Weblezannu 3 - Kazambale lé Sebe Sauunu 1979

¹ Izraɛl lé nénu lé wo ’ka Kanaan tɛrɛ la gulidanlenu faa na ye lɛ lo, bɛnnu lé Gakelebale wo vo wo gi danle we ma, woo lo.

² Izraɛl lé nénu kulunu lé wo ’ka gulidanle lé we dɔɔ lɛ é vinin lo, é sɔ Gakelebale lɛ léé, ’wo gulidanle draan, yé wa gi dɔɔ.

³ Filisitinu nwiinzannu soru koo, Kanaannu faa koo, Sidɔnnu koo, Éévinu lé wo ke é nyanale Liban gɔ ma, é si Baal‐Eɛmɔn gɔ ma fɔɔ yé é bɔ wɔrana Amat, wo koo, woo bɛnnu ’ko lé.

⁴ Wo Izraɛl gi dan bɛn ’konu nya, we lé Gakelebale wo tinu bélidɔ a nya Moizi lɔlu nya, dé wa lɛdɔa a maa? yé é a gi dɔɔ.

⁵ Kanaannu koo, Étinu koo, Amorénu koo, Férézinu koo, Éévinu koo, Jébusinu koo, Izraɛl lé nénu a é nyanale wo va;

⁶ wo wo lunu si ’wo nanu nya, yé wobozen ’wo lunu nɔ wo é benu lɛ, yé wo wolé yonu ban.

Otiniɛl lé we

⁷ We lé é ’ka sɔ lɛ Gakelebale lɛ lo, Izraɛl lé nénu a kɛlɛ; wo gi san Gakelebale ma, yé wo Baalnu valé miyilinu bɔ.

⁸ Bɛwemalé Gakelebale bli fli Izraɛl ma, yé é wo dan Mézopotami nwiinzan Kusan‐Riséataim lee. Yé Izraɛl lé nénu vo é plale Kusan‐Riséataim wuo lɛɛ sɔraa.

⁹ Izraɛl lé nénu siaa Gakelebale lɛ, yé Gakelebale wo siéwegizan nwa wo lɛ, ’té éé wo sié we gi, Kalɛb zuané Kénazi be Otiniɛl lé.

¹⁰ Gakelebale Léli a a ta. É kinin Izraɛl lé weblezan nya, yé é go guli dan lɛ. Gakelebale Mézopotami nwiinzan Kusan‐Riséataim pa a lee, yé a bɛ plɛplɛ mini Kusan‐Riséataim lɛ.

¹¹ Tɛrɛ flin lɛɛ yɔ fié. Yé Kénazi be Otiniɛl ga.

Éud lé we

¹² We lé é ’ka sɔ lɛ Gakelebale lɛ lo, Izraɛl lé nénu a kɛlɛ é ziin; Gakelebale plɛplɛ nɔ Moab nwiinzan Églɔn lɛ Izraɛl ma; we lé é ’ka sɔ lɛ Gakelebale lɛ lo, wa kɛlɛ, azama.

¹³ Églɔn Amɔn benu valé Amalɛk benu zén ékeva ’é va, yé wo go wo va guli dan lɛ. É Izraɛl kele guli nya yé é yɔwuofla si.

¹⁴ Yé Izraɛl lé nénu vo é plale Moab nwiinzan Églɔn wuo lɛɛ vu ta sɔraa.

¹⁵ Izraɛl lé nénu siaa Gakelebale lɛ, yé Gakelebale wo siwegizan nwa, Bɛnjamɛn mi Géra be Éud lé é ke bɛbodɔzan nya, a nya. Izraɛl lé nénu blɛfɛ pa a lee Moab nwiinzan Églɔn zé nya.

¹⁶ Éud ’léé fié gwɔun kɛlɛ, a grɔgrɔ a mɛtrɛ buu nya, yé é a wo é kɔlɛ gi ’élé sɔ wuo, ’é bɛyila zia.

¹⁷ É da blan nya Moab nwiinzan Églɔn lɛ; naa, Églɔn a mi buale baba nya.

¹⁸ É blan nɔ aan wo, munu lé wo da a nya é wo pa zia é ziin.

¹⁹ Dé é bɔ gɔlɛ sina lé ke Gilgal sɔnɔ, ana, yé é nɔla é pa gi yé é go fla yé é léma: Oo minwiinzan, maa we do fé i lɛ kyeen gi ma. Minwiinzan léé: ’Ka tadɔ! Yé munu faa lé wo ke a sɔnɔ, wo bɔra.

²⁰ Dé minwiinzan a é nyanale é do kpen kyɛebɔbléyivakɔn gi, Éud bié a va yé é léma: Bale dére do a an gi izé nya. Églɔn nwa élé blin ta.

²¹ Yé Éud ’é bɛbo soi yé é gwɔun si é bɛyilazia yé é a wɔra a bɔn gi.

²² A yili wɔra a bɔn‐in yé a nyɔnɔ lɛ tan a ta; é bɔra a zi yé é ’ka a si lɛ lo.

²³ Éud bɔra kɔn lɛɛ wuo zia, é kɔn ta loru kɔn lɛnu tan yé é laklé vɔ wo ta.

²⁴ Dé é bɔra minwiinzan wuomunu da yé wa nagini, ’té kɔn ta loru kɔn lɛnu a é tanle laklénu nya. Wo léma: É yia kyɛebɔbléyivakɔn gi, weboen nya.

²⁵ Wa lɛbɛn kiɛre, naa, é ’ka aan wo kɔn ta loru kɔn lɛ sona lo, bɛwemalé wo laklé wɔlɛ si yé wa lɛ so, yé wo ’wozan ye é diale tɛrɛ va é gale.

²⁶ Bléyian va lé wa lɛbɛnna, ’té Éud vlan buru yé é gɔlɛ sina kini yé é vɔ fli gi Séira.

²⁷ É bɔ ’bɛna tɔɔn, é béli fɛn Éfraim gɔ ma. Yee valé Izraɛl lé nénu gɔ zun, ’té é a wo ’lɛ.

²⁸ É lé wo lɛ léé: ’Ka da an zuo, naa, Gakelebale ka nyanézannu, Moab munu, pa ka lee. Wo zén a zuo, wo Juudɛn kinina si Moab yara zia, yé wo ’ka mi do vo lɛ léé, é gié lo.

²⁹ Wo Moab munu gyɛ, é mi baa soru bɔa, wo faa a mi plɛplɛ valé nyanazannu nya, yé mi do ’ka so lɛ a la lo.

³⁰ Yi ’ko la Moabmunu tua Izraɛlnu lee. Yé tɛrɛ vo drɔɔ lɛɛ yɔ ziɛn.

Samagaa lé we

³¹ Éud é zuo, Anat be Samagaa nwa. É Filisitinu gyɛ mi wuru yaa diritabin foroné nya. Yé yee é ziin, é kɛlɛ Izraɛlnu voébomazan do nya.