra, anzan, ’i wɔra anlé kɔn gi, té i kana lo. É wɔra alé sɔkɔn gi yé é a yɔɔ sɔ wuo.

¹⁹ É lé a lɛ léé: Ilé zanté, ’i mini’yi sɛné nɔ an lɛ, naa, ’yiminilɔrɔ a an gyɛna. É dirinyɔyi wikɔlɛ kuo lɛ so, é a nɔ ’yiminile nya yé é sɔ zén a ta.

²⁰ Sizéra lé a lɛ léé: ’I dɔ sɔkɔn ’léé, yé dé mi doan é da we laa lɛ i lee léé, mi do ana ’koo? bé zi pa a lɛ léé, gba.

²¹ Éébɛɛ na Jaɛl sɔkɔn poludɔmayili soowɔla, é maato si yé é bié Sizéra ma wɔɔ, yé é a blin a yarapɛla sɔkɔn poludɔmayili nya, yé é bɔra a nwun zi yé é go tɛrɛ gi. É a yifla yé a wɔlɛ gi nyaa a ma é baba yé é ga.

²² Dé Barak a Sizéra zuo binna, Jaɛl bɔra a sina zia yé é lé a lɛ léé: ’I da, yé mi lé i ke a ginina maa dan a gɔɔn lɛ i lɛ. É wɔra a va, yé bé ye, Sizéra gale a é diale, sɔkɔn poludɔmayili nya é wuo gi.

²³ ’Bɛ yi la Gakelebale Kanaan minwiinzan Jabɛn tua Izraɛlnu lee.

²⁴ Yé Izraɛl lé nénu bɛ mini Kanaan minwiinzan Jabɛn ta yé a gi go gyɛle nya fɔɔ wo Kanaan minwiinzan Jabɛn sɛrɛ tata.